ABÌKAKAN 12 - Ala Ane Wene Ket Mene Warogo Wo'ninapike Wene

He mene ho, walo ho, eileken isasike wene

¹ Atì'nogo hìgìrìk oba nen, opolik lakhìgì hak he, apùnì nen hùthoagalùk pogot oba elalinat hagasusak lek mene hakorogo hagatenem yì'nogo lakhìgì. He mene aike tugi ba esok hìlìk asu negen mo mene laberek, nen hesagal 12 mene ùkùloba kare-kare negen ugu mene lakhìgì.

² He atì eak a'ma mene arat takasak higitmo nogo nen he, heinet watì logolìk, ane kwe ìkì laga.

³ Atì'nogo heinet wato kolek, apùnì nen hùthoagalùk pogot oba elalinat hagasusak lek mene hùkorogo hagatenem aike lakhìgìat. Walo ogat mep hake hùko mene ùkùloak he, 7 ba, nen, ùkùloa'ma re, aik 10 ba wùlìk, nen, kare-kare 7 nen ap kaintek ìksagarek atì hak ùkùloba lopok ugu mene welaga.

⁴ Atì'nogo logolìk, agakùm oba hesagal pogot oba mene 3 mìkìlogo hìlìk, pìre herakhìlìk, aike lisogo kweangma pelaksa wagasik, he a'nogo eak takikenem haum hogo nagalùk elokoma kagalek welaga.

⁵ Atì'nogo werek kolek, apùnì nen sìge lùk wolok warn konharek atì hak, at he a'nogo eak he, sìge lùk posie omaken mene wolok apùnì inùkùl etage lopok obogat awe a'ma hisìlìk omamerogo hagisek logogin mene takike. Atì'nogo tato kolek, aremnogoat omalik a'nogo telogo wolok Ala kain welagarek oba obùlùk a'nogo elokoma hei laganem lakhìgì o.

⁶ Atì'nogo wolok laga kolek, at he a'nogo o leimo apùnì le'ma logousak oba, Ala nen obùlùk aike tegelogo hisasike ba atoma hese lagasik were'ma serogo werek kolek, eki 1.260 nen welaga lakhìgì o.

⁷ Atì'nogo lagasik werek kolek, pogot oba weim kagalaganem lakhìgì. Malaikat Mikael agoromì inom en walo a'nogo wasuogolùk ikenem, at a'nogo agoromì malaikat at werekwe mene inom agaikasik weim yapì lagaika.

^8-9 Atì'nogo yapì logolìk he, at walo hùko a'nogo mabenethagasik, at ebe mel, malaikat at agoromì mene mel, “O pogot oba yoma logousak motok lek o,” ìlùk kweangma pelaksa waganem isìgì. Walo hùko atì, etage re, Ibilit ìgìk, Setan ìgìk, egarek mene holoat en apùnì obogat lalinaperek mene a'nogoat o.

¹⁰ Atì'nogo mabenetsìlìk, pelaksa wagama, pogot oba nen inane hùkorogo mel ikenem holhì: “At atì nen Ala eilhanem apeliagat it ninerùgì ninagaiya'lak likene hùako ùkùm inoba hiko motok welagarek mene a'nogo arat mabenetsìlìk ebe wulaksaga atì hano o. Ninopase Ala Etagepogot kain logolìk, telninabuagalùk Karìsùt menhesike a'nogo, yì mene tì mene obogat esewerek logolìk, eperak inomame agaikasik telninabìk, inawe a'ma arat hinaga yì o.

¹¹ It ninerùgì ninagaiya'lak atì inokawerek inebe inetawì agì'lek, Ninoata halok he, hanoat o, ìlùk nikenem inoata. It atì re, Topa Eak amep wulagasogo wasukwa atì ba ho, it en Ala ane ebe wene atì pak hogo yogoisìlìk nìkì lagaika atì ba ho, Ibilit a'nogo arat mabenetsaga atì o.

¹² Atì nen he, hit pogot oba welagasep mene obogat yì sani! Hina'la hai hakìkì logoino. Hina'la hai hakiko kolek, hit kweang'ma mene ho, i laut yekele'ma mene ho, enek he, Ibilit a'nogo hinoba pelaksa wagama, at eki logogin mene hùthikesik, at en he, Neki hamùlùgat enek logogin atì nahalok, ìlùk a'mage lagaikesik weagathinabigin atì nen he, eigo! Netawìlak e,” ìlùk ikenem holhì o.

¹³ Atì'nogo pelabi wagaikomo logolìk, “An yì'nogo kweangma pelakhani wagama welagì” ìlùk hùthikesik nogo nen he, he eak ap takike mene a'nogo wasigìlùk musok niko.

¹⁴ Atì'nogo niko atì nen, at agaserogo o apùnì le'ma logouagalùk, Ala nen obùlùk tegelogo hisasike ba atì purogo loagalùk, sùe pìm hùko mene ogolabì mene wogotomo purogo atoma lagasik, Ala nen serogo werek kolek, o mo lagagìk, pìgìk, iko kolek, 3 tahun setengah welaga hìgì.

¹⁵ Atì'nogo were'ma, at walo a'nogo nen, at he a'nogo i hu nen wolok loagalùk, i apelema nen elesi hùko motok walogo, he a'nogo ebe werekwe higit hogo lakhìkì laga.

¹⁶ Atì'nogo lakhike meneat he, apùnì nen, he a'nogo ebe telu hak, kweang en ape pak hogo i a'nogo a'la pelapenem he, lek aga laga hìgì.

¹⁷ Atì'nogo pelapenem he, walo a'nogo a'mage he a'nogo oba hìlìk, apùnì he a'nogo nen tagokwe mene hetakwe Ala nen wene ninasuk wasike wene hologo higit hogo hagatìk, Yesùt en hagasike wene pak hogo yogoisìgìk, egarek mene inoasigìlùk inaweim kabelhesik,

¹⁸ ebe i laut yekelek esakoma, atoma lagasik metek were'ma lakhìgì o.