ABÌKAKAN 10 - Ala Ane Wene Ket Mene Warogo Wo'ninapike Wene

Malaikat aike helal waganek ekimo wolok waganem hasike wene

^1-2 Atì'nogo isìgìrìk oba nen hobuk he, at malaikat omame apik mene aike asu negen ohena mene laberek. Nen, ùkùloak oba uare walìngìk. Nen, elokoken he, mo hake. Nen, esok he, etu amulok mot lagaikerek hake mene, helal waganek ikìlìk eagalak mene hukalek ekim wolok pogot oba nen pi wagasik, esok ebekwe re, i laut yekelek oba hìgìk, nen esok peikkwe re, kweang oba hìgìk, ìkì logolìk,

³ yeke lo yeke hake etage singa atì mene ane kwe ikerek atì hak ane hùkorogo ikenem, wene oko re, okuku ane 7 ba nen yogotì lagaika.

⁴ Okuku ane atì'nogo ikenem he, an helal wanigìlùk ìgì meneat he, pogot oba nen mel yogoneta: “Okuku ane 7 nen ikenem hasuk holhen mene atì, helal wanusak lek o. We, ha'la kamo usak,” ìlùk yogonetama holhìrìk he, kamo ìgì.

⁵ Atì'nogo yogonetama kamo igìrìk, lakhìgì hak he, malaikat esok hetakwe i laut yekelek oba, nen, hetakwe kweang oba, hìlìk, metek were'ma lakhìgì a'nogo eki ebekwe pogot oba higit lìakhìlìk he,

⁶ Ala nen pogot ebe mel, oba welagarek mene mel, kweang ebe mel, oba welagarek mene mel, i laut yekelek mel, a'la welagarek mene mel, obogat elalhikesik eluk motok welagarek mene etage ba mel ìlùk hopuk palhenem holhì: “Ala nen hagasigin atì, tì sat ìgìk, tì sat ìgìk, abìak logogun lek o.

⁷ We, malaikat inebe 6 en inapìkon anethagasik oba nen, aike apìkon anethegein atì anethikenem he, at Ala nen wene a'la wene it ap at atitigeke mene, ane yogoisìkì lagaukwa mene amanogo yogoisìkì logolìk he, Hobuk an tì'nogo hagasigin, ìlùk wene warisasike hagat arat haga'lasigin o,” ìlùk hopuk palhe.

⁸ Atì'nogo hopuk palhesik oba nen opolik he, pogot oba nen, inane yogoneta mene a'nogo nen hobuk mel yogoneta: “Helal waganek ìkìlìk hukalek mene a'nogoat, malaikat esok hetakwe i laut yekelek oba, nen hetakwe re, kweang oba hìlìk metek werek a'nogo, ekimo hesogo werek a'lì wani lan o,”

⁹ ìlùk yogonetama, wo'nesuagalùk kìno oba laganem he, at en mel yogonete: “Wanìk he, nano o. Atì'nogo nikenem he, hapema kin amusu hake etuk hano negein meneat he, ha'la pelapenem he, etuk ale weak haga'lasigin a'naga o,” ìlùk yogonete.

¹⁰ Yogonetomo, helal eagalak waganek atì ekimo nen wanhìrìk, ebe nikenem he, napema kin amusu hake etuk hano meneat he, na'la pelapenem, ale motok weak haga'laganem hìgì o.

¹¹ Atì'nogo hìgìrìk oba nen, hobuk pogot oba nen, wene mel yogoneta: “Hat en wene Ala nen apùnì inùkùl etage lopok, inawì ero lopok, inane lopok, inogogì kaintek inetagepogot logolegat hobuk hagarinabigin wene atì, yogoisìkì logoino o,” ìlùk yogoneta.