2 TIMOTÌÙT 2 - Ala Ane Wene Ket Mene Warogo Wo'ninapike Wene

Timotìùt ebe Yesùt oba lopok hogo logouagalùk, asuk wasike wene

¹ Timotìùt naput e. Nit Karìsùt Yesùt ninom hutik were'ma, Ala oabùt hano nen wo'nisikerek mene atì ba hetaùken wurik hogo logoino.

² An nen wene apùnì logolegat ineilhanem yakùlhesigimo wanhìgin mene a'nogo, hat en it apùnì aike inoabùt hùpùnsek mene nen it aike yakùlisìkì logouagalùk, inoba heino.

³ Ap ekaragùntek mene inogogì inane hologo weim yapì logolìk, yì aik tì aik hìlìk hìlìk yaparek hak, hat en Yesùt Karìsùt ane hologo, yì aik tì aik hìkì logolìk, hepe morogo hagatì logoino.

⁴ It ap ekaragùntek atì, inogogì kaintek ina'la hai hakoagalùk, weim yapì logolìk, yì mene tì mene ouma mene oba ebetì'legat yaparek atì.

⁵ Nen, aike re, sa awewerek sa awewerek laga logolìk, ap inayoko hikerek mene nen, “Yì'nogo hagasusak,” ìlùk ikerek mene ane hologo lagì'lek halok, “Awewerek aga mene, ap yìat,” ìlùk, oko kare-kare negen ìksagarek mene atì ìksasak mea o. We, ane hologo lago halogat ìksasak o.

⁶ Nen, aike re, apùnì aike ineyabu helìlìk, awì yagasogo set kalogo hagarì'lùgì mene atì, ebe wurik aganem, inokawerek enat tak nekarek atì.

⁷ Wene an nen yogohetì mene atì, ha'la ebetì logoumo, ninoe Etagepogot en obogat sekek hogo yogohesusak werek atì nen, oba ebetì logoino o.

⁸ An hano wene yogoisìlìk nìgìrek atì re, Yesùt Karìsùt, at Taùt en tagokwe meneat ebe wasukwama, Ala nen eluguthesike wene atì, ha'la eberek motok logoino.

⁹ An hano wene atì'nogo yogoisìlìk nikenem, it apùnì aike nen, it aike weak hagarì'lùgì mene hagarinabu hak, an yì aik tì aik haga'napìk, neki hele watìk, ìlì'lùgì meneat he, Ala ane atì hele homasusak mea o. We, hele hikalegat werek.

¹⁰ Atì nen he, it apùnì aike Ala nen wenaginapike mene hùgì, Karìsùt Yesùt inom hùnesumo re, inebe telinapìk, ineluk hano motok logouagalùk, hanorinapìk, uagalùk he, an atì'nogo weaga'napo kolegat, nepe morogo welagìrek atì.

¹¹ Wene mel ìlùk egarek yì re, eberogoat o: Nit at ninom wa'lago mene halok, at ninom nineluk motok logogunat o.

¹² Nit ninepe morogo logogun halok, apùnì at awe a'ma kìlìk logogun mene atì, nit ninom enat hagisek logogun o. Nit en he, “Yesùt ninoe lek o,” ìlùk, at ebe motok heraksogo halok, at en he, “It an nagoromì legat o,” ìlùk, herakhinegeinat o.

¹³ Mene re, at okawerek en, “An noabùt alep welagì mene atì lek o, ìlùk hùnogoat munenagarek lek atì nen, nit at oba lopoksek logogun lek halok, at en nit ninoba lopoksek motogat welagarek o,” ìlùk, egarek atì eberogoat o.

“We wene heraksìlìk, ebe wene atìat inasuk watì logoino,” ìlùk, yogosike wene

¹⁴ Wene yogohetì mene atì obogat it aike ina'la eberogo yogoisìkì logoino. Yogoisìkì logolìk, we, inane mene hesigat serep arì'lùgì atì Ala eilhanem inasuk hanorogo watì logoino. Ati'nogo serep arì'lùgì atì ba, hano haga'lasigin lek o. We, it aike inasuk holìk, weak asugunat o.

¹⁵ Ala nen he, “Hat an hesik hano hagatì lagen,” ìlùk, yogohesuak en he, homamerogoat hagatì logoino. It aike yì mene tì mene hagasuagalùk inayoko hikenem he, hanorogo hagatì logolìk, inekalì lek hogo hagatarek atì hak, hat en ebe wene atìat higit hogo yakùlisìkì logoino.

¹⁶ Mene re, it apùnì aike nen ebe wene atì le'maat, tùlemat, lek asigin mene ìlì'lùgì atì, heraksalùk kwanìrogo laga logoino. It atì atì'nogo ìkì logolìk, Ala ebe heraksalùk hik ìlìk hek ìlìk wo'laka wùlìbì'lùgì atì.

¹⁷ Wene ebe wene le'maat yakùlisìlì'lùgì mene atì, apùnì inoumo aik palinapenem, ibima arìk, ebema arìk, hùko agarek hak, it atì inane atì'nogoat ìlì'lùgì atì ba it aike hùkoat weagarinabì'lùgì atì. Ap Himeneùt Piletùt eperak atì'nogo hagatì logolìk,

¹⁸ ebe wene heraksalùk kwanìrogo wùlìbìk, it en he, “Ala nen apùnì warek mene inelugurinabigin ìlùk abok isike a'nogo arat haga'lagama yì,” ìlùk, it aike yogoisikenem, inetaùken Ala oba hìpìrìk werek mene weagarinabì'lùgì atì.

¹⁹ Mene re, Ala nen o tik negen wasike mene ningsek motogat logogin atì ba helal mel ìlùk waganek werek atì: “Ninoe Etagopogot okawerek againapùrì wenaginapike mene atì inebe elu o,” ìlùk isike. Nen, wene aike re, “It aike nen he, An nebe ninoe Etagepogot apurat o, ìlùk, ìlì'lùgì mene hùgì, Weak hagasusak ninabìt o, ìlùk heraksalùk kwanìrogo wo'lakìkì logouak o,” ìlùk, isikomo helal waganek werek atì.

²⁰ O hùko wùrì'mo a'la re, yì mene tì mene emas mene mel, perak mene mel, hagarek mene oko apik atì mene nek welagarek hùk. We, e mene mel, kweang mene mel, hagarek mene welagaregat atì. Hano mene hagasuogolùk halok, hano meneat wanhìk, yùgùnat mene hagasuogolùk halok, yùgùnat mene wanhìk, egarek atì.

²¹ Ati hak he, sa nen okawerek en weak hagatarek mene atì horogo hebisìlìk, ebe Ala hesik hisìlìk were'ma, at enat yì mene tì mene hano mene hagasigìlùk, “Arat hano,” ìlùk, ayoko hegein atì.

²² Ati nen he, hat he, it ap elege mene nen inoba aiyage lagalìk weak hagarì'lùgì mene atì heraksalùk, hese wo'lakìkì logoino. It apùnì aike inetaùken hano omakeat logolìk ninoe Etagepogot ayoko hìlì'lùgì mene atì hinom lapuk hogo logoino. Hinomat he, higit hogo hagatìk, Ala oba lopok hogo welagìk, apùnì inebe inetawìrogo welagìk, apùnì inom lìok hogo welagìk, egarek atì meneat musok laga logoino.

²³ Ati'nogo hagatì logolìk, it apùnì aike inetaùken abìt mene nen wene inokot logolìgat, wene serep arì'lùgì atì elùgùn oba re, it-it inom weim negen yabì'lùgì atì, inom hagatì'lek heraksìkì logoino.

²⁴ At sa nen ninoe Etagepogot hesik hagatì logolìk, atì'nogo hagasusak lek. We, apùnì obogat oabùt lìok hogo inom logousak o. Epe morogo logolìk, apùnì wene hanorogo yakùlisìkì logousak.

²⁵ Atì'nogo yakùlisikenem, it apùnì aike nen at ane sebeluogolùk ikenem, at en ane lìok hogoat inasuk watì logousak. Atì'nogo inasuk watenem, it weak hagatarek mene heraksìlìk, ebe wene atì wanuagalùk, Ala nen ina'la kagaliginat he a, ìlùk inasuk watì logousak.

²⁶ Atì'nogo inasuk watenem, it inoabùt hebelarìk, at Ibilit a'la akikerek mene hagatì logouagalùk inebe paik hele nen hakikerek hak haksike meneat he, Ala nen hikalogo wulaksegeinat o.