ABÌKAKAN 13 - Ala Ane Wene Ket Mene Warogo Wo'ninapike Wene

Yeke lo yeke hake pìre hùkotek mene weinam aganem eileken lakhasike wene

¹ Atì'nogo lakhìgìrìk oba nen, opolik he, yeke lo yeke hake hùko mene aike aik ùkùloak oba 10 nen wùlìk, nen ùkùloak he, 7 ba mene, i laut yekele'ma nen wùlibi waganem lakhìgì. Aik 10 atì, ebe lopok oba re, kare-kare ap kaintek ìksagarek atì hak ugu, nen ùkùloak 7 ba atì, ebe lopok oba Ala etage wiik-weak hogo hagatùkwe helal waganek welaga lakhìgì.

² At yeke lo yeke hùko mene wùlìbi waganem hìgì atì ebe re, yeke negen etage harimau hake. Nen, esok he, paik ìnùm hake hùko mene etage beruang atì esok hake. Nen, ape re, yeke lo yeke hake etage singa ape hake mene atì'nogo weinam agasi'mo re, at walo hùko a'nogo nen, yeke lo yeke hake atì yogotì logolìk, “An kain nomame apik logolìk, yì mene tì mene esewerek welagirek a'nogo hak, hat an nobùlù'mo kain logoinogolùk menhagagì o,” ìlùk yogotenem holhì.

³ Holhìrìk lakhìgì hak he, at yeke lo yeke hake hùko a'nogo ùkùloak amanogo mene aike wasukwama, ebe wa'lasusak meneat he, hano lek agaikesik agapùt enek were'ma, apùnì obogat ineileken hìlìk hogorarìk, at opolik motok laganem isìgì.

⁴ At walo a'nogo nen, at yeke lo yeke hake hùko a'nogo yogotì logolìk, “Hat kain homame werek logoinok,” ìlùk menhike atì nen, it apùnì inetaùken walo a'nogo mel, yeke lo yeke hake hùko a'nogo mel, inoba hìpìrethìlìk hogorinapì logolìk mel ìkì lagaika: “Walo hùko yì eperak higit he, sa akegep, u a e, Eperak higit aike lek, u a e. Sa hak en at eperak weim yabusak akegep, u a e, Mea, u a e,” ìlùk ìkì lagaika isìgìl.

⁵ Atì'nogo iko kolek, o mo lagagìk, pìgìk, iko kolek, tugi 42 holelìk laga kolek, at yeke lo yeke hake hùko mene a'nogo okawerek en hogorakìgìk, Ala etage weagarogo hìgìk, ìkì logolìk, apùnì awe a'ma hisìlìk hagisek logouagalùk walo hùko a'nogo nen esewerek hikomo lakhìgì.

⁶ At atì'nogo logolìk, at en Ala ebe mel, etage mel, at aua pogot oba mel, it o pogot oba welagaikarek mene mel, obogat inetage weagatì laga hìgì.

⁷ Atì hagat, apùnì inùkùl etage lopok, inane lopok, inogat lopok, inawì lopok, obogat at en awe a'ma hisìlìk hagisek logouagalùk menhikomo esewerek arìk, Ala againapùrì inom weim yapì logolìk, mabenetsìkì laga hìgì.

⁸ At Ala nen he, pogot kweang oan elalhì'lek logolìk, “It atem ineluk motok logouagalùk hagarinabigin,” ìlùk, inetage helal waganogo at Atopa Eak, it hesik wasukwa mene a'nogo arùesika ba hesike. It inetage atì'nogo helal waganogo hesike mene hùgì, yeke lo yeke hake hùko a'nogo hogoratì'lek werek kolek, apùnì kweangma welagaikarek mene aike obogat inetaùken yeke lo yeke hake hùko a'nogo ba hìpìrethìlìk hogoratì lagaika isìgì.

^9-10 Ati nen he, wene yogohisegein yì, hit hinasuk holusak halok he, hanorogo holini o. At aike ebe hele warogo housak obaat, hele warogo hogoin o. Nen, at aike karok oba wasusak obaat, karok oba wasugunat o. Atì'nogo hagasugun atì nen, ebe esin he, Ala againapùrì mene halok, inetaùken at oba hìpìrethìlìk inepe morogo logousak atìat o.

¹¹ Atì'nogo hìgìrìk oba nen, opolik lakhìgì hak he, yeke lo yeke hake hùko hunigat mene aike aik ùkùloak oba topa aik hake pìre wùlìk, nen ane ikenem he, walo ane hake mene, kweangma nen weinam aganem lakhìgì o.

¹² Weinam agasik, yeke lo yeke hake alep mene a'nogo esewerek logolìk hagatì laga mene, at yeke lo yeke hake hobuk mene atì esewerek agasik, at en apùnì yogoisìkì logolìk he, “Apùnì kweangma welagasep mene obogat, at yeke lo yeke hake alep mene a'nogo wasukwama re, ebe wa'lasusak mene se agaike mene atìat hinetaùken oba hìpìrethìlìk hogorasusak o,” ìlùk ane ning hogo yogoisikenem holhì.

¹³ At yeke lo yeke hake hùko hobuk weinam aga mene a'nogo, apuni nen at ebe hùthoagalùk, it ineilhanem elalin mene hagatì logolìk, pogot oba nen etu pelabì waganem lakhìgì.

¹⁴ Atì'nogo aike hagatì laga atì, at yeke lo yeke hake hùko alep mene a'nogo nen, elalin mene at eilhanem hagatì logouagalùk esewerek hike mene a'nogo ebe hagatì logolìk, apùnì kweangma welagaikarek mene apeliak lalinapì laga. Atì'nogo lalinapì logolìk, it apùnì amanogo nen, yeke lo yeke hake hùko karok oba wasukwama ebe wa'lasusak mene apotkwe se agaike mene a'nogo ebe hake hagarogo sukwan aike wusuagalùk yogoisikomo ebe wùta lakhìgì.

¹⁵ Atì'nogo wùtama, at yeke lo yeke hake hobuk mene a'nogo nen sukwan a'nogo eluguthikenem ane ìkì laga lakhìgì. Atì'nogo ìkì logolìk, it apùnì inetaùken sukwan a'nogo oba hìpìrethìgì'lek mene hùgi inebe motok inoasigìlùk weim yoko hikomo inoarìk laga lagaika isìgì.

¹⁶ Atì'nogo inoato kolek, at yeke lo yeke hake hobuk mene a'nogo nen he, apùnì kaintek mel, keputek mel, ineilmo wùlalhak mene mel, inelageik mene mel, inatitigeke mene mel, it inalepma mene mel, apùnì nen inetaùken wekelogo silorogo saleken kelisagarek atì hak, it obogat inebe lopok mel yogoisìkì laga: “Sukwan yì etage helal waganek mene yì, hineilha ba he a? Hineki ebekwe he a, keluageip en wanini o.

¹⁷ Hit en, at etage helal waganek mene he a? At he, etage hesik ineki wenago mene he a, wanhep mene halok, yì mene tì mene oko palìgìk, it aike inoba oko wanhìk, ìkì logousak o. Atì'nogo meneat he, it apùnì aike wanhì'lek mene halok he, atì'nogo wanhì logousak motok lek o,” ìlùk ane ning hogo yogoisìkì laga lakhìgì.

¹⁸ Atì nen he, wane atì hesik, hit hinepe hebele'lek logousak motok lek o. At he, an nen oabùt hebelek halok he, yeke lo yeke hake atì etage hesik, ineki 666 oba wenata atì, ebe re, ap aike etage mene wenatama atì nen he, hùthasak o.