2 PETERÙT 2 - Ala Ane Wene Ket Mene Warogo Wo'ninapike Wene

“Ap Ala ane yogoisagarek mene salek hobuk weinam asugun,” ìlùk yogoisasike wene

¹ Alebat atoma re, ap Ala ane yogoisìkì lagaukwa mene inepema negen hagarogo wagaukwasik, inapeliagat ìkì lagaukwa mene, Ala againapùrì ina'lakwe melarìk wagaukwa. Ati hake, hobuk ap ebe wene yakùlhisìlì'lùgì mene inepema negen hagarogo wìrìk, inapeliak ìkì logogun mene hina'lakwe aike weinam arìk wesugunat o. Weinam arìk he, wene apùnì inebe weagarinaperek wene yogohisa ki wesugun. Ki wìrìk he, ninoe Etagepogot en it ninomat telninabigìlùk ninoko palhike meneat he, it en he, “At he, nit ninoe lek o. Ninokot,” ìlùk labelhì logogun atì. Labelumo re, inokawerek en ùkùm hepogat inoba hakìlìk weak akogoin o.

² Atì'nogo meneat he, it en inetaùken nen nikenem inekalì legat yì weak tì weak hagatenem, apùnì logolegat en it inoabùt waganogo hagatì logogun atì ba, it apùnì aike nen, Yesùt opolik lagaikarek wene, ebe wene atì, abok weak ugun o.

³ It ap Ala ane yakùlisagarek mene salek weinam asugun atì inoabùt he, “Nit enek wo'nisanìk,” ìlùk egarek mene atì nen, hit en oko wogisoagalùk, wene inokawerek ina'la nen kagalogo inapeliagat yogohisìkì logogun atì. Atì'nogo meneat he, it inoabùt hagatì logogun atì ba, at Ala nen he, “It atì ùkùm inoba hìlìk inebe weagarinabigin,” ìlùk hageat a'la tùlemat akasike hùk. Magarogo welagì'lek weagarinabigin mene werek o.

⁴ It malaikat Ala nen yoko pelaksa wagarek mene aike weak hagasukwama, Ala nen heraksìgì'lek, we, ùkùm hobuk inoba heigìlùk he, o mùmmo wea'ma ineki hele warek logouagalùk pelaksasike atì.

⁵ Atì higirat, apùnì hageat welagaukwa atem oba logolìk, Ala inabìt mene nen inoabùt weak hagatì lagaukwama Ala nen heraksìgì'lek. We, i naphap yelùk-salùk ìlìk inoasuagalùk inoba pelakhei wagaikomo inoatì logolìk, Nu, apùnì inoabùt Ala a'la walok mene hagatì logouagalùk wene yogoisìkì lagaike mene ho, inebe 7 ba aike ho, telinapike atì.

⁶ Nen, atì higirat, apùnì hobuk Ala inabìt arìk weak hagatì logogun mene, ina'la nen he, “Nit ninoabùt atì'nogo hagatì logogun halok, Ala nen herakhinìgì'lek, atì'nogoat ninoasigin hìgì,” ìlùk hùthìkì logouagalùk, apùnì o Sorom mene, Komara mene inom, Ala nen ùkùm inoba hìlìk motok heleleng hogo etu ba inoasike atì.

⁷ Atì'nogo inoatì logolìk, at Lot enek he, oabùt higit Ala walok mene hagatenem, it apùnì atoma mene inekalì lek weak hagatì lagaukwa ba re, at a'la kolo ago motok were'ma Ala nen telhike atì.

⁸ It atì inoabùt hagasusak lek mene weagat hagato werek en, at Lot oabùt higit mene ina'la logolìk, eileken isìgìk, asuk holhìk, ìkì logolìk he, ninhùp-nanhùbat a'la kolo ago motok welagaike.

⁹ Atì'nogoat he, apùnì aike Ala walok mene hagatenem ina'la kagaligìluk waganem, ninopase Ala Etagepogot en telinapìk, nen it aike weak hagarì'lùgì mene halok, ùkùm hobuk inoba heigìlùk, hagisek welagìk, atì'nogo hagasusak elu logolìgat elok hagasigin o.

¹⁰ It atì esin hake re, Ala ina'la meathìlìk, yì mene tì mene inetaùken nen nikenem weak hagarìk nùgì atì, Ala nen ùkùm inoba hegein o. Inayù'lek inabulagamweak hagatì logolìk, pogot oba mene hogorinapo welagaikarek mene atoma, it inayù'legat inabok weak palhì logogun atì.

¹¹ It malaikat Ala nen yoko pelaksa wagarek mene atì, inomame motok apik. Yì mene tì mene hagasusak elogat meneat he, it pogot oba hogorinaparek mene atì, ùkùm inoba houagalùk, ninoe Etagepogot oba wogisek lìlìk he, it en inabok weak palharek lek. Meneat he, it ap Ala ane yogoisagarek mene salek inapeliak ìkì logogun mene atì, inomame motok lek. It en yì mene tì mene hagasusak mea logolìgat he, it pogot oba hogorinaparek mene atì inabok weak palhì logogun atì.

¹² It ap Ala ane yogoisagarek mene salek inapeliagat yogoisìkì logogun mene atì re, wam etaùken lek mene ebe hakhìlìk wasuagalùgat ebe ta'lagarek atì hak, it ap atì nen wene hùthìgì'lek logolìk inabok weak palhì logogun atì ba, inokawerek inebe wam watarek atì hagat Ala nen inoasigin atì.

¹³ It en it aike weak hagarinapì logogun atì ba, Ala nen oko weak hagarinabigin atì. It he, inetaùken sebelùhùk likeneat weak hagasu walok en hagatì logogun atì. Su hano werek kolek he, muli mene oba labulagìk, eil ho ìgìk, ikerek atì hak, hit pesta isago nikenem, it atì inetaùken sebelùhùk, yì mene tì mene inetaùken nen nikenem yì weak tì weak hagatì logolìgat, hinoba ki wìrìk, hinom omakìma nìkì logogun atì.

¹⁴ It ap atì, ineilmo re, hìmì pailak haksìkì logousak mene peserek logolìk, inabìt hìgì'lek weak hagato motok logogun atì. Atì'nogo hagatì logolìk, apùnì Ala ane kerat wìlìk, inetaùken abolok werek mene lalinapì logogun atì. Inoabùt he, “Yì mene tì mene nit enek wo'nisanìk,” ìlùk ìkì logouogolùk hageat en yakùlhukwasik he, atì meneat inelu logolìk hagatì logogun atì. Atì'nogo hagatì logogun atì nen, Ala nen homan hisìlìk weagarinabigin werek o.

¹⁵ It atì re, kwe higit hogo lagaikarekkwe atì heraksalùk he, hageat at Pileam Peot aput kwe kwanìrogo lagaike atìkwe laga logogun atì. At Pileam a'la nen he, “An weak hagatenem oko wo'nesuak,” ìlùk a'la walok akasikomo,

¹⁶ Ala nen he, “Hat weak hagatùn o,” ìlùk asuk wasike. Wam keledai apot oba hù'larìk laganem, wam ane lek meneat he, at en Pileam yogotì logolìk, “Hat Ala ane yogoisìkì lagen mene yì re, motok weak hagaten o,” ìlùk apùnì inane baat wenagasike atì.

¹⁷ It ap atì inoabùt he, o hìbì ba i elesi heresok ikerek atì hak, heresok ìgìk, ohena sogoi en wolok lagarek atì hak, yùgùnat wogisek lagìk, ìkì logogun o. Ala nen it atì o mùm hikakse'ma atoma logouagalùk, inobùlùk hagarogo hisasikomo werek o.

¹⁸ Apùnì aike inerùgì inagaiya'lak koloat hagato kolek he, heraksalùk wùlìbi wesuogolùk ikenem, inetaùken nen nikenem hobuk weak hagasuagalùk, it ap atì inokawerek hogorakìkì logolìk we tùlemat inapeliagat ina'la kagalhì logogun.

¹⁹ Apùnì obogat he, yì mene tì mene omame arìk mabenetsikenem, omame asigin mene atì atitigeke welagaikarek atì nen he, it atì, inokawerek inebe weagarinaperek mene atì atitigeke logolìgat he, it apùnì aike yogoisìkì logolìk, “Hit nit ninoabùt wanugun halok he, hobuk hinalepma asugun o,” ìlùk we tùlemat yogoisìkì logogun atì.

²⁰ Apùnì re, kweangma weak hagatarek mene yoma heraksalùk, ninoe Etagepogot Yesùt Karìsùt telninapike mene ebe inelu arìgat he, hobuk inapotkwe weak hagatarek mene atì oba kikenem he, kìmalìn awì ba elugeke kikenem ìkìlogo hakhikerek atì hak, haksamo re, mabenat asugun atì. Maben arìk, emakum weak welagaukwa atì re, hamùlùgat hano negen. Mene re, hobuk weak asugun atì re, motok hùko negen weak arìk logogun o.

²¹ It atì ebe wene higit hogo musok lagaikarek atì inelu agì'lek logoilepma re, hano negen logoilep. Meneat he, inelu arìk en, wene Ala nen ninasuk wasike wene atì heraksalùk he, kwanìrogo lagaikarek atì nen, motok weak asugun o.

²² It atì, apùnì nen inane lagak hogo mel ìlùk egarek atì hak hagatì logogun: “Yeke nen lùk hemelogo hìlìk, hobuk apotkwo na lagarek atì. Nen, Wam ogat hano sobalek mene hobuk wokulmo hilele wasi kikerek atì,” ìlùk egarek atì hagat, it atì'nogoat eberogoat hagatì logogun atì.