2 PETERÙT 3 - Ala Ane Wene Ket Mene Warogo Wo'ninapike Wene

“Yesùt wesigin, ìlùk wene wa'nisasukwa a'nogo, eberogoat wesigin,” ìlùk yogoisasike wene

¹ Nerùgì nagaiya'lak. Hinebe netawì e. Wene alep aike helal waganogo hinoba lakhei wagagi atì mel, hobuk lakhei wagì atì mel, hit wene ebe hinelu meneat he, hina'la higit hogo ebesuageip en ìlùk lakhei waga lagì atì.

² Wene atì, it ap hageat Ala nen inayoko hesikomo at ane yogoisìkì lagaukwa mene nen isukwaat. Nen, ninoe Etagepogot ninebe telninapùkwe a'nogo nen wene ninasuk wasike mene, nit ninayoko hìlìk hinoba lakhina wagaikomo yogohisasuguat.

³ Wene ebe yì tak hùthasak. O wùrep oba re, apùnì aike inane sagan weak mene inetaùken nen nikenem ina'la nen kagalogo weak hagatì logolìk, hinoba wìrìk, inane sagan wokhisìkì logolìk he,

⁴ “Hinoe Etagepogot en he, An hobuk wesigin, ìlùk wene wathisasike a'nogo ebe kì waga. Wagì'lek werek kolek ninopaselak arat wa'lagaukwa meneat he, yì mene tì mene Ala nen emakum walhasikomo welagaike hagat esok motok werek yì,” ìlùk inane sagan wokhisa wesugun o.

⁵ Atì'nogo ìkì logolìk, wene yì lì'mathìlì'lùgì. Emakum Ala ane baat pogot walhasikesik he, kweang i inom apìkwe were'ma, i pokwe makwe lakhesike atì ba kweang walhasike, ìlùk wene atì inelu logolìgat he, inokot-inokot ìlì'lùgì atì.

⁶ Atì'nogo walhasikesik he, hobuk en iat nap-hap uagalùk isikomo, kweang atì i atì baat weagathesike atì.

⁷ Mene re, pogot atì mel, kweang atì mel hobuk etu ba weagatheigìlùk Ala ane atì baat elama hesik hesogo logopik he, apùnì Ala ebe inabìt logolìk inoabùt weak hagarì'lùgì mene atì, ùkùm inoba hìlìk weagarinapìk, kweang pogot weagathìgìk, omake likeat hagasigìlùk eram enat eki hesogo werek o.

⁸ Mene re, nerùgì nagaiya'lak. Hinebe netawì e. Wene omakeat yì lì'mathùgùp. Ninoe Etagepogot a'la akìkì logolìk, o like omakeat welagorek atì re, 1.000 tahun bake akikerek, Nen, 1.000 tahun atì re, o like nineki omakeat welagorek atì hakeat akikerek. Ma re, eperak higit enek akikerek o.

⁹ It apùnì aike nen he, “Ninoe Etagepogot en wene wa'nisasike wene a'nogo, ebe wagì'lek aregenma werek,” ìlùk akìlì'lùgì atì re, aregenma werek hùk. Hit hinebe etawì nen, at a'la nen he, “It aike nong asinogo,” ìlùk apùnì obogat inoabùt weak hagarì'lùgì mene heraksìlìk inoabùt hebelasuagalùk, eram enat a'la akìlìk aregenma werek atì.

¹⁰ Atì'nogo werek meneat he, apùnì wonogat werek kolek yì mene tì mene yogot wani kagarek atì hak, ninoe Etagepogot wesigin atì, atì'nogoat wesigin o. Atì like, pogot ebe omake hesigat sogoi ane hake ìlìk ìlìk lek agìk, yì mene tì mene pogot oba welagarek mene ero inomat etu nìkìk, kweang ebe mel, yì mene tì mene kweangma welagarek mel, obogat lek agìk, ìgìn o.

^11-12 Yì mene tì mene obogat atì'nogo lek asigin atì nen, hit hinoabùt nìkì'nogo hagatì logousak akegep. Ala nen hagasigin atì like pogot etu houmo re, amulok en heleleng hogo nìkìk, yì mene tì mene ero inom tamuk-tamak hogo nìkìk, igin atì nen, weak hagatì'lek tegelek logolìk, hinebe Ala hesik hisìlìk, at ebe serogo logolìk, ebe hepok wesuagalùk akiluk hogo hagatì logoino o.

¹³ Atì'nogo hagatì logolìk, nina'la nen he, “Ala nen wene wa'nisìkì logolìk, Pogot ket mene hagatìk, kweang ket mene hagatìk, hagasiginmo atoma kìlìk higit hogo nek hagatì logogun,” ìlùk, wene wa'nisasike a'nogo serogo welago.

¹⁴ Nerùgì nagaiya'lak. Hinebe netawì e. Atì'nogo wesigin ìlùk, serogo logolìk he, ùkùm hinoba hakìgì'legat, weak agì'legat, Ala hinom hano were'ma at ebe hisa Wesuak en, at hesik akiluk hogo hagatì logoino.

¹⁵ Atì'nogo hagatì logolìk, hina'la nen he: “Ninoe Etagepogot etaùken uan nen, hepok wagì'lek oan werek atì re, telninabigìlùk eram enat oan se'nisek werek,” ìlùk hina'la akano. At ninoe Paùlùt ebe ninetawì mene a'nogo Ala nen a'la kagalhìkomo wene atì'nogo ìlùk helal waganogo hinoba lakhei wagaike atì.

¹⁶ At en wene ninhùp-nanhùbat helal waganogo hinoba lakhei waga logolìk, wene atì mene hesik ikoat welagarek o. Mene re, wene at en helal waganogo hinoba lakhei wagarek mene atì re, wene aike hùthasak mea negen werek o. Were'ma re, it aike inetaùken pìre abolok werek mene hùgì nen, wene atì inokot logolìk, wene Ala nen isikomo Paùlùt en helal wanherek mene atì mel, it aike nen helal wanhukwa mene atì mel, wene higit werek meneat he, hebelogo kolothìlì'lùgì atì. Wene hebelogo kolothìkì logolìk, inokawerek enat inebe weagat hakìlì'lùgì atì.

¹⁷ Nerùgì nagaiya'lak. Hinebe netawì e. Wene atì oan haga'lagì'lek werek kolek he, hinelùrogo logouageip ìlùk sekek hogo yogohisìgì atì. Hinelu logolìk, hinokawerek hinetaùken wurik hogoat logoino. It apùnì aike inasuk ware'lek hagatarek mene atì nen, wene kolo wene yogohisìkì logolìk, hit en he, “Eberogoat”, ìlùk akìlìk hinetaùken wurik welagep mene atì kopologo hebikenem hinebe nongasinogo ìlùk, hinoabùt hebelogo logoino o.

¹⁸ Ninoe Etagepogot telninaperek mene oabùt hano a'nogo nen wo'nisikerek mene atì wanhìk, ebe hinelu agìk, ìkì logolìk he, hinetaùken wurik arìk logoino. Yogotak ya mel, hobuk mel, at Yesùt Karìsùt aligat hogorato motok logouok o, ìlùk, “Amin,” ìgì atì.