ABÌKAKAN 17 - Ala Ane Wene Ket Mene Warogo Wo'ninapike Wene

He kain yanani nikerek mene hesik yogosike wene

^1-2 Atì'nogo hìgìrìk oba nen opolik he, it malaikat inebe 7 nen Ala a'mage i negen hinago wolok kesalha amanogo mene aike wagasik mel yogonete: “It apùnì o kota Pabel mene, he kain yanani nìlìk nikerek mene hake atì, i hùkotek mene esakoma were'ma, ap kaintek inetagepogot kweangma mene nen at pailak hakhìgìk, apùnì aike nen anggur eken amusu niko motok logolìk, lùgù'lùgì palharek atì hak, apùnì kweangma mene nen at pailak hakhiko motok welagìk, egarek mene atì, Ala nen he atì ùkùm oba hìlìk ebe weagatheigilùk aweim kabelhe mene yogohesik en eme o,” ìlùk yogonete.

³ Atì'nogo yogonetenem he, Ala Areagùn noba louk i wagama, at malaikat a'nogo nen wo'narek, o apùnì le'ma leimo laga. Atì'nogo wo'narek lagama logolìk, lakhìgì hak he, he a'nogo yeke lo yeke hake hùko esi mep hake mene apot oba hùrek nikenem lakhìgì. Yeke lo yeke hake atì ùkùloak he, 7 ba, nen, aik ùkùlak oba re, 10 nen wùlìk, nen, ebe oake re, Ala etage wiik-weak hogo hagatùkwe helal kìlìk-kelek hogo waganek mene lakhìgì.

⁴ Nen, he atì asu aike elokoken mep hake, nen, aike elokoken kìbì-kìbì warek hake, mene laberek. Nen, alìlìke re, emas mene ho, helebeken hoponiken oko apik palharek mene etage permata ho, mutiara ho, waganek logolìk, oabùt weak hagatìk, pailak hakhouagalùk hagatìk, atì'nogo yanani nìlìk nikerek mene atì, isoak emas mene ba hinago ekimo hesogo welaga lakhìgì.

⁵ Nen, wene ebe hinago mene eilhaken oba helal yì'nogo waganek: “Apùnì kweangma mene yanani nìlìk negarek mene mel, inoabùt kolo weak motok hagatarek mene mel, obogat inagosa etage Pabel kain yì,” ìlùk helal waganek welaga lakhìgì.

⁶ Nen, he atì nen, Ala againapùrì mene mel, Yesùt ane yogoisìlìk negarek mene mel, inoasike mene inamep nikesik, apùnì nen anggur eken amusu nìlìk sìnì'nùk agaikarek atì hak, sìnì'nùk agasik were'ma lakhìgì. Atì'nogo lakhìgìrìk apik hogoratì.

⁷ Atì'nogo hìgìrìk, hogoratì lagima, malaikat a'nogo nen mel yogonete: “Nahalok hogoratì lagen. An nen, he atì ebe ho, yeke lo yeke hake ùkùloak 7 ba, nen, aik ùkùloa'ma 10 nen wùlìk mene, apot oba at he atì hùrek were'ma wolok nikerek mene atì ho, eperak hesik wene hinago werek mene hùkalogo pìlìngìrogo yogohesik o.

⁸ Yeke lo yeke hake hegen atì re, alep welagaike meneat he, yogotak elokwe lek hegen atì re, a'ma baga nen lagai wesigin o. Lagai waga halok, Ala nen alemathegein o. Nen, Ala nen kweang pogot oan elalhì'lek logolìk, sùesika it apùnì ineluk motok logouagalùk hanorinabigin mene hùgì, inetage helal waganek atì ba, it aike inetage helal wagane'lek mene nen yeke lo yeke hake atì ineileken hìlìk, it en he, Yeke lo yeke hake yì, alep welagaikesik en, elokwe lek agaike meneat he, hobuk weinam aga yì, nayùk e, ìlùk hogorasugun o.

⁹ Nen, wene yogohesigin yì hesik he, inoabùt hebelek werek mene nek hùthasak o. At yeke lo yeke hake atì, ùkùloak ebe 7 nen hegen atì ebe re, tom ebe 7 nen, at he atì kain welagarek oba werek mene hegen o. Nen, aike re, ap kaintek inetagepogot inebe 7 nen werek mene hesik hegen o.

¹⁰ Nen, it kaintek inebe 7 nen atì mene, inebe 5 arat kobok hogo pagama re, inebe pìre werek mene atì, aike arat kain logolìk, apùnì awe a'ma hisìlìk hagisek werek. Nen, aike hobuk halok weinam asigin. Weinam arìk, at en apùnì awe a'ma hisìlìk hagisek motok logogin lek. We, eki hamùlùgat logogin o.

¹¹ Yeke lo yeke hake alep welagaike meneat he, elokwe lek atì ebe re, kaintek inebe 7 nen amanogo arat kobok hogo pìlìk pìlìk waga lagaikasik, it 7 atì mene aike hobuk apotkwe kain arìk, ineki wenagasogo 8 bake haga'larìk, hobuk Ala nen alemathegein mene hegen o.

¹² Nen, aik ùkùloa'ma 10 nen wùlìk hegen atì ebe re, ap inebe 10 nen kain asugun mene oan werek mene hegen meneat he, it kain menhisamo, at yeke lo yeke hake a'nogo inom, we, o mo eil omakeat oba nek kain logolìk apùnì hagisek logogun mene hegen o.

¹³ It atì inetaùken omakeat logolìk, at yeke lo yeke bake a'nogo yogotì logolìk he: Nit kain logouagalùk menhinagama ninetagewerek welago mene atì, harat hetagewerek logoinogolùk esewerek hagago o, ìlùk yogota.

¹⁴ Atì'nogo esewerek hìlìk, Topa Eak a'nogo weim inom yabuogolùk ugun meneat he, at Topa Eak ebe apùnì kaintek inetagepogot mel, inetagewerek mene mel, obogat inoe etagewerek hesaksegarat ma re, againapùrì wenaginabik inayoko hesikomo inoabùt at hesik hùpùn hogo hagatarek mene amanogo, at werekwe arìk, inom en, at yeke lo yeke bake a'nogo agoromì inom mabenetsogoin o,” ìlùk yogonete.

¹⁵ At malaikat a'nogo nen atì'nogo yogonetesik, aike mel yogonete: “At he yanani nìlìk nikerek mene hake atì, ebe kain welagarek oba i hegen atì ebe re, apùnì obogat inùkùl etage lopok, inogat lopok, inawì lopok, inane lopok mene heileken isegen o.

¹⁶ Nen, aik ùkùloa'ma 10 nen wùlìk a'nogo ho, yeke lo yeke hake ebe a'nogo ho, inom en, he yanani nikerek mene atì, ebe inabìrethìlìk he, yì mene tì mene at mene helìgìk, ebe alulukwa heraksìgìk, ìlìk, ebe warogo heta nìkì logolìk, ato etu lolisogoin o.

¹⁷ Atì'nogo hagasugun atì re, Ala nen isike mene higit hogoat haga'lasuagalùk, at enat a'la akikerek mene atì, it ap kaintek atì ina'la kagalhomo, it inetaùken omakeat logolìk, it en he, at yeke lo yeke hake a'nogo yogotì logolìk, Nit kain ninetagewerek welago mene atì, hat kain hetagewerek logoinok o, ìlùk esewerek hìlìk, inom en, he yanani nìlìk nikerek mene a'nogo ebe wasugun atì.

¹⁸ Nen, he mene heileken hegen atì ebe re, ap kaintek inetagepogot kweangma mene obogat awe a'ma hisìlìk hagisek welagarek mene, o kota hùke mene egarek a'nogoat heileken hegen o,” ìlùk yogonete.