ABÌKAKAN 16 - Ala Ane Wene Ket Mene Warogo Wo'ninapike Wene

Ala nen a'mage inoba hìlìk weagarinapenem lakhasike wene

¹ Atì'nogo lakhigìrìk oba nen, opolik he, Ala awì wùrì'mo a'nogo nen, at ane hùkorogo it malaikat inebe 7 ba amanogo mel yogoisikenem nasuk holhì: “An Ala na'mage i negen isoak ebe 7 ba hinago mene arì kesalogo apùnì kweangma mene inoba pelabi lani o,” ìlùk yogoisike holhì.

² Yogoisikomo, it malaikat inebe 7 amanogo mene aike emakum Ala a'mage i negen hinago a'nogo mene aike kesalogo apùnì kweangma inoba pelabi waganem he, it apùnì hetakwe aike obogat inetawì wekelogo, yeke lo yeke hùko a'noga etage helal waganek a'nogo wanhìk, inetaùken sukwan at ebe hake hagarek a'nogo oba hìpìrethìgìk, ega mene hùgì, pot weak mene inobakwe wùlìpì laga lakhìgì.

³ Atì'nogo hìgìrìk oba nen, apolik he, it malaikat inebe 7 amanogo mene omakeat en atì'nogo pelabi wagasik oba nen, aike nen Ala a'mage i negen hinago a'nogo mene aike kesalogo i laut yekelek oba pelapenem he, i elokoken apùnì inoatenem inamep hake haga'laga logolìk he, yì mene tì mene i laut yekelek a'la eluk welagarek mene obogat wa'larìk laga laga lakhìgì.

⁴ Atì'nogo hìgìrìk oba nen, opolik he, it malaikat amanogo mene inebe pìre nen atì'nogo pelabi wagaikasik oba nen, aike nen Ala a'mage i negen hinago a'nogo mene aike kesalogo i elesikwe mel, nen i ebe hùko asi wagarekkwe mel, obakwe pelapenem he, i obogat elokoken mep aga laga lakhìgì.

⁵ Atì'nogo haga'laganem he, at malaikat i esewerek mene nen Ala mel yogote: “Ala hebe alep welagagitik, yogotak hesok motogat logolìk, keksek welagatek mene nen, apùnì ùkùm higit hogoat inoba hegen o.

⁶ It ap atì nen, hat hagainapùrì mene mel, hat hane yogoisagarek mene mel, inamep wulagasogo inoasukwama re, mep noagalùk wogisegen atì re, inoabùt obaat higit hogo wogisegen o, nopase,” ìlùk ìkì laga holhì.

⁷ Atì'nogo ikesi'mo nen, opolik he, Ala ako warogo loletarek oba nen mel ikenem holhì: “Ala homame motok api'mo, yì mene tì mene hagasusak elok enek logolìk he, ùkùm inoba hìgìk, kotìk, eberogoat higit hogo egetek a'nogo nen, atì'nogo hagaten o, nopase,” ìlùk ìkì laga holhì.

⁸ It malaikat amanogo mene inebe hìnagan oba atì'nogo pelapasik oba nen aike nen Ala a'mage i negen hinago a'nogo mene aike kesalogo mo ba lakhikenem he, mo aik en apùnì inoba halì negen nìkì logouagalùk, mo aik apik hagarogo hikomo, apùnì inoba halì negen nìkì laga lakhìgì.

⁹ Atì'nogo aik en halì negen inoba hùkorogo nikenem heinet watì logolìk, Ala a'mage inoba hìlìk weagarinabusak higit hogoat weagarinapì laga meneat he, at ebe hogorasuogolùk weak hagatì lagaika mene heraksìlìk, inoabùt hebelagì'lek logolìk, it en he, “Ala ebe nìkìna'lep e,” ìlùk, etage weagatoat welagaika isìgì.

¹⁰ It malaikat amanogo mene inebe 4 atì'nogo pelabi wagaikasik oba nen aike nen Ala a'mage i negen hinago a'nogo mene aike kesalogo yeke lo yeke hake hùko mene a'nogo kain welagarek obùlùk oba pelapenem he, o at kain logolìk hagisek welagarek oba obogat mùm aga laga. Atì'nogo mùm aganem, it apùnì heinet watì logolìk, inameli inaik en hùnethìlìk, mel ìkì lagaika: “Ninoumo on weak yoma nabìt o,” ìlùk,

¹¹ inoabùt inesogat logolìk weak hagatì lagaika mene heraksìlìk, inoabùt hebelagì'lek logolìk, it en he, “Ala ebe nìkìna'lep he,” ìlùk Ala pogot oba mene etage weagatoat welagaika isìgì.

¹² Atì'nogo werek kolek, it malaikat amanogo mene inebe 5 nen atì'nogo hagatasik oba nen, aike nen Ala a'mage i negen hinago a'nogo mene aike kesalogo, it ap inetagepogot o mo lagai wagare'ma mene wesuagalùk, i hùko etage Eperat oba pelapenem he, it wesugunkwe i ebe heresok ìkì laga.

¹³ Atì'nogo heresok ìlì'mo nen, opolik he, walo a'nogo ho, yeke lo yeke hake hùko a'nogo ho, Ala ane yogoisikerek mene salek apeliak ikerek mene a'nogo ho, inapelema nen mokareke inoabùt weak mene inebe 3 nen yagase hake mene wùlìbi waga laga.

¹⁴ Mokareke atì inebe re, Ibilit agoromì mene apùnì inoba louk i waganem hagasusak lek mene elalin hagatarek mene a'nogoat o. It atì'nogo wùlìbi wagaikasik he, Ala omame apì'mo yì mene tì mene hagasusak elok enek a'nogo awì we igin atì ba weim inom yabuogolùk, ap inetagepogot o yì awì tì awì atogorinabuogolùk, weim yoko laga lagaika isìgì.

¹⁵ Atì'nogo lagaikasi'mo nen, at Yesùt en mel yogonete: “Hasuk holin o. Apùnì yogot wanuogolùk hinagasogo wagaikarek atì hak, an atì'nogoat wesigin o. Atì'nogo waganem, apùnì inalulukwa were'ma inekalì agarek atì hak, hit atì'nogoat hinekalì asinogo ìlùk hinasu hepok ìkùogolùk tegelogo hìlìk logogun halok he, Ala nen hanothinapenem hina'la hai hakogoin o,” ìlùk yogonetenem holhì.

¹⁶ Nen, it Ibilit agoromì inoabùt weak mene amanogo nen, it ap kaintek amanogo o it apùnì Iberani mene inane ba etage Haremaketon egarek oba atì atogorogo hisikenem lagisìgì.

¹⁷ Atì'nogo hìgìrìk oba nen, opolik he, it malaikat amanogo mene inebe 6 oba atì'nogo hagatasik oba nen, at aike nen, Ala a'mage i negen hinago a'nogo mene aike kesalogo pogot abel makwe ohena obùlù'mo pelapenem he, Ala awì wùrì'mo at kain welagarek obùlùk oba nen ane hùkorogo mel ike: “Arat elùgùn warogo haga'laga o,” ìlùk ike.

¹⁸ Atì'nogo ikenem he, eilabùt hobugalep yararathìgìk, okuku ane pak ìlìk en, ane lulu lagìk, lugul inayùk mene apùnì Ala nen elalinapike nen hùlì yogotak hùlì, lugul atì hake aike langlangat hìgì'lek mene atìat lang-langat hìgìk, ìkì laga lakhìgì.

¹⁹ Atì'nogo ikenem he, o sili hùko a'nogo kweang pak hogo 3 mogologo haga'lagìk, apùnì inùkùl etage lopok Ala ebe inokot mene inawì sili lopok obogat tukwak-lapuk hogo yeloken tagalagìk, ikenem, Ala nen he, “An na'mage apik anggur amusu hinago negen a'nogo, at o Pabel hùko a'nogo wogosigin,” ìlùk abok yogosike mene atì a'la ebetesik, wogotì laga hìgì.

²⁰ Nen, kweang i ekenkwe obogat mel, tom obogat mel, lek agìk,

²¹ pogot oba nen moso ligiken hùko mene ebe lopok ekin he, 50 kilo mene pi waga logolìk, apùnì inebe inoatìk, ìkì laga. Atì'nogo inoatenem, it en ìkì logolìk he, “Moso lìgìken weak ninoarì'logo yì re, Ala ebe nìkìna'lep he,” ìlùk etage weagatoat welagaika lagisìgì.