ABÌKAKAN 11 - Ala Ane Wene Ket Mene Warogo Wo'ninapike Wene

“Ap inebe pìre Ala ane yogoisiko were'ma inoasugun,” ìlùk yogosike wene

¹ Atì'nogo yogonetasik hobuk he, a ìlìreke sìge lùk hake mene wo'netasik he, mel yogoneta: “Ala awì wùrìk mel, at ako warogo loletarek mene obùlùk a'nogo mel, ìlìreke ba walhìgìk, apùnì Ala awì wùrìmo at hogorasi kìlì'lùgì mene hùgì obogat heki wenaginapìk, i lan o.

^2-3 Atì'nogo heki wenasi legein meneat he, o silimo Ala awì wùrì'mo abel etakwe nek he, Ala nen it apùnì at ebe inokot mene wogisikomo, it en o silimo aroma mel, Ala okawerek awì kota arì mel, inesok en al lebelho kolek tugi 42 nen, ineki 1260 nen, logogun atì nen he, hat en walhasak motok lek o. It atì'nogo werek kolek, an nen ap inebe pìre su pelagwì su labetarek atì hak laberek logolìk, an nane pak hogo yogoisìkì logouagalùk laksa wesigin o,” ìlùk yogonete.

⁴ It ap inebe pìre atì re, e saitun pìre mel, esage kìalhùkwe esok telik pìre mene mel, ninopase Etagepogot yì mene tì mene obogat esewerek welagarek mene a'nogo elokoma welagaikarek a'nogo, it ap atìat o.

⁵ Nen, it apùnì nen, “It weagarinabuok,” ìlùk ugun halok he, etu it ap pìre atì inapelema nen wùlìbi waga logolìk, it inaselei mene atì inebe halì negeinat o. Halok, sa nen, it weagarinabigìlùk igin halok he, wasusak obaat atì'nogo wasugun o.

⁶ Nen, it en Ala ane yogoisìkì logolìk, “Moso pogot oba nen pi wesusak lek,” ìlùk elogat yogotìk, i obogat mep asuagalùk elogat hagatìk, nen ina'la walok akogoin oba, “Apùnì kweangma mene yì ou tì on inoba houok,” ìlùk elogat on ere inoba hìgìk, ìkì logouagalùk, Ala nen esewerek hisikomo atì'nogo hagasugun isìgì.

⁷ Wene atì'nogo arat yogoisaga halok, yeke lo yeke hake hùko mene aike a'ma baga nen inoba lagai wìrìk, inom yapì logolìk, mabenetsìlìk inebe inoasigin o.

⁸ Atì'nogo warogo hisìlìk, inebe warek he, o kota kwe ebekwe ninoe e ba menhìlìk wasukwa ba atoma hisogoin o. O kota atì, o Sorom ho, Mesit ho, oba lìtarek a'nogoat o.

⁹ Atì'nogo hisamo were'ma, apùnì inùkùl etage lopok, inane lopok, inogat lopok, inawì lopok, inebe obogat en warek salinapì'lek heraksìlìk, ineileken wùthalùk-pelhalùk iko kolek, ineki 3 logopik en ineki aike ba hùlì likene hùlì logogun.

¹⁰ Atì'nogo werek kolek, apùnì kweangma mene inebe obogat en ìkì logolìk he, “It ap pìre wene yogonisìkì lagaika mene yì nen, yì aik tì aik apik ninoba hìkì lagaika mene a'nogo inebe hanoat inoata,” ìlùk ina'la hai apik hakìkì logolìk, pesta hagatìk, yì mene tì menu oko lek it aike nen aike wogisìgìk, wok-wok ìkì logogun.

¹¹ Ineki 3 atì'nogo hagatì logopik, ineki aike likene nen atì'nogo hagato were'ma, Ala Areagun inelugurinaperek mane a'nogo it ap pìre atì ina'la kìlìk, inelugurinabìk menhisikenem, apùnì obogat ineileken kìlìk he, inayùk apik asugun o.

¹² Atì'nogo inayùk arìk werek kolek, pogot oba nen ane hùkorogo it ap pìre wene yogoisìkì logogun mene a'nogo mel yogoisegein: “Lagai we'ni o,” ìlùk yogoisikenem, it ap a'nogo inaselei mene amanogo ineileken lagisek werek kolek pogot oba ohena a'la lagaikenem isìgì o.

¹³ O atì sat he, lugul hùko inayùk mene aike lang-langat hìkì logolìk, o kota atì ebe 10 ba mìkìlogo hìlìk, hùkokwe herakhìkì logolìk, omakeat aike motok mesa'lapuk hogo hìkì logolìk, apùnì inebe 7.000 nen inoatenem, it hetakwe inoatì'lek mene inayùk apik arìk, it en he, “Ala pogot oba mene, nayùk e,” ìlùk hogoratenem isìgì o.

¹⁴ Atì'nogo hagatenem isìgì atì, lakhani! Weagarinabigin mene a'nogo re, ineki pìre ba arat weagarinapasik, opolik aike hepogat weagarinabigin mene weregat o.

Pikon ane elùgùn oba anethesukwa wene

¹⁵ Atì'nogo isìgìrìk oba nen, it malaikat inebe 7 nen amanogo, inebe 6 oba inapìkon arat anethagasik oba nen, aike apìkon anethikenem he, pogot oba nen inane hùkorogo yì'nogo ikenem holhì: “Alep apùnì kweangma mene nen inawe a'ma hisìlìk hagisek welagaukwa mene re, yogotak ninopase Etagepogot Ala nen ninoe Karìsùt en telninabuagalùk menhesike mene a'nogo eperak en inawe a'ma arat hinagasik, at Karìsùt en ha'nisek moto'-motok logogin o,” ìlùk ìkì lagaika.

¹⁶ Nen, it inalùgetek inebe 24 en Ala era'lu kain inobùlùk oba welagaikarek mene amanogo inelokwe sogoum Ala awe a'ma kìlìk hogoratì logolìk mel ìkì lagaika:

¹⁷ “Ala Ninopase, u a e, Hat homame apik, u a e, Alep welagagitik yogotak motogat welagatek atì ba, u a e, Yogotak hat hebe kain Hetagepogot logolìk, u a e, Apùnì obogat hawe a'ma arat hisegetik, u a e, Hagisek logogin atì nen, u a e, Hai wathapì lago, u a e.

¹⁸ Apùnì inùkùl etage lopok obogat en, u a e, Inanini hoba hìkì lagaika mene, u a e, Hat en hanini inoba arat hegein atì, u a e. Atì'nogo inoba hìkì logolìk, u a e, Apùnì wa'lagaukwa mene aike, u a e, Ùkùm inoba hìkì logolìk, u a e, It aike ùkùm inoba kosigin mene, u a e, Hat hane yogoisagarek mene mel, u a e, Hagainapùrì inetagewerek, inetage lek obogat, u a e, Hat inayùk hogo logolìk, u a e, Hane wanho welagaikarek mene hesik, u a e, Oko arat wogisegein atì, u a e. It aike o kweangma weagathesukwa mene, u a e, Hat en it arat weagarinabigin atì, u a e. Atì'nogo hagasigin atì nen, u a e, Hai wathapì Iago o, u a e,” ìlùk etawì watì lagaika holhì.

¹⁹ Atì'nogo ikenem isìgìrìk lakhìgì hak he, pogot oba Ala awì wùrì'mo kwe hù'laganem he, Ala nen wene ninasuk wasike wene helal waganek peti a'la kalek welagaike a'nogo weinam aga. Atì'nogo weinam aganem he, eilabùt hobugalep yararathìgìk, okuku ane pak ìlìk en ane lulu lagìk, lugul lang-langat hìgìk, moso lìgìken hùko mene teleki waganogo nìkìk, ikenem lakhìgì o.