2 TESALONIKA 2 - Ala Ane Wene Ket Mene Warogo Wo'ninapike Wene

Karìsùt wagì'lek werek kolek, at oabùt motok weak mene weìnam arìk oba hagasugun wene

¹ Nerùgì nagaiya'lak. Ninoe Etagepogot Yesùt Karìsùt ebe wìrìk he, at ninom omakìma logouogolùk atogo'ninabi wesigin atì hesik, hinasuk seberogo wasik.

² Ninoe Etagepogot wesigin atì like arat haga'lagama salek, it apùnì aike nen he, “Ala Areagùn nen yì'nogo yogonete meneat,” ìlùk yogohisìgìk, it aike nen, “Wene ebe yì'nogo meneat,” ìlùk yogohisìgìk, it aike nen, wene nit en helal wanho mene hesik, “Ebe yì'nogo meneat,” ìlùk yogohisìgìk, ìlì'lùgì atì ha, hinetaùken hepok nong-hong ìlìk leil wasinogo ìlùk yogohisìgì atì.

³ Apùnì aike nen, “Ala ninabìt,” ìlùk, heraksalùk wùlìpìk, at oabùt motok weak mene hobuk Ala nen etu ai'mo laksegein mene a'nogo weinam agìk, atì'nogo tak hagasugun atì nen he, it aike nen yì'nogo ìgìk, tì'nogo ìgìk, ìkì logolìk, lalhinabinogo. Nabìt.

⁴ At atì ebe weinam arik, Ala awì wùrì'mo melasi kìlìk, okawerek en hogorakìkì logolìk he, “Apùnì nen, yì mene tì mene oba hìpìrìk logolìk hogoratarek mene mel, Ninopase ebe yì, ìlùk egarek mene atì obogat mel, mea enek meneat he, esin Ala nebe anat o,” ìlùk ìkì logogin atì.

⁵ Obogat atì'nogo haga'lasigin atì hesik, an hit ninom logolìk yogohisìkì lagagi a'nogo hina'la ebere'lek welagep nogo? Eberegat welagep akìkì lagì.

⁶ At oabùt weak mene ebe wagì'lek werek atì, aike mene nen hakhìlìk werek, ìlùk, hineluat o. Hakhìlìk were'ma, at Ala nenat, “Weinam asuak,” ìlùk igin higit hogoat weinam asiginat o.

⁷ Mene re, apùnì aike nen, “Ala ninabìt o,” ìlùk, heraksalùk wùlìbìk inoabùt weak hagasugun mene, yogotak hinagasogo hagarì'lùgìat o. Mene re, at aike nen hakìlìk werek mene atì Ala nen wokhamo re,

⁸ at oabùt motok weak mene atì weinam hogo wesigin. Wìrìk he, weak hagato were'ma, ninoe Etagepogot Yesùt hogorato kolek hobuk waga logolìk eleage nen hurogo ebe warogo motok legetsegein.

⁹ Atì'nogo legetsegein mene oan werek kolek he, at oabùt motok weak mene a'nogo, Ibilit en omame wogosumo apùnì nen hogoratìk, at oba ebetìk, uagalùk, yì mene tì mene hagasusak lek mene eberogoat salek elalinat hagatì logogin.

¹⁰ Atì'nogo hagatì logolìk he, ebe wene atì apùnì nen walok en wanumo Ala nen telinabusak meneat he, at oabùt weak mene atì nen lalpalogo hagarinapenem, it en he, “Ebe wene atì ninabìt o,” ìlùk, ìkì logogun atì ba weagarinabigin o.

^11-12 It apùnì atì nen ebe wene eberogoat ìlùk wanhì'lek logolìk, “Weak mene atìat walok,” ìlùk hagatì logogun mene atì, inebe obogat Ala nen ùkùm inoba hìlìk weagarinabigìlùk he, nongorinaperek mene omame werek mene aike lakhei wesigin. Lakhei wesumo, apeliak igin meneat he, eberogoat salek wanugun atì.

“Hit Ala nen telhinabigìlùk wenakhinapike,” ìlùk yogoisasike wene

¹³ Nerùgì nagaiya'lak. Hinebe ninoe Etagepogot en etawì werek o. Ero ba Ala nen hinebe telhinabigìlùk wenakhinapikomo, hit en ebe wene atì eberogoat ìlùk wanhìk, nen, hinebe Ala Areagùn nen Ala okawerek hesik hakìlìk tegelogo hisìgìk, ìkì logogun atì ba telhinabigin atì nen, nit Ala hai wasusak higit hogoat, hit hesik hai wato motok welago.

¹⁴ Ninoe Etagepogot Yesùt Karìsùt hogorato motok welagaikarek hak, hit atì'nogoat hinom hogothinabuagalùk, Ala walok en hano wene nit en yogohisa wagagu atì ba, hinayoko hesikomo welagep.

¹⁵ Ati nen, nerùgì nagaiya'lak. Wene nit en yakùlhisìkì logolìk ninane ba nen yakùlhisìgìk, helal waganogo hinoba lakhei wagìk, isugu mene atì, hineki ning hogo hesogo logolìk he, hinomamerogo metegat lngoino.

¹⁶ At ninoe Etagepogot Yesùt Karìsùt, ninopase Ala eperak inoabùt hano a'nogo nen, inetawì'ninapukwasik, ninetaùken abolo'lek motok logouagalùk ago wathinìgìk, hano asigin ìlùk oba eberek logouagalùk nina'la kagalhìk, egarek.

¹⁷ Atì'nogo egarek mene atì nenat, hit hineki nen hano mene hagatìk, hinane ba hano mene yogoisìgìk, ìkì logouageip en ìlùk, hina'la hanothinapìk, hinetaùken wurigethinapìk, ìkì logouak o.