2 KORÌTÙT 9 - Ala Ane Wene Ket Mene Warogo Wo'ninapike Wene

Ala againapùrì nen inerùgì inagaiya'lak aike leberisasak wene

¹ An nen he, hit en it Ala againapùrì o Yurea mene leberisùogolùk atogotì lagep mene atì hesik, wene helal waganogo hinoba lakhei wesusak lek mene lakhei wagì atì.

² Hit en he, it atì leberisùogolùk akiluk hogo hagatì lagep atì, hinoabùt an nelu. An nen hit hogothinapì logolìk, it apùnì o Maketonia yoma mel yogoisìkì lagì: “Tahun alep a'lì ba nen, it apùnì o Akaya atoma mene nen it atì tì'nogo leberisùogolùk it mene atogorogo hesukwasik werek,” ìlùk agaugethinapì lagì. Hit akiluk hogo hagatì lagep atì ba nen, it apùnì yoma aike inebe logolegat en it atì hisùogolùk inetaùken abolok ìlì'logoat.

³ Hit hinoabùt hagatì lagep atì hesik, nit en hogothinapì lago mene atì, “We tùlemat hogorinapì lagoma,” ìlùk inogo ìlùk he, hit en an ìgì hak hisìlìk logouageip en ìlùk, ninagaiya'lak hinoba laksa wago atì.

⁴ Atì'nogo laksa wagì atì re, hit en oan atogorogo hisìgì'lek were'ma, an apùnì Maketonia mene ninom hinoba wesusak mea o. Alebat an nen ìkì logolìk, “It tì'nogo eberogoat hano hagasugun werek o,” ìlùk isigisi'mo re, an nekalì agìk, hit hinekalì agìk, inogo ìlùk, it tak laksa wagì atì. Hit en wene atì hesik hùthasigisipmo re, hit hinekalì asinogo ìlùk yogohisasak lek mene ìgì atì.

⁵ Atì'nogo oan atogorogo hìgì'lek logogun halok mea atì nen, an oan wagi'lek logolìk ninagaiya'lak atì tak laksa wesigìlùk ìgì atì. It hinoba wìrìk he, hit an atì hisùogolùk abok isigip mene a'nogo, it en elùgùn warogo atogosi wesuagalùk ina'la kagalogo yogoisìkì lagì. An atì'nogo hagatì lagì atì re, hit hinagarok hinetawì werek kolek it en keirogo hina'la kagalumo hisasak mea. We, hit hinetaùken nenat hisìlìk were'ma hano, ìlùk hagatì lagì atì.

⁶ Wene atì hesik igin yì hina'la hùthani. It apùnì aike nen awì hamùlùk hogo yarì'lùgì mene re, eken hamùlùk hogo palugun o. Nen, it aike awì hùkorogo yarì'lùgì mene ebe hùkorogo palugun o.

⁷ Apùnì ina'la hai motok hakìkì logolìk it aike hisagarek mene atì, Ala nen inebe etawì welagarek atì nen he, hit hinebe lopok hinagarok hinetawì werek kolek, it aike nen hina'la keirogo kagalhenem hisasak mea o. We, hit hina'la hano logolìk, hinokawerek hina'la nenat kagalogo hisasak o.

^8-9 Apùnì inoabùt hano hagatarek mene hesik, Ala ane ba helal mel waganek werek: “It en hano mene apùnì ya wogisìgìk, ta wogisìgìk, sùpùrisìkì logolìk, it aike inelageik mene sùpùrisagarek. Inoabùt hano nen wogisagarek atì, Ala a'la eberek motok logogin o,” ìlùk helal waganogo hesukwa hak, at Ala oabùt hano nen, yì mene tì mene oba hilarogo wokhisikenem, hit ninhùp-nanhùlp hinokawerek hesik elok logolìk, oba hilarogo it aike hanorogo leberisìkì logouageip ìlùk, Ala nen elok wokhisasak werek o.

¹⁰ At Ala nen it awì yatarek mane awì wogisìgìk, sùpùrùk ebe noagalùk wogisìgìk, ikerek atì. Atì'nogoat, at enat, awì yasuagalùk palisagarek hak, hinoabùt it aike leberisìkì logousak atì mene wokhisìgìk, nen awì yatenem eken hukorogo isu hak, it aike hinetawì nen leberisikenem hùkothigìk, igin o.

¹¹ Atì'nogo wokhisamo re, hit en, yì mene, tì mene oba hilarogo logolìk, hineki hùkoat it aike leberisìkì logogun o. Atì'nogo leberisogoin mene atì, nit en sùpùrogo wogisikenem he, Ala hai wasugunat o.

¹² Hit apùnì hinetawì nen leberisogoin atì ba re, Ala againapùrì inekim lek mene nek elogothìkì logogun hùk. We, titelasu hak he, apùnì logolegat en Ala hai hùkorogo watì logogunat o.

¹³ Atì'nogo leberisìkì logogun atì ba, it Ala againapùrì o Yurea mene nen he, “It apùnì Korìtùt mene Karìsùt hagasike wene hano wene a'nogo wanhukwasik, Ninoabùt higit hogo hagatì logogun o, ìlùk isukwa higit hogoat hagarì'lùgì. Atì'nogo hagatì logolìk it mene aike inamùkwì agì'lek nit lebe'nisìgìk, it aike obogat leberisìgìk, ega o,” ìlùk hinoabùt enagat palhìlìk Ala hogorasugunat o.

¹⁴ Atì'nogo hogoratì logolìk, it en he, “Ala oabùt hano a'nogo nen, it en apùnì hùkorogo leberisìkì logouagalùk inoabùt atì mene wogisikomo hagarì'lùgì,” ìlùk hinebe inetawì logolìk Ala ayoko hùkorogo hìkì logogun atì.

¹⁵ At Ala nen hano motok nit en pìlìngìrogo usak mea mene wo'nisasike atì hesik hogoratì logouok o.