2 KORÌTÙT 8 - Ala Ane Wene Ket Mene Warogo Wo'ninapike Wene

Ala againapùrì nen it aike inetawì nen uang atogorogo hisasukwa mene hesik yogoisasike wene

¹ Nerùgì nagaiya'lak. At Ala oabùt hano a'nogo nen againapùrì o Maketonia mene yoma inoabùt hano hagarinapomo hagata mene hinelurogo yogohisak.

² It apùnì aike nen yì aik tì aik apigat weagarinapo kolegat he, it ina'la hai hùkorogo hakìlì'lùgì atì ba inoabùt enagat aga. It inagarok motok lek inelageik logolìgat he, it mene apigat, lebek hogo it apùnì aike wogisìlì'lùgì atì.

³ Wogisasak higit hogo wogisìkì logolìk aike inom oba louk hogo wogisìlì'lùgì. An inoabùt nelu. Neileken isìgìrìk en yogohisìkì lagì o. It apùnì aike nen ina'la kagalhì'le'ma, inokawerek ina'la nen kagalogo,

⁴ mel yogonisìkì lagaika: “Nit en hogo re, Ala againapùrì o Yurea mene aike leberisùok en ìlùk yogoheto o,” ìlùk nit yogonisiko motok welagaika.

⁵ Nit nina'la nen he, “It tì'nogo hogoin,” ìlùk akogo mene werek kolek, inebe tak ninoe Etagepogot wogotasik en, at Ala a'la akasike hak, inebe nit wo'nisagaat o.

⁶ Wo'nisagama re, at Titut hit hinom logolìk, hit en Ala againapùrì aike hinetawì nen leberisùogolùk isigip mene atì hesik yogohisìkì laga hak arat atogosuagalùk a'la kagalho.

⁷ Hit he, yì hesik tì hesik hano motok hagatì lagep. Atì re, hinetaùken Ala oba ning hogo hìpìrethìgìk, hano wene hano motok yakùlisìgìk, ebe wene hano motok hinelu agìk, apùnì aike leberisùogolùk akiluk hogo hagatìk, nit hinetawìrogo motok welagìk, egesep atì hak, hit mene it Ala againapùrì aike atì hano motok hisoageip ìlùk yogohisìgì o.

⁸ An nen, “Hit tì'nogo haga'no,” ìlùk, nane keirogo yogohisìgì lek o. We, it Ala againapùrì o Maketonia yoma mene nen ina'la nen kagalogo it mene atogorogo Ala againapùrì aike atì akiluk hogo leberisìlì'lùgì atì hak, hit an hogo re, it atì hinetawìrogo laberisikenem, “Eberogoat it inetawì werek,” ìlùk enagat asuagalùk yogohisìgì atì.

⁹ Ninoe Etagepogot Yesùt Karìsùt oabùt hano nen etawì'ninapike a'nogo hit hinelu motok akìgì. At he, ebe Ala mene logolìk he, eilmo wùlalhak welagaike meneat he, at elageik agaike atì ba, hit ebe mene hineilmo wùllalhak asuageip ìlùk, at ebe nit apùnì mene agaikesik elageik agaike atì.

¹⁰ Leberisasak atì hesik, an na'la akìkì lagì mene yogohisak. Tahun alep a'lì ba re, apùnì aike oan werek kolek, hit en tak, “It atì leberisùok,” ìlùk wene palhigisip hinabìt logolìk leberisìgì'lek, we, akiluk hogo leberisùogolùk aike hisasigip atì hak, yogotak elùgùn warogo leberisoageip ìlùk yogohisìgì o.

¹¹ Hit en alep akiluk hogo it aike ati hinetawìrinapigisip, “Tì'nogo leberisùogolùk,” isigip atì hak, yogotak atì'nogo hinekim asigin lopok akiluk hogo elùgùn warogo atogosuageip ìlùk yogohisìgì o.

¹² Hit mene lek mene hùk. At he, werek mene hinetaùken oba nen it atì hisogoin halok he, at Ala nen, “Hano haga,” ìlùk akegein.

¹³ Hit enek ekin hogo leberisikenem, it en ina'la se welegat wanuagalùk yogohisìgì lek o. We, hinom higit hogoat lebet-lebet ìkì logousak ìlùk yogohisìgì o.

¹⁴ Hit mene yogotak apik werek atì. Halok, it lek werek mene atì hisasak o. It mene hobuk apik arìk he, hit lek werek halok aike hikasak atì. Atì'nogo hagasugun halok, hit en leberisìgìk, it en lebethikìgìk, hinom higit hogo ìkì logogun atì.

¹⁵ Atì'nogo hagatì logousak atì hesik, Ala nen he, mel isike: “At aike agarok apik nomologo hakegein mene atì titelogo hegein lek o. Nen, at aike agarok hamùlùgat nomologo hakegein mene atì lek asigin lek o,” ìlùk isikomo helal waganogo hesukwa.

Paùlùt en Titut agaiya'lak inom inayoko hìlìk laksasike wene

¹⁶ Nit en hit hesik keirogo hagasuogolùk hagatì lago hak, at Titut atì'nogoat hagatì logouagalùk Ala nen a'la kagalhomo hagarì'logo atì nen, Ala hai watì logouok o.

¹⁷ Atì re, nit en at a'la kagalho meneat he, nit en, “Hat lan,” ìlùk ninane keirogo yogotoma waga hùk. We, at okawerek a'la kagalarìk he, motok keirogo etaùken hinoba logolìk he, “It inoba legein,” ìlùk hinoba waga atì.

¹⁸ Ninagaiyak aike hano wene yogoisìlìk nikenem he, it Ala againapùrì o yì awì tì awì nen he, “At oabùt hano,” ìlùk hogorarì'lùgì mene, at Titut eperak laksa wagì atì.

¹⁹ Atì nek hùk. It Ala againapùrì nen it atì leberisùogolùk hisaga mene atì, at atì ninom en atogorogo hìlìk wogisa loagalùk menhagaat o. Atì'nogo wogisa laganem, ninoe Etagepogot hogoratì logolìk, “It Paùlùt lak inoabùt he, it aike leberisasak elok werek,” ìlùk enagat asigin atì.

²⁰ Apigat hisìlì'lùgì mene atì, nit en atogorogo wìlìk laganem, it apùnì aike nen ninabok weak palinogo ìlùk he, ninetawì wekelogo motok hagatì lago.

²¹ Atì'nogo hagatì logolìk he, ninoe Etagepogot eilhanem enek ninoabùt higit hogo hagatì logouogolùk ìkì lago lek. At he, ninoe Etagepogot mel, apùnì mel, ineilhanem ninoabùt higit hogo hagatì logouogolùk akìkì lago.

²² It atem inom hogo, ninagaiyak aike lakhei wagiat o. At atì re, yì hesik tì hesik ninhùp-nanhùp apùnì aike akiluk hogo leberisikenem oabùt enagat palhoresik he, hinoba lakhei wagì atì o. At en he, “It hano hagasugun,” ìlùk etaùken hinoba lakhesikesi'mo nogo nen he, yogotak hit lebethisagalùk a'la motok akiluk hogo waga atì o.

²³ Nen, at Titut atì re, an nagaiyak hit lebethisùogolùk neperak yabu hagatorek mene. Nen, ninagaiya'lak aike at inom wagaika atì re, hano hagatenem it apùnì aike nen inoabùt palharesik Karìsùt hogorarì'lùgì mene, Ala againapùrì nen inayoko hìlìk laksa wagaikama wagaika atì.

²⁴ Ala againapùrì aike nen be, “It o Korìtùt mene nen it Titut lak inebe eberogoat inetawì werek,” ìlùk ìgìk, nen, “It Paùlùt lak en it Korìtut mene hano hagasugun ìlùk agaugerinaparek a'nogo eberogoat,” ìlùk ìgìk, uagalùk, it atì hinetawìrogo woginabino o.