2 PETERÙT 1 - Ala Ane Wene Ket Mene Warogo Wo'ninapike Wene

Hai warinapike wene

¹ Nerùgì nagaiya'lak. An Simon Peterùt Yesùt Karìsùt en, at atitigeke logouagalùk nayoko hìlìk lakhani wagaikomo wagagi. Ati re, at ebe Ala at logolìk, oabùt higit hogo nek hagaterek a'nogo nen, hit ninom higit hogoat ninetaùken at oba hìpìrethikenem telninabì'logo mene hùgì, wene yì helal waganogo hinoba lakhei wagì atì.

² Hit en Ala ho, ninoe Etagepogot Yesùt ho, eperak inebe sekek hogo hineluat welagep atì nen, it inoabùt hano a'nogo nen hano mene wokhisìgìk, hinetaùken hapuguthinapìk, hùkorogo iko motogat logouak o.

“Nit ninopase Ala nen wena'ninabìk ninayoko hesike,” ìlùk yogoisasike wene

³ At Ala esok motogat logolìk, yì mene tì mene elalinat hagatenem hogorato motok welagaikarek mene a'nogo nen ninayoko hesike atì. Halok, nit en at ebe sekek hogo ninelu arìk, nit ninebe nineluk logolìk, at hesik higit hogo hagatì logouagalùk, at okawerek omame ba yì mene tì mene wo'nisasikomo ese agosik welago.

⁴ It apùnì kweangma yoma yì mene tì mene walok en, inetaùken nen nikenem inoabùt weak hagarìk weak akagarek mene atì heraksalùk hese wùlìbi wìrìk he, Ala oabùt wanuagalùk, hano mene wo'nisìlì'logo atì. At en elalinat hagatenem hogorato motok welagaikarek mene a'nogo nen he, “Yì mene tì mene oko ba wanusak mea. Hano motok hùko mene, wokhisegein werek o,” ìlùk abok yogonisasike atì, ebe wo'nisìlì'logo atì.

⁵ Atì nen he, hit atì mene ese asuageip en, akiluk hogo hagatì logoino. Hinataùken Karìsùt oba hìpìrìk welagep mene atì oba louk hogo re, inoabùt higit hogo hagatarek atì mene ese arìk hagatì logoino. Higit hogo hagatì logolìk, atì mene oba louk hogo re, Ala ebe inelu agaikarek atì mene ese a'no.

⁶ Ala ebe hinelu logolìk, atì mene oba louk hogo re, inetaùken sebeksek welagaikarek mene atì, ese a'no. Hinetaùken sebeksek logolìk he, atì mene oba louk hogo re, yì hesik tì hesik hagatì logolìk, inepe morogo welagaikarek atì mene, ese a'no. Hinepe morogo logolìk he, atì mene oba louk hogo re, Ala awe a'ma logolìk, at a'la walok akikerek higit hogo hagatarek mene atì, ese a'no.

⁷ Ala a'la walok akikerek higit hogo hagatì logolìk, atì mene oba louk hogo re, inerùgì inagaiya'lak inetawìrogo welagaikarek atì mene, ese a'no. Hinerùgì hinagaiya'lak hinetawìrogo logolìk, atì mene oba louk hogo re, apùnì inebe obogat inetaùken hutik welagaikarek atì mene, ese a'no.

⁸ Hit he, hinoabùt atì mene obogat ese arìk, hobugalep hùkorogo ese arìk logogun atì nen, we tùlemat alemarogo welagì'lek, ninoe Etagepogot Yesùt Karìsùt sekek hogo hinelu asugun o.

⁹ Atì'nogo meneat he, it hit mene he'na nen inoabùt atì mene ese agì'lek logogun halok he, ineileken mùmat apumeke salek werek. Atì'nogo logolìk, it en he, “Weak hagatì lagagu mene, Ala nen sobalninapike,” ìlùk usak meneat he, at oba lì'mathìlìk werek atì.

¹⁰ Atì nen he, nerùgì nagaiya'lak. Hinebe Ala nen wenakhinabìk, hinayoko hesike atì re, eberogoat haga'lasuagalùk, hit en akiluk hogo hinomamerogo hagatì logoino. Atì'nogo hagatì logogun halok, hinetaùken Ala ha hìpìrìk mene heraksalùk wùlùbugun lek o.

¹¹ Ninoe Etagepogot Yesùt Karìsùt telninabì'logo mene a'nogo, kain motogat logoginmo atoma hika kìkì logolìk, at en he, “Hit hinebe esewerek o,” ìlùk, hai warogo hanorogo wokhisek kigin o.

¹² Atì nen he, wene ebe wene hinelu agagisip hinetaùken wurik hogo hesogo welagasep meneat he, an nen wene ìgì atì hesik ninhùp-nanhùp hina'la ebethisiko motok logogin o.

^13-14 At ninoe Etagepogot Yesùt Karìsùt en yogonesike hagat, an nebe nagasabeke mene elama hesik welagì yì re, heraksalùk hepok legein hjgit welagì, ìlùk an nelu welagì atì nen he, yogotak nebe neluk welagì ya ba re, wene atì hesik hina'la eberogo yogohisiko motok logousak akìkì lagì o.

¹⁵ Hobuk nebe wa'lagì halok, wene atì hit hina'la eberek motok logouageip en ìlùk, hanorogo yogohisìkì logogin o.

“Yesùt ebe hogoratarek mene yì'nogo nineileken hasugu,” ìlùk yogoisasike wene

¹⁶ Ninoe Etagepogot Yesùt Karìsùt omame apik a'nogo ebe wagaike mene hesik hinelùrogo yogohisìkì lago atì re, wenesuayo apùnì ina'la kagalogo pìlìngìtarek mene atì oba lìrogo yogohisìkì lago lek o. We, at ebe Etagepogot mene wagaikomo, ninokawerek nineileken tomok hasugu mene nen yogohisìkì lago o.

¹⁷ Nit o atoma were'ma, ninopase Ala nen, at Yesùt ebe hogoratìk, hai watìk, ikenem nit ninasuk holhugu. At Ala ebe esin hogorato motok welagaikarek mene a'nogo nen he, “An naput netaùken hutik mene na'la hai hakìgìrek he, ebe arìat,” ìlùk,

¹⁸ ane pogot oba nen pelakhei waganem, nit Yesùt ninom tom Ala okawerek atom ùkùl atì ba logolìk ninasuk tomok holhugu.

¹⁹ Atì'nogo holhugu atì nenat, nina'la nen he, “It ap Ala ane yogoisìkì lagaukwa mene nen isukwa mene atì eberogoat,” ìlùk alep hamùlùgat negen akìkì lagagu mene, hobuk ninasuk holhugu atì ba nen, motok tùkùm hogo hùthasugu atì. Halok he, o mùm abirat were'ma, apùnì nen esage kìalogo hikenem, lìarogo motok welagaikarek atì hak, wene atì hinetaùkenma eberogo motok wanhì logoino. Atì'nogo wanho were'ma, hobuk o mùm mene we iko kolek, hesagal wap lìabi wagarek atì hak, at Karìsùt hinetaùkenma lìathinabi wesigin o.

^20-21 Wene Ala ane atì re, it apùnì ina'la kagalogo aike isukwa lek o. We, inebe apùnì meneat he, Ala Areagùn nen ina'la kagalogo yakùlisiko kolek, Ala nen isike wene atì yogoisìkì lagaukwa atì nen, wene Ala ane helal waganogo hesukwa mene werek atì, Ala Areagùn nen nina'la kagalhì'le'ma, ninokawerek ninaligat en sekek hogo hùthasak mea o.