ABÌKAKAN 1 - Ala Ane Wene Ket Mene Warogo Wo'ninapike Wene

Yesùt en wene hinago mene Yohanet abìkakan oba yogoto kolek, helal wanhike wene

¹ Wene ebe re, yìtogo. Yì wene tì wene hinago welagaike mene hobuk heageak haga'lasigin mene atì, Ala atitigeke mene tùkùm hogo yogoisoagalùk Ala nen at Yesùt Karìsùt hukalogo yogosikomo, at Karìsùt en malaikat lakhei wagaikomo, wene atì at Ala atitigeke mene aike an Yohanet yogonete.

² Ati'nogo yogonetomo, Ala ane atì Yesùt Karìsùt en abok yogonetenem wene obogat an neileken hìgì mene atì abok pak hogo helal waganogo hìgì atì o.

³ Wene atì obogat he, heageak haga'lasigin atì nen he, it apùnì aike wene helal waganek mene yì etage salugun mene mel, it aike inasuk holìk, wene atì hologo higit hogo hagatì logogun mene mel, Ala nen inebe hanorinapenem ina'la hai hakogoin o.

It Ala againapùrì gereja 7 nen atogotì lagaukwa mene hai warinapike wene

^4-5 An Yohanet en hit o propinsi Asia gereja 7 nen atogotì lagep mene nerùgì nagaiya'lak. Ninopase Ala ebe esok motok logolìk, holo welagaike, yogotak weregat, hobuk motok logogin mene wesigin atì mel, Ala ebe kain welagarek obùlùk oba werek kolek Areagùn ebe katoksek motok ìlùk 7 nen elokoma welagaikarek atì mel, at Yesùt Karìsùt oabùt hùpùn hogo logolìk Ala abok pak hogo yogonisikerek mene a'nogo mel, inoabùt hano a'nogo nen sethisek logolìk hano mene wokhisìgìk, hinetaùken hapuguthinapìk, ìkì logouak o. At Yesùt ebe wa'lagaikesi'mo nen opase Ala nen omalik makusa taginaparek atì hak, at tak apotkwe eluguthesikomo, apùnì kaintek inetagepogot kweangma mene yoma inebe mea mene re, at enek he, esin welagarek. Atì'nogo logoigìlùk, nit en weak hagatì lagagu atì nen, ninebe hele warek hake ha'nisek were'ma, at en nit etawì'ninapikesik, amep wulagasogo wa'lagaike atì ba hele hikalninapike atì.

⁶ Atì'nogo hikalninapikesik, nit at opase hesik hagatì logouagalùk, ninebe kain Ala esewerek menhinasikomo welago. Atì'nogo menhinasikomo logolìk he, nina'la nen he, “At Yesùt Karìsùt atì, omame apik werek,” ìlùk nit at ebe eberogoat hogorato motok logouok o, ìlùk, u hak, “Amin,” ìgì atì.

⁷ Lakhani! At ebe ohena a'la waganem, apùnì obogat inebe lopok en mel, it at sìge taluk wasukwa mene mel, inomat en ineileken lakhìkì logolìk, inùkùl etage lopok obogat le asugun o, ìlùk yogohisìgì atì, “Ebe asuak,” u hak, “Amin,” ìgì atì.

⁸ Ninopase Ala Etagepogot omame apik atì, esok motok logolìk, holo welagaike, yogotak weregat, hobuk motok logogin mene wesigin a'nogo nen ìkì logolìk he, “Ero mel, erepùl mel, anat o,” ìlùk ìlì'logo o.

Yohanet abìkakan oba Karìsùt ebe eileken hasike wene

⁹ An hinerei hinagaiyak Yohanet ninom ninebe Yesùt againapùrì omakeat mene, yì aik tì aik haga'ninapo kolek, nina'la nen he, “Hobuk at Ala nen awe a'ma hinegein,” ìlùk ninepe morogo welagarek atì. Were'ma, Ala ane Yesùt en pak hogo yogoniaasike wene a'nogo an nen yogoisìlìk nìgìrek an nen, neki hele warogo i okenma o etage Patomot kelakhani wagaikama welagì o.

¹⁰ Atì'nogo were'ma, o ninoe Etagepogot awì we ikomo re, Ala Areagùn noba louk ikomo, napotma nen at aike ane pìkon hùko mene ane hake be mel yogonetenem nasuk holhì:

¹¹ “Hat heileken hegein mene atì, helal waganino o. Waganogo re, it Ala againapùrì gereja 7 nen atogotarek mene, o etage Epesùt mel, Simirina mel, Perekamùt mel, Tiatira mel, Saritit mel, Pilalepia mel, Laolikia mel, inoba lakheino o,” ìlùk yogonete.

¹² Ati'nogo yogonetomo, “Ane atì sa nen yogonerì'logo,” ìlùk napotkwe neileken lakhìgì hak he, esage kìalhùkwe ebe 7 nen esok telik emas mene hagarek mene were'ma neileken hìgì o.

¹³ Nen, esage atì a'la tùlem abat ta'lagaike mene a'nogo elokoken hake, su uan etakwe mene hùlì esok oba pìkìt laberek, nen amik eken oba emas mene laberek.

¹⁴ Nen, esi re, topa esi mola hìrìnakùp hake. Nen, eileken he, etu amulok hake.

¹⁵ Nen, esok he, tembaga etumo weratenem apipin here-here ikerek hake. Nen, ane re, i hùt hùko mene ane hake.

¹⁶ Nen, eki ebekwe re, hesagal ebe 7 nen hesogo welaga. Nen, apelema nen karok ela heta-heta mago mene wùlìbi waga laga. Elokoken apipin he, o like tùlem mo tilelek-walelek yaterek atì hak were'ma neileken hìgì o.

¹⁷ Atì'nogo were'ma hìgìrìk he, nayùk en nelokwe sogoum warek hake, at elokoma awe a'ma po i laganem he, at eki ebekwe nen ha'niikesik he, mel yogonete: “Hayù'lek ame. An nebe re, ero ba nen pìkìt erepùl oba nesok motok logolìk he,

¹⁸ neluk motok welagìrek he, anat o. An nebe arat wa'lagagi meneat he, lakhan! Neluk agagisik, neluk motogat logogin o. Wa'lagaikarek atì mel, wa'la'lùk lagaikare'ma atì mel, kwe hùtùkwe an neki ba werek o.

¹⁹ An atì'nogo welagì atì nen he, yì wene tì wene yogotak ya haga'larì'logo mene mel, hobuk haga'lasigin mene mel, heileken hegein mene obogat helal wanin o.

²⁰ Nen, hesagal ebe 7 nen neki ebekwe hesogo were'ma hegen a'nogo mel, esage kìalhùkwe ebe 7 nen esok telik emas mene hagarek mel, heileken hegen a'nogo re, wene hinago mene atì nen he, pak hogo yogohesik o. Hesagal ebe 7 nen hegen atì ebe re, it Ala againapùrì gereja 7 nen atogotarek mene atì, Ala nen malaikat inayoko hìlìk laksa wagarek atì hak, inayoko hìlìk hisasike mene isegen o. Nen, esage kìalhùkwe ebe 7 nen atì ebe re, it Ala againapùrì gereja 7 nen atogotarek mene atìat isegen o,” ìlùk yogonete.