3 YOHANET 1 - Ala Ane Wene Ket Mene Warogo Wo'ninapike Wene

Kayùt hai wasike wene

¹ Kayùt nagaiyak e. An nen Ala againapùrì serisek logouagalùk menhanhike mene hinoe a'nogo nen netaùken oba nen hebe eberogoat netawì welagì, ìlùk, wene yì helal waganogo hoba lakhei wagì o.

² Nagaiyak e. Hat hetaùken Ala ba hìpìrìk logolìk hano welagen atì hagat, hoba ou lek hano logolìk yì hesik tì hesik hano hagatì logoinogolùk, sapan hat hesik ìkì lagi o.

³ Hat en ebe wene hasuk hologo hano hagatetek atì nen, it Ala againapùrì ninerùgì ninagaiya'lak aike noba wagaikasik, mel yogoneta: “At en ebe wene hesogo logolìk hano higit hogo hagaterek,” ìlùk habok yogonetama nasuk holhìrìk he, na'la hai apik hakìkì lagi o.

⁴ Atì'nogo ikenem he, an nen yì hesik, tì hesik na'la hai hamùlùgat negen hakìgìrek meneat he, hit hinebe an nagainapùrì nen ebe wene hesogo logolìk, hano higit hogo hagatenem nasuk holhìresik he, na'la hai apik hakìgìrek o.

Kayùt hogorasike wene

^5-7 Nagaiyak hebe netawì e. Hat haberalì agì'lek Ala againapùrì ninerùgì ninagaiya'lak inebe helu mene hokot mene obogat leberisìkì lagen mene hùgì nen he, “At en nit etawì'ninabìk tì'nogo wo'nisike,” ìlùk Ala againapùrì yoma mene yogoisa wagaikama nasuk holhì o. Atì'nogo hagaten atì hak, it atì nen Karìsùt hesik apùnì aike wene inokot mene yogoisa laganem, it en yì mene tì mene aike wogisìgì'lek mene re, hat en Ala a'la hanorogo leberisìlìk laksìkì logoumo re, hano o.

⁸ It atì ebe wene Ala ane a'nogo hesik hagarìlùgì atì, nit ninom enat hagasu hak hagatì logouak en, leberisìkì logouogat o.

Lìoterepet Temeterìùt eperak hesik yogosike wene

⁹ An nen hit Ala againapùrì hesik helal hororogo waganogo hinoba lakhei wagagi meneat he, at Lìoterepet a'la nen he, “An Ala againapùrì inoe kain haga'lasigin,” ìlùk akìlì'logo mene atì nek he, an nane hologo hagarì'logo lek atì.

¹⁰ Atì'nogo hagarì'logo atì, aike re, apeliagat nit ninabok weak ìlì'logo. Atì'nogo ìkì logolìk, a'la nen he, “An hagatì lagì atì re, hamùlùgat. Na'la mea. Hobuk aike inom hogo hagasiginat o,” ìlùk akìkì logolìk he, it Ala againapùrì aike waganem, at ebe nen woginapì'lek logolìk, it aike nen woginabuogolùk ikenem wenagisìlìk, inebe Ala againapùrì atogotare'ma nen mùk hogo wulaksikeregat atì nen, an nebe wìrìk en, at hagarì'logo mene atì hùthoagalùk ekalì wasigin o.

¹¹ Nagaiyak e. Hebe netawì. Hat en he, it apùnì inoabùt weak hagatarek mene atì, inoabùt wanhùn o. We, it inoabùt hano hagatarek mene halok, inoabùt wanhì logoino o. Sa nen oabùt hano nek hagaterek mene atì ebe Ala againapùrì meneat he, sa nen oabùt weak enek hagaterek mene halok, at en Ala ebe eileken hikere'lek okot o.

¹² Atì'nogo meneat he, at Temeterìùt hesik enek he, apùnì obogat en mel, at Ala eberogoat enek ikerek a'nogo nen mel, an nen mel, “At hano hagarì'logo,” ìlùk abok hano ogorek. At abok ogorek atì, eberogoat hano ogorek atì hit hinelu o.

Wene elùgùn warogo hai warinapike wene

¹³ An nen wene apigat hoba lakhei wesusak werek meneat he, lisu amusu ba helal waganogo hoba lakhei wesusak he, nabìt o.

¹⁴ We, an nebe heageak hea wìrìk weneane nineilha ba la'-lak ugun o, ìlùk akìkì lagi.

¹⁵ At Ala oabùt hano a'nogo nen hetaùken hapuguthapì logouak o. Nagaiyak. Nen, it ninerùgì ninagaiya'lak yoma mene ninom hutik mene nen hai wathapaat o. Nen, nit ninerùgì ninagaiya'lak ninom hutik mene o atoma werek mene, “At en hai wathinape,” ìlùk inebe lopok inetage hìthìgìk yogoisano o. Nagaiyak.