ABÌKAKAN 15 - Ala Ane Wene Ket Mene Warogo Wo'ninapike Wene

Ala nen a'mage elùgùn kobok apùnì inoba hisegein mene malaikat inebe 7 nen wogisikenem lagisasike wene

¹ Neileken atì'nogo lakhìgìrìk oba nen, opolik he, apùnì nen hùthoagalùk, elalin mene aike hùko mene inayùk hake yì'nogo pogot oba weinam aganem lakhìgì. Ala a'mage elùgùn kobok apùnì inoba hìlìk weagarinabigin atì nen he, ineki 7 ba weagarinabigin mene, malaikat inebe 7 nenat weinam aganem lagisìgì.

² Atì'nogo hìgìrìk oba nen, opolik he, i laut elokoken muli inapùnak mene etu inom ìpìkwe-apìkwe yekelek mene lakhìgì. Atì'nogo hìgìrìk lakhìgì hak he, apùnì aike inetaùken yeke lo yeke hake a'nogo mel, sukwan at ebe hake hagarek a'nogo mel, inoba hìpìrethìlìk hogorinapì'legat, nen etage ineki wenagasogo helal waganek mene a'nogo wanhì'legat, hagatì lagaika ba inomame agaikasik, pìkon gitar hake Ala nen wogisikomo inekimo wolok, i laut yekelek atì esakokwe metek were'ma lagisìgì o.

³ Atì'nogo logolìk, wùnì at Musa Ala atitigeke a'nogo ho, Topa Eak a'nogo ho, eperak inawùnì watì logolìk mel ìkì lagaika: “Ala ninopase, u a e, Hat homame api'mo re, u a e, Yì mene tì mene hagasusak ene'ma re, u a e, Elalin hùkorogo inayùk mene nek hagatetek, u a e. Hat yì apùnì tì apùnì inopase Hetagepogot logolìk, u a e, Higit hogo nek hagarinapetek, u a e, Hano nek hagarinapetek, u a e, Ninopase, u a e.

⁴ Ninopase Hetagepogot hat haligat keksek logolìk, u a e, Apùnì ùkùm inoba hìgìk, kotìk, ìkì logolìk, u a e, Apùnì obogat ineilhanem, u a e, Eberogoat motok hagaten, u a e. Apùnì inùkùl etage lopok obogat, u a e, Hawe a'ma ki wìrìk, u a e, Ineitep awì yagasogo, u a e, Hogothapìk, hai wathapìk, ikenem, u a e, It apùnì sanì hak en hat inayù'lek logolìk, u a e, Hogothapì'lek kamo usak, u a e, Lek, u a e,” ìlùk wùnì watì lagaika holhì.

⁵ Atì'nogo hìgìrìk oba nen opolik he, pogot oba Ala awì wùrì'mo kwe hù'laganem a'la re, at Ala ebe welagarek ìlùk, o su mene wùrìk a'nogo were'ma lakhìgì o.

⁶ Atì'nogo kwe hùrìk were'ma re, it malaikat inebe 7 nen inasu kut lìgì su hake etage lenan elokoken hùrùl-herelsek mene laberek, nen, sìng ìtarek hak, emas mene inamigoak oba laberek mene, Ala nen eki 7 ba apùnì weagarinabigin mene wolok wùlìbi wagaika lagisìgì.

⁷ Atì'nogo wùlìbi wagaikama re, it Ala nen elalinapikomo ineluk welagaikarek mene inebe 4 amanogo mene aike nen isoak ebe 7 emas mene hagarek oba Ala eluk motok welagarek mene a'mage i negen hinago mene, Ala nen it malaikat inebe 7 ba amanogo wogisìkì laga lakhìgì.

⁸ Wogisikenem, Ala awì wùrì'mo a'nogo Ala omame apik hogoratarek mene inayùk hake a'nogo etu so'le negen pese ikomo re, it malaikat inebe 7 amanogo nen Ala nen apùnì weagarinabigin a'nogo elùgùn kobok weagarinapì'lek werek kolek, apùnì aike Ala awì wùrì'mo atì kìkì lagaika isìgì motok lek o.