2 TESALONIKA 1 - Ala Ane Wene Ket Mene Warogo Wo'ninapike Wene

Hai warinapike wene

¹ Hit Ala againapùrì o Tesalonika atogotì logolìk, ninopase Ala mel, ninoe Etagepogot Yesùt Karìsùt mel, hinom hutik welagep mene, nerùgì nagaiya'lak. An Paùlùt, Silat Timotìùt eperak ninom en wene yì helal waganogo hinoba lakhei wago atì.

² Ninopase Ala, ninoe Etagepogot Yesùt Karìsùt eperak inoabùt hano a'nogo nen, hano mene wokhisìgìk, hinetaùken hapuguthinapìk, ìkì logouak o.

Karìsùt en ùkùm inoba hìgìk, kotìk, i wesigin wene

³ Nerùgì nagaiya'lak. Hit hinetaùken Karìsùt oba hìpìrìk welagasep mene atì, aike inom hùkorogo hìpìrethìgìk, hit-hit hinebe lopok netawì-hetawìrogo hagatesep mene atì, aike inom hùkorogoat hinetawìrinapìk, ìkì lagep atì nen, nit en hit hesik Ala hogorasusak meneat hogorato motok welago.

⁴ Apùnì nen yì aik tì aik hagathinapo kolegat he, hinepe morogo logolìk, hinetaùken Karìsùt oba atì'nogo hìpìrìk welagasep atì nen, nit en Ala againapùrì o yì awi tì awi atogotarek mene hinabok yogoisìkì logolìk ninalong arì'logo o.

⁵ Ala nen apùnì ùkùm inoba hìgìk, kotìk, higit hogoat hikerek ìlùk enagat asigin. Hit yogotak Ala awe a'ma kìlìk ane hologo welagep atì hesik, apùnì nen yì aik tì aik hagathinapo kolek atì'nogo welagep atì nen, at en hobuk he, “Hit an nawe a'ma kìlìk hinawiwerek motok logoino o,” ìlùk, yogohisegein atì.

^6-8 Ninoe Etagepogot Yesùt agoromì malaikat yoko negarek mene inom pogot oba nen inomamerogo weinam hogoat etu amulok a'la pi waganem he, Ala nen ùkùm apùnì inoba higit hogo hìkì logolìk, it hit yì aik tì aik hagathinabì'lùgì mene, oko higit hogoat weagarinapìk, nen hit yì aik tì aik hìkì lagep mene atì, nit ninomat nina'la hano'ninapìk, ìgìn o. Atì'nogo ìkì logolìk he, it apùnì Ala ebe inelu asusak inabìt logolìk, ninoe Etagepogot Yesùt hagasike wene hano wene a'nogo wanhì'lek heraksìlì'lùgì mene ùkùm inoba hegein o.

⁹ It atì'nogo ùkùm inoba hìlìk he, ninoe Etagepogot omame apik en hogorato motok welagaikare'ma eilhanem atoma nenat wea'ma atoma motogat logouagalùk laksegein o.

¹⁰ At wesigin atì like ebe waganem he, okawerek againapùrì inetaùken at oba hìpìrethìlìk welagaikarek mene nen, at ebe hogoratìk, agaugeratìk, uagalùk wesigin atì. Nen, nit en wene atì ninelu mene pak hogo yogohisa wagagumo re, hit en, “Eberogoat o,” ìlùk wanhìgip atì nen, hit ninom enat, at hogorasugun o.

¹¹ At Ala nen he, “Hit atì'nogo hagatì logoino o,” ìlùk, hinayoko hesike hagat higit hogo hagatì logouageip ìlùk, nit en hit hesik sapan iko motok welago. Hit hina'la nen he, “Nit hano hagatì logoilo e,” ìlùk, akìkì lagep mene atì, Ala nen atì'nogo hagathinapìk, nen, hinetaùken at oba hìpìrethìlìk logolìk hagatì lagep mene atì, at enat hinetaùken wurigethinapìk, at omame atì ba hagathinapì logouak o.

¹² Ninopase Ala, ninoe Etagepogot Yesùt Karìsùt eperak inoabùt hano a'nogo nen hagathinapenem atì'nogo hagatì logogun atì nen, hit en he, ninoe Etagepogot Yesùt etage palogo agaugeratìk, at en he, hit agaugethinapìk ugun atì.