ABÌKAKAN 18 - Ala Ane Wene Ket Mene Warogo Wo'ninapike Wene

Apùnì o Pabel mene yeloken tagalipapenem eileken lakhasike wene

¹ Atì'nogo yogonetesik oba nen opolik he, at malaikat hunigat mene aike pogot oba nen pi waganem lakhìgì. At atì omame motok apik logolìk, ebe apopok api'mo re, apùnì kweangma mene obogat inoba kìalogo lakhìkì laga hìgì.

^2-3 Atì'nogo pi wagasik ane hùkorogo mel yogoisike: “Apùnì aike nen anggur eken amusu wogisikenem nìlìk sìnì'nùk agaikarek atì hak, he kain yanani nikerek mene a'nogo agasabu lagaikenem, Hakhanini, ìlùk, apùnì inùkùl etage lopok obogat mel, ap kaintek inetagepogot kweangma mene mel, yogoisikenem, it en pailak hakhìkì lagaika atì. Nen, at he atì agasabu lagaikenem hakhouagalùk oabùt hagaterek atì ba, apùnì kweangma mene yì mene tì mene oko ha abaragarek mene ineilmo wùlalhak hagarìkì lagaikaat. Atì'nogo hagatì lagaika meneat he, yogotak arat yeloken tagalagaika yì, heing! Atì'nogo yeloken tagalagaikama re, Ibilit agoromì inom mel, mokareke oabùt weak mene mel, Sùe atì mene nasak lek ìlùk agaseratarek mene obogat mel, it inaua haga'laga o,” ìlùk yogosike.

^4-5 Atì'nogo yogosikesik oba nen opolik he, at Ala ane pogot oba nen aike mel ike: “Apùnì nen, yì mene tì mene opoloa'ma oba lou'-louk hìlìk lagegarek atì hak, it apùnì nen, at he atì inom weak hagato motok welagaikarek mene atì pogot oba higit lagaikomo, an Ala na'la eberek motok welagi atì nen he, an nen it ùkùm inoba hìlìk weagarinabigin. It weagarinapì logolìk, hit an nagainapùrì mene it hinom logolìk, it inoabùt waganogo weak hagasumo hinom weagathinabi nogo nen he, it heraksalùk hese wùlìbi we'ni o.

⁶ Nen, hit en, at he atì ùkùm oba hogoin mene nen, at en it hagarinapì laga hagat, ùkùm ebe oba hìkì logolìk, aike inom oba louk hogo heino o. Nen, at en i melagisagarek atì hagat anini inoba hìkì laga mene atì, oko ùkùm oba hìkì logolìk, aike inom oba louk hogo heino o.

⁷ At he atì, okawerek en ìkì logolìk: An nebe kain logolìk, apùnì nawe a'ma hisìlìk hagisek logolìk he, soge hanhama nen na'la weak arìk le aga logogin nogo? Lek o, ìlùk yì mene tì mene oba hilarogo logolìk okawerek en hùkorogo hogorakiko motok werek atì hagat, heinet hùkorogo watì logolìk, a'la weak arìk le aga logouagalùk ùkùm wogo'no o.

⁸ Atì'nogo akikerek atì nen he, an Ala nomame api'mo re, omake hesigat sùpùrùk no mel, ou ia mel wogorìk, ebe etumo lolisikenem a'la weak arìk le aga logogin atì,” ìlùk pogot oba nen ikenem nasuk holhì.

⁹ At he atì ebe atì'nogo halì nìkì logolìk, esi hule lagaikenem, it ap kaintek inetagepogot kweangma welagaikarek mene, at he atì oba aiyage lagaikenem, sebethahùk pailak hakhouagalùk hagatenem, hakhìkì lagaukwa mene amanogo nen ineileken lakhìlìk, ouak lì agìk, le agìk, ìkì lagaika.

¹⁰ Ouak le atì'nogo aga logolìk, “At weagathikomo heinet warì'logo atì, nit ninom weaga'ninapenem heinet wasi nogo,” ìlùk inayùk en inebe walegat metek logolìk, le yì'nogo aga lagaika: “At Ala nen, hit apùnì o Pabel mene hinomame apik a'nogo re, we, omake hesigat ùkùm hinoba hìlìk weagathinape atì, eige, ehìk,” ìlùk le aga lagaika isìgì.

¹¹ It atì'nogo le aga kolek, it apùnì yì mene tì mene oko abaragarek mene nen he, mel ìkì lagaika: “Ninagarok yì mene tì mene wolok lìlìk, it apùnì o Pabel mene inoba oko wanhorek mene a'nogo, hobuk sanì inoba oko wanhì logogun,” ìlùk inouak lì agìk, le agìk, ìkì lagaikaat.

¹² Atì'nogo le aga logolìk, “Yì mene tì mene atì ebe re, oko apik palharek mene emas mel, perak mel, helebeken oko apigat palharek mene etage permata mel, mutiara mel, su kain sutera su mel, lenan su mel, elokoken he, mep hake mel, kìbì-kìbì warek hake mel, e obasi hano mene mel, wam hake etage gajah aik mene yì mene tì mene hagatarek mene mel, yì mene tì mene e oko apik palharek mene hagatìk, tembaga mene hagatìk, posie mene, hagatìk, helep etage pualam mene hagatik, egarek mene mel,

¹³ obasi hano mene kamì mel, heite hake mene mel, labet hake mene mel, e mur amusu mel, kemenyan amusu mel, anggur eken amusu mel, wam amusu mel, tepung mel, gandum mel, wam sapi mel, kuda mel, topa mel, oto hake etage kereta mel, apùnì inebe inatitigeke logouagalùk mel, obogat wolok lìlìk, sanì inoba oko wanhì logogun,” ìlùk le aga lagaika.

¹⁴ Atì'nogo le aga logolìk, it Pabel mene mel yogoisaga: “Yì mene tì mene hit hinamolo mene lek agìk, yì mene tì mene oba hilarogo logolìk, hina'la hairogo welagasep mene lek agìk, ikomo re, hit en heragasogo wanusak motok mea aga o,” ìlùk ìkì lagaika.

¹⁵ Atì'nogo egasik, it apùnì yì mene tì mene oko abarogo it Pabel mene inoba sabùrìkì lagaika mene amanogo nen he, “It apùnì o Pabel mene yì aik tì aik hagarinape atì hak, nit atì'nogoat haga'ninabi nogo,” ìlùk inayùk en inebe walegat metek logolìk, inouak le aga logolìk, mel ìkì lagaika:

^16-17 “Hit Pabel mene hinasu kain lenan su mene elokoken mep hake mene mel, kìbì-kìbì warek hake mene mel, labethìlìk, hinalìlìke emas mene mel, helebeken oko apigat palharek mene etage permata mene mel, mutiara mene mel, wanhesep a'nogo re, we, omake hesik arat alema'lagaika yì eige, ehìk,” ìlùk inouak lì agìk, le agìk, ìkì lagaika. It atì'nogo iko kolek, it apùnì i so hùkotek etage kapal wolok negarek mene inogogì ap kaintek mel, inagoromì so watarek mene mel, it apùnì aike wogisek lagaikarek mene mel, it aike i laut yekelekkwe yì mene tì mene herarìk negarek mene mel, obogat, it apùnì Pabel mene inebe halì nikenem inesi hule ineileken lagasogo walegat metek logolìk, mel ìkì lagaika:

^18-19 “Egi, nayùk e. O kota apùnì Pabel mene inawìsili yì hake, o yì awì tì awì aike werek nogo? Motok lek o,” ìlùk, wul hesi inùkùl oba yùgùlogo inouak le aga logolìk mel ìkì lagaika: “Ehìk, netawìlak e. It apùnì O Pabel mene inagarok yì mene tì mene api'mo, nit ninaso oko palogo nineilmo wùlalhak haga'ninaparek a'nogo meneat he, we, omake hesik alema'lagaika yì netawìlak e,” ìlùk ìkì lagaika.

²⁰ Atì'nogo iko kolek, at aike nen he, it Ala againapùrì mene mel yogoisike: “Ala nen he, hit hinùkùlmo it o Pabel mene ùkùm inoba hìlìk weagarinape atì nen he, hit pogot oba mene obogat hina'la hai hakìgìk, hit Yesut en hinayoko hìlìk lakhikasike mene mel, hit at ane yogoisegesep mene mel, hit Ala againapùrì aike mel, obogat hina'la hai hakìgìk, ini o,” ìlùk ikenem holhì.

²¹ Atì'nogo ikenem holhìrìk oba nen opolik he, at malaikat omame apik mene aike wagasik helep hùko yì mene ti mene sagalharek mene hake mene wouk hogo i laut yekele'ma pelapi logolìk mel ike: “At Ala nen hit apùnì o kota Pabel mene, yì'nogoat omamerogo po pelakhikegein o. Atì'nogo pelakhikamo, hobuk apùnì nen ineileken hisogoin motok lek o.

^22-23 Apùnì o yì awì tì awì oko abatarek mene, inetage lek hake meneat he, ap hit mene nek he, inetagewerek welagaika. Nen, hit en hinawesa mene ba apùnì yì awì tì awì inùkùl etage lopok, lalinapì lagebat. Atì'nogo hagatì lagep meneat he, it gitar watarek mene ho, etawì watarek mene ho, lokop ako holelogo huthagarek atì hak huthagarek mene ho, pìkon hùko mene anethagarek mene ho, hobuk watenem ane holugun legat. Nen, ap aike yì mene tì mene apùgùn weak hagaterek mene hagatenem ineileken hogoin legat. Nen, inapùrùk gandum eken mene sagalhenem helep ane ikerek mene atì, hobuk ane ikenem inasuk holugun legat. Nen, hinaesage amulok ineileken hogoin legat. Nen, ap en hìmì woginapenem ina'la hairogo inane egarek mene inasuk holugun legat o,” ìlùk ikenem holhì.

²⁴ It apùnì o kota Pabel mene nen, apùnì Ala ane yogoisagarek mene mel, Ala againapùrì aike mel, inamep wulagasogo inoatìk, it apùnì aike kweangma inoata mene obogat, it enat inoatìk, inoasukwasi'mo nogo nen he, inamep ineki okutmo werek atì nen, Ala nen ùkùm inoba hìlìk, weagarinape atì.