2 TIMOTÌÙT 3 - Ala Ane Wene Ket Mene Warogo Wo'ninapike Wene

Apùnì inoabùt o elùgùn oba logolìk hagatì logogun mene hesik yogosike wene

¹ Wene yì ha'la eberek logoino o. O elùgùn oba motogat weak asigin mene werek o.

² Apùnì inetaùken tùlem he, inokawerek inebe hesik mel, uang hesik mel, esinethìgìk, inokawerek en hogorakìgìk, sebirakìgìk, inane pùk weak wenagisìgìk, inapase inagosalak inane holhì'lek heraksìgìk, hai warinapì'lek inoabùt lagì-lagorek hagatìk, Ala hesik hagatì'lek inapsìrì welagìk,

³ apùnì inebe inetawìrogo welagì'lek inabìrat welagìk, it aike inom kolo hagarìk sagalogo logou re, inabìrat welagìk, inabok weak palhìk, inoabùt asialok hogo, wulagam hogo hagatìk, hano mene hagasu inabìt logolìk,

⁴ inebe omakeat mene it aike nen inoasuagalùk yoko lagìk, inoabùt al hatok hogo hagatìk, inokawerek agaugerakìgìk, Ala ebe inetawìratì'lek, apùnì ina'la hairogo hagatarek atì meneat walok welagìk,

⁵ apùnì ineilhanem he, Ala againapùrì salek logolìk, ina'la nen Ala omama atì mene heraksìgìk, ìkì logogun o. Yogotak apùnì inoabùt atì hake aike hagarì'lùgì mene halok, hinom butik logogùp o.

^6-7 Hìmì he'na yì mene tì mene ina'la nen walok akìlìk, weak haga'lùk inetaùken ekin logolìgat, wene yakùlho motok welagaikarek meneat he, ebe wene tùkùm hogo wanùhùgat were'ma, it ap inoabùt atì'nogo hagarì'lùgì mene atì nen, hìmì atì inauakwo inabusak kìlìk, inane ba lalinabìk he, inebe hele warogo negen haksìlì'lùgì atì.

⁸ Holoat, it ap Yanet ho, Yaperet ho, Musa ane sagalogo heraksìlìk hagasukwa hak, it atì ebe wene sagalogo heraksìlìk, weak hagatì logolìk, ina'la nen wane higit mene ebesusak lek, kolo mene eberì'lùgì atì. Atì'nogo hagarì'lùgì atì ba, inetaùken Ala oba hìpìrìk mene kopologo heraksaga ìlùk, enagat asigin atì.

⁹ It Yanet ho, Yaperet ho, koko hagasukwama, it aike nen, “Inetaùken lek,” ìlùk enagat hùtsasukwa hak, it atì atì'nogoat inetaùken lek hagarì'lùgì ìlùk, apùnì obogat en inoabùt enagat palumo re, it inane atì esin asigin lek o.

Timotìùt etaùken wurik hogo logouagalùk, elùgùn oba asuk wasike wene

¹⁰ It atì inoabùt atì'nogo enagat asigin meneet he, hat he, an nen wene yakùlisìgìrek mene mel, noabùt hagatìrek mene mel, “Tì'nogo hagasigin,” ìlùk na'la akìgìrek mene mel, netaùken Ala oba hìpìrìk welagìrek mene mel, netaùken uan welagìrek mene mel, apùnì obogat netawìrogo welagìrek mene mel, nepe morogo welagìrek mene mel, hageat en hùthanhì lagenat o.

¹¹ Apùnì nen yì aik tì aik haga'napenem, noba aik weak hìgìrek a'nogo heluat o. Apùnì o Atiokia nen, Ikonìùm en, Lisitera nen, weaga'napo kolegat were'ma, ninoe Etagepogot en eki aike kamo ìgì'lek telnapì lagaike atì.

¹² Nit Karìsùt Yesùt ninom hutik logolìk, Ala hesik hanorogo hagatì logouogolùk nina'la akìkì lago mene hùgì, ninebe lopok obogat yì aik tì aik haga'ninapì logogunat o.

¹³ Weaga'ninapo kolegat, it aike weak hagatì logolìk lalinabì'lùgì mene atì, it aike nen lalinapenem, it en oko-oko lalinapìgat ìkì logolìk, weak arìk arìgat hùkorogo weak akogoin atì.

¹⁴ It en atì'nogoat hagatarek meneat he, hat enek he, nit ninebe helu mene nen ebe wene yakùlhesugumo, hat en he, “Eberogoat,” ìlùk wanhìgin mene atìat ning hogo hesogo logoino.

¹⁵ Hat hebe yekerek oba nenat Ala ane helal waganek atì helu welagatek atì, ha'la eberek motok logousak o. Atì'nogo logolìk, hetaùken Karìsùt Yesùt oba hìpìrìk were'ma, Ala nen telhabusak mene hùthanogolùk, at ane helal waganek atì baat ha'la elogat kagalusak werek o.

¹⁶ Ala ane helal waganek atì obogat he, at enat ina'la kagalhìkomo, helal waganogo hesukwa mene atì ba, apùnì aike wene ebe wene yakùlisìgìk, kolo hagatenem inasuk watìk, inoabùt hebelhik, Ala a'la walok akikerek mene higit hogo hagatì logouagalùk inasuk watìk, ìkì logousagat o.

¹⁷ Apùnì inebe lopok inebe Ala hesik hisìlìk logolìk, yì mene tì mene at hesik hano hagatarek mene atì elok hogoat inetaùken wurik hogo hagatì logouagalùk, Ala ane helal waganogo wo'nisasike atì.