2 YOHANET 1 - Ala Ane Wene Ket Mene Warogo Wo'ninapike Wene

Hai warinapike wene

^1-2 An nen, Ala againapùrì sethisek logouagalùk, at en menhanhike mene hinoe a'nogo nen, hit Ala againapùrì takhinapike mene hùgì hinebe re, he omakeat mene ebe Ala nen wenasike mene eagwi inom hakema re, wene yì hai warogo helal waganogo hinoba lakhei wagì o. Hinebe eberogoat netawì o. An naligat enek hinebe netawì welagì hùk. We, it aike ninom ebe wene yogotak nina'la logopik hobuk moto'-motogat logogin mene atì wanhukwasik inelu agaukwa mene nen inetawìthinapaat o.

³ Ati nen, nerùgi nagaiya'lak. Nit ebe wene wìlìk, nit-nit netawì-hetawìrogo were'ma, ninopase Ala aput Yesùt Karìsùt eperak inoabùt hano a'nogo nen hano mene wo'nisìgìk, inetawì'ninapìk, ninetaùken hapugu'ninapìk, ìkì logouak o.

“Yesùt en wene ero ba yakùlnisasike wene oba louksek hagato motok logousak,” ìlùk yogoisasike wene

⁴ Hit hinebe re, he omakeat mene eagwì hake logolìk, hinebe aike ninopase Ala nen ebe wene ninasuk wasike a'nogo higit hogoat hagatì lagep mene hinoabùt palhìrìk, na'la hai apik hakìkì lagì o.

⁵ Atì nen he, nerei e. Wene ket mene helal waganogo heagwi hinomat were'ma hinoba lakhei wagì hùk. Lek o. We, nit ebe wene atì hùthasugumo, at Ala nen nit-nit netawì-hetawìrogo logouagalùk ero ba nenat ninasuk wasikomo ninelu mene a'nogo helal waganogo hinoba lakhei wagì atì o.

⁶ Nit-nit netawì-hetawìrogo logousak atì ebe re, wene Ala nen ninasuk wasike wene a'nogo higit hogo hagatì logousak atìat o. Wene ninasuk wasike atì re, ebe yì: “Hit-hit netawì-hetawìrogo hagatì logoino,” ìlùk ero ba nen ninasuk wasikomo holhugu atì hagat hagatì logousak o.

⁷ Atì'nogo hagatì logousak atì re, it apùnì inebe apigat en, “Yesùt Karìsùt atì abat ta'lasi wagì'lek,” ìlùk, lalinaparek mene inebe weinam agaikasik kweangma o yì awì tì awì obogat nùgì atì nen, netawì-hetawìrogo hagatì logousak ìgì atì o. It atì inebe re, Karìsùt inom motok weak logolìk apùnì lalinaparek mene a'nogoat o.

⁸ Nen, nit en hit hagathikìkì lagagu a'nogo hesik, hit aike oko wanhì'lek nong asinogo ìlùk, obogat wanuageip en he, hinoabùt hebelogo logoino. Logolìk he, Ala nen, “Hit oko wokhisegein,” ìlùk wene wa'nisasike a'nogo, hit aike nong agì'lek obogat heloageip en he, hinomamerogo hagatì logoino o.

⁹ Sa nen wene Karìsùt en yakùlnisasike wene atì ba louksek hagato welagì'lek, hunigat mene hagaterek halok he, Ala ebe esewerek agì'lek werek o. Atì'nogo meneat he, sa nen wene Karisùt en yakùlnisasike wene atì ba louksek hagato logogin halok he, ninopase Ala mel, aput Yesùt mel, eperak esewerek agasik werek o.

^10-11 Apùnì aike nen wene Karìsùt en yakùlnisasike wene lek, we, hunigat wene yakùlhisa waganem, sa nen apùnì inoabùt atìgìnìk mene hai warogo aua wanhenem he, at oabùt weak hagaterek mene atì oabùt helikerek atì nen he, hit en apùnì inoabùt atìgìnìk mene hai warogo hinaua woginabusak motok lek o.

Wene elùgùn warogo hai warinapike wene

¹² Wene apigat hinoba lakhei wesusak werek meneat, lisu amusu sùesika ba helal waganusak he, nabìt o. We, nina'la hai hakìkì lago mene atì ebenagei'mo hai hakùogolùk he, ninom apìma weneane nineilha ba la'-lak uogolùk, an nebe hinoba wesigin akìkì lagì o.

¹³ He aike Ala nen wenasike mene, eagwi nen inagosahe ebe hai wasu hak, it Ala againapùrì yoma mene nen he, hit hai wathinapa o.