2 TESALONIKA 3 - Ala Ane Wene Ket Mene Warogo Wo'ninapike Wene

“Sapan nit hesik ìkì logoino,” ìlùk, yogoisasike wene

¹ Nerùgì nagaiya'lak. Wene elùgùn oba aike yì yogohisak. Ninoe Etagepogot ane hepok ukalarìk hit were'ma atoma wagaikomo hano wanhìgip hak, atì'nogoat ukalarìk laganem it aike nen hano wanuagalùk, nit hesik sapan ìkì logoino.

² It apùnì obogat en, “Wene atì eberogoat,” ìlùk wanhasik enek werek hùk. We, it aike wanhì'lek mene inoabùt kolo hagatìk, weak hagatìk, ìlì'lùgì mene nen, weaga'ninabuogolùk ikenem, Ala nen telninapì logouak en he, nit hesik sapan ìkì logoinoat o.

³ Mene re, ninetaùken ninoe Etagepogot oba hìpìrethikenem, ninane hologo hagaterek mene atì nen hinetaùken wurigethinapì logolìk, at oabùt motok weak mene atì nen weagathinabigìlùk ikenem hakhisek logogin atì nen, hinetaùken at oba hìpìrethìlìk logoino o.

⁴ Hakhisek were'ma, nit nina'la nen he, “It en he, nit en it inasuk watì lagagu mene a'nogo, yogotak higit hogo hagatìk, hobuk atì'nogo hagatìk, ìkì logogun o,” ìlùk ninoe Etagepogot ninom hutik logolìk eberogoat akìkì lago.

⁵ Hit hina'la nen he, “Ninebe Ala etawì o,” ìlùk hùthìgìk, hinoabùt Karìsùt epe morogo hagatì lagaike hak, oabùt wanhìk, hùkorogo ìkì logouageip en, ninoe Etagepogot ebe hinetaùkenma logolìk, hina'la kagalhì logouak o.

Inokawerek ineyabu ineki nenat waganogo nìkì logouagalùk yogoisasike wene

⁶ Nerùgì nagaiya'lak. Hit hinerùgì hinagaiya'lak aike Ala againapùrì meneat he, wene nit en hinasuk wasugu a'nogo hologo hagatì'lek heraksìlìk, ineki wanhì'lek kù'lìk souge nùgì mene atì, hinom hutik logogùp o.

⁷ Nit he, hit ninom logolìk nineki nen wanhì'lek ninaberalì weak nìkì lagagu lek a'nogo, hit en nit ninoabùt waganogo hagasusak hineluat o.

⁸ Nit en he, supùrùk hit hinoba aike oka palhì'lek welegat nìkì lagagu legat o. We, hit aike hinoba seget weak hìkì logoinogo ìlùk, nit likene hùako nen motok set kwìl-kwal hogo ninokawerek enat ninomamerogo hagathìlìk oko palogo nìkì lagagu atì.

⁹ Nit en he, hit hinoba kìno yogohisasak higit meneat he, hit en nit ninoabùt wanuageip en ìlùk, kìno ìgì'lek ninokawerek en atì'nogo hagatì lagagu atì.

¹⁰ Nit emakum ninom logolìk yogohisìkì logolìk he, “Hit aike yabu wanhì'lek inoabùt kù'lik souge mene atì, sùpùrùk nìkì'lek welegat logouak,” ìlùk, yogohisìkì lagaguat akìgì.

¹¹ Wene atì'nogo yogohisasugu meneat he, it aike nen he, “Apùnì it mene aike inokawerek ineyabu meneat helìgì'lek logolìk, it aike inawene meneat talepogoke ìlìk nùgì,” ìlùk yogonisagama ninasuk holhosik en yogohisogo atì.

¹² Nit en he, apùnì hit mene inoabùt atì'nogo hagarì'lùgì mene atì, ineil lopok hogo logolìk, inokawerek ineki nenat yabu waganogo inapùrùk meneat nìkì logouagalùk, ninoe Etagepogot Yesùt Karìsùt ninom hutik logolìk, at en ikerek mene ina'la kagalogo inasuk wato atì.

¹³ Nerùgì nagaiya'lak. Hano mene hagatì logolìk, hinaberalì agì'lek hagatì logoino o.

¹⁴ Wene helal waganogo hinoba lakhei wago mene atì, it aike nen inasuk hologo hagasusak inabìt mene atì, inekalì asuagalùk it inoabùt atì'nogo hagarì'lùgì mene atì hùthìlìk he, hinom hùnethìlìk logogùp o.

¹⁵ Atì'nogo meneat he, hinom weim palek negen hagatì logogùp o. We, “Ninerùgì ninagaiya'lak Ala againapùrì meneat,” ìlùk, inasak hanorogo watì logoino o.

Wene elùgùn warogo hai warinapike wene

¹⁶ Ninoe Etagepogot ninetaùken hapuguthiaikerek mene a'nogo okawerek en yì hesik tì hesik hinetaùken hapuguthinapo motok logolìk he, hinebe obogat hakhisek logouak o.

¹⁷ An nen wene obogat helal palhì logolìk, “At Paùlùt en palhomo hìgì,” ìlùk, enagat hùthoagalùk, wene elùgùn warogo hai warinapì logolìk he, nokawerek neki nenat palhìrek a'nogo hak, yogotak yì hai wathinapì logolìk palhì mene neki enagat atì o.

¹⁸ Ninoe Etagepogot Yesùt Karìsùt oabùt hano a'nogo nen, hit obogat hanorogo hakhisek logouak o.