ABÌKAKAN 14 - Ala Ane Wene Ket Mene Warogo Wo'ninapike Wene

At Topa Eak ho, againapùrì telinapike mene ho, lagisasike wene

¹ Atì'nogo lakhìgìrìk oba nen, opolik lakhìgì hak he, at Topa Eak a'nogo tom Sion oba metek were'ma lakhìgì. Atì re, at ebe mel, it apùnì inebe 144.000 nen, at Topa Eak ho, opase ho, eperak inetage it atì inebe lopok ineilha ba helal waganek mene mel, inom were'ma lagisìgì.

² Atì'nogo logolìk, inane pogot oba nen he, i hùt hùko mene ane hake ìgìk, okuku ane hùkorogo ikerek hake ìgìk, it apùnì aike gitar watarek mene nen ebe watenem ane ikerek hake ìgìk, inane apik ikenem nasuk holhì.

³ Atì'nogo inane apik ìkì logolìk, Ala ebe kain welagarek obùlùk oba werek kolek, it at en elalinapike mene aike inebe 4 en amanogo mel, ap inalùgetek amanogo mel, ineilhanem etawì ket mene helalogo it apùnì hetakwe yakùlhì'lek inokot, we, it apùnì inebe 144.000 kweangma nen arat telinape mene amanogo nek inelumo watì lagaika inane holhì.

^4-5 It apùnì atì inebe re, tegelek logouogolùk, hìmì inom nogo ìgì'lek logolìk, inape ba nen inapeliak aike egare'legat, nen, apùnì aike nen he, “It atì weak aike hagatama,” ìlùk ùkùm inoba housak legat mene, logolìk, Topa Eak a'nogo kwe komakwe laga halok, opolik nikenem, sùpùrùk ebe oan werek kolek, lilu tak nekarek atì hak, Ala nen yì apùnì tì apùnì ina'la nen kìgìlogo inoko palogo telinapikomo, it inebe Ala ho, Atopa ho, hisìlìk, were'ma isìgì o.

Malaikat inebe 3 mene lagisasike wene

⁶ Atì'nogo hìgìrìk oba nen, opolik he, at malaikat aike wene hano wene motok logogin mene apùnì kweangma mene inùkùl etage lopok, inane lopok, inogat lopok, inaua lopok, yogoisìlìk pogot obakwe purogo nikenem lakhìgì.

⁷ Atì'nogo nìkì logolìk, ane hùkorogo mel ìkì laga: “Ninopase Ala nen ùkùm apùnì inoba hìgìk, kotìk, igin a'nogo, arat hakok i waga atì nen he, Ala pogot mel, kweang mel, i laut yekelek mel, i elesi agei obogat mel, elalhike mene a'nogo hinayùk hogo logolìk, hinetaùken at oba hìpìrethìlìk, hogoratì logoino o,” ìlùk ìkì laga lakhìgì.

⁸ Atì'nogo ikesik oba nen opolik he, at malaikat aike wagasik, mel ikenem nasuk holhì: “Apùnì aike nen it aike sìnì'nùk arìk, agasabu nen pailak haksìkì logouagalùk, anggur eken amusu wogisagarek atì hak, it apùnì o kota Pabel mene agasabu nen apùnì inùkùl etage lopok en pailak haksìkì logouagalùk, ina'la kagalharek mene a'nogo, inebe arat yeloken tagalagaika, yì heing!” ìlùk ikenem holhì.

⁹ It malaikat inebe pìre atì'nogo egasik oba nen, inopolik malaikat aike wagasik, ane hùkorogo mel ikenem holhì: “Hit aike yeke lo yeke hake hùko atì mel, ebe hake hagarek sukwan atì mel, hinetaùken inoba hìpìrethìlìk hogorinapesip, hinebe silorogo at etage palek hineilhaken oba he a? Hineki ba he a, wanhep mene hùgì,

¹⁰ apùnì nen, i inom lek, we anggur eken amusu nek ale weak hinatharek atì hak, Ala a'mage hit etawìthinapì'lek, ùkùm ning hogo hinoba hegein o. Atì'nogo hinoba hìlìk, nit malaikat Ala hesik welagorek mene mel, Topa Eak a'nogo mel, nineilhanem hinebe, etu mel, hetalì al hake obasi weak mene etage belerang mel, inom-inom nikere'ma atoma lakhikamo, heinet wato motok logogun o.

¹¹ Atì re, hit hinetaùken yeke lo yeke hake atì mel, sukwan at ebe hake hagarek atì mel, inoba hìpìrethìlìk hogorinapesip, hinebe gnomgo etag'e palek wanhep mene hùgì atì'nogo lakhikamo, likene motok, hùako motok, let walogo hano aike welagì'lek, hinoba etu aik en heinet wato kolek, hinogat hule lagaiko motok logogin o,” ìlùk ikenem holhì.

¹² Wene yì hesik esin haganunak ho, Ala againapùrì at ane hologo higit hogo hagatì logolìk, hinetaùken Yesùt oba hìpìrìk welagasep mene atì, hinepe morogo logousak o.

¹³ Wene atì'nogo ikenem holhìrìk oba nen, opolik he, pogot oba nen ane mel yogonetenem nasuk holhì: “Yogotak apùnì ninoe Etagepogot inom hutik logolìk, at hesik hano hagatenem inoasugun mene, ina'la motok hai hakogoin o, ìlùk helal waganogo heino o,” ìlùk yogonetenem Ala Areagùn pogot oba nen ane hùkorogo mel yogonete: “Atì eberogoat o. It apùnì atì Yesùt hesik set kwìl-kwal hogo hagatì lagaukwa mene atì, ebe hagasukwa mene wolok logoin atì nen, set hano walogoin o,” ìlùk yogonetenem nasuk holhì.

“Kweangma awì yago eken arat wurik agama palusak werek,” ìlùk isukwa wene

¹⁴ Atì'nogo yogonetesik oba nen, opolik he, ohena kut mene were'ma, ap ebe abat ta'lasi wagaike mene a'nogo hake mene kare-kare emas mene ùkùl oba ugu, nen, karok ekat apik hanì'nùksek mena ekim hesogo logolìk, ebe ohena a'nogo ba hùrek were'ma lakhìgì.

¹⁵ Atì opolik he, at malaikat aike Ala awì wùrì'mo nen wùlìbi wagasik, ane hùkorogo, at ohena ba hùrek welaga mene a'nogo mel yogote: “Kweangma eken arat wurik agama ebe palusak oba arat asi wagama atì nen he, hakarok atì wolok he, yogotak eken pali pin o,” ìlùk yogotomo,

¹⁶ at ohena oba hùrek welaga mene a'nogo akarok a'nogo wolok he, kweangma eken pali pike lakhìgì.

¹⁷ Atì'nogo hìgìrìik oba nen, opolik he, at malaikat aike pogot oba Ala awì wùrì'mo nen, akarok ekat apik hanì'nùksek mene wolok wùlìbi waganem lakhìgì.

¹⁸ Atì'nogo hìgìrìk oba nen opolik he, at malaikat aike etu esewerek mene Ala ako warogo loletarek oba nen wagasik, at malaikat akarok ekat apik mene wolok pike mene a'nogo ane hùkorogo mel yogotenem holhì: “Kweangma anggur eken arat wurik agama palusak werek atì re, hakarok atì wolok, pali pin o,” ìlùk yogote.

¹⁹ Atì'nogo yogotomo, at a'nogo akarok wolok kweangma pikesik, anggur eken kweangma mene ageiyo ba nen palogo eken sagalharek mene obùlùk hùko mene a'la po lakhikenem hìgì. Eken sagalharek oba atì ebe re, Ala nen a'mage hùkorogo inoba hikerek atìat o.

²⁰ Nen, anggur eken palek atì kalek, o sili abel etakwe sagalhenem he, eken sagalharek mene atì a'la nen, mep i elesi negen wùlogo hùlì 2 meter hake etenogo lagaikesik en, hùrogo re, hùlì 300 kilometer walegat laganem lakhìgì o.