2 TIMOTÌÙT 1 - Ala Ane Wene Ket Mene Warogo Wo'ninapike Wene

Hai wasike wene

^1-2 Timotìùt netawì mene naput e. Ala nen he, “Hit Karìsùt Yesùt hinom hutik were'ma hineluguthinapìrek,” ìlùk, abok yogonisasike mene atì, an Paùlùt en yogoisìlìk nìkì logouagalùk, a'la akasike ba Karìsùt Yesùt en nayoko hìlìk lakhani wagaikomo, yoma logolìk wene yì helal waganogo hoba lakhei wagì atì o. Ninopase Ala ho, ninoe Etagepogot Karìsùt Yesùt ho, eperak inoabùt hano a'nogo nen, hano mene wokhetìk, inetawìthapìk, hetaùken hapuguthapik, ìkì logouak o.

Timotìùt etaùken Ala oba hìpìrìk logouagalùk, asuk warogo yogosike wene

³ An nopalak Ala awe a'ma logolìk, inokawerek inetaùken omakeat hano logolìk, at hesik hagatìk, hogoratìk, ìkì lagaukwa hak, an atì'nogoat hagatì logolìk, hat hoba motok eberegat, hat hesik likene hùako sapan iko motogat logolìk, Ala hai watì lagì o.

⁴ Hat le agagin a'nogo nen, neperak apì arìk, ha'la hano aganem, na'la hai hanorogo hakagalùk, “Neperak apì a'lo e,” ìlùk, hoba eberek welagì o.

⁵ Logolìk, hetaùken Ala ba eberogoat hìpìrìk welagen ìlùk na'la eberegat welagì. Emakum hagona Loìt ho, hagosa Euaike ho, inetaùken Ala oba hìpìrìk welagaukwa hak, hat hetaùken atì'nogoat welagen ìlùk hùthagakì lagìat o.

⁶ Atì'nogo hìpìrìk welagen atì nen he, an nen neki hùkùl sebelhenem, Ala oabùt hano nen, “Hat tì'nogo hagatì logoino,” ìlùk hoabùt wokhesike mene atì, etu hìrìmìtarek hak, ha'la agaken hogo arìk logoinogolùk ha'la kagalogo yogohetì o.

⁷ Ala nen ninoabùt wo'nisikerek atì re, ninayùksek logouagalùk wo'nisikerek hùk. We, ninomamerogo welagìk, apùnì aike ninetawìrogo welagìk, ninetaùken sebeksek welagìk, ìkì logouagalùk wo'nisikerek atì.

⁸ Ati nen he, ninoe Etagepogot abok apùnì aike yogoisasak hekalì lek hogo pak hogoat yogoisìgìk, nen, an at hesigat neki hele warogo hanhama welagì yì hesik, hekalì lek halong hogo welagìk, ìkì logoino. Atì'nogo ìkì logolìk, apùnì aike nen hano wene atì hesik, yì aik tì aik haga'ninapo kolegat, an Ala omame ba welagìrek hagat, hepe morogo logoino.

⁹ At Ala nen ninebe telninapìk, at okawerek againapùrì asuagalùk ninayoko hìgìk, isike atì re, nit en aike hagasugu ba ninayoko hesike hùk. At he Ala oabùt hano nen, emakum yì mene tì mene oan elalhì'lek logolìk, hobuk Karìsùt Yesùt hagasigin oba hano'ninabigìlùk, okawerek a'la akalùk ninayoko hesike atì.

¹⁰ Atì'nogo akasike mene hinago were'ma, hobuk Karìsùt Yessut telninapùkwe ebe weinam agaike atì ba enagat agaike atì. At ane hano wene atì ba, wa'lagwì ero atì mabenetsìgìk, wa'lagì'lek nineluk motok logogun mene atì, weinamethìgìk, isike.

¹¹ Atì'nogo isikesik, an hano wene atìat yogoisìgìk, yakùlisìgìk, ìlìk nìkì logouagalùk nayoko hìlìk lakhani wagaikomo nìkì lagì atì.

¹² Atì'nogo lakhani wagaikomo nìkì lagì atì nen, apùnì nen yì aik tì aik haga'napo kolegat he, netaùken ebe nelu mene oba hìpìrìk welagì, ìlùk nekalì agì'lek, na'la pùk hogo welagì. At en he, “An mene yì ha'narek logoino. Ha'narek were'ma, hùlì an nebeat wesigin o,” ìlùk, noba hìlìk nayoko hesike mene atì, okawerek omame ba elok ha'narek logogin o, ìlùk na'la hùthìkì lagì.

¹³ Wene an nen yakùlhesigimo wanhìgin a'nogo, an noabùt wìlìk, nit Karìsùt Yesùt ninom hutik logolìk, ninetaùken at oba hìpìrethìgìk, apùnì aike ninetawìrinapìk, ogorek hak ìkì logolìk, ha'la nen he, “Hano'ninaperek mene wene ebe yìat o,” ìlùk, ning hogo hakìlìk yakùlisìkì logoino.

¹⁴ Ala nen he, “Wene hano mene atì apùnì aike nen weagatheinogo ìlùk, hanorogo ha'narek logoino,” ìlùk, ninoba hesike mene atì, at Areagùn nina'la hesikomo werek atì omame ba hanorogo hesogo logoino.

¹⁵ It apùnì o propinsi Asia ya ta mene amanogo inebe obogat an herakhanìlùk pùgùlogo wùlìpì logolìk, at Pìgelùt ho, Heremogenet ho, inomat pùgùlha atì, hat heluat welagen o.

¹⁶ Atì'nogo meneat he, at Onesiporùt againapùrì inom enek he, ninhùp-nanhùp, na'la hanorogo netaùken sebeli wìrì'lùgì atì, ninoe Etagepogot en etawìrogo hagisek logouak o. An neki hele warek were'ma noba wesu ekalì legat,

¹⁷ o Ùrùm wagasik he, hepogat hinok wo'napi lagasik, nebe hera'nabi waga atì.

¹⁸ Ninoe Etagepogot oabùt hano nen higit hogo hagasigin atì like, at Onesiporùt atì ebe etawì asuak o. At hageat he, o Epesùt logolìk, an hùkorogo lebe'nììkì lagaike a'nogo, hat tùkùm hogo heluat o.