2 KORÌTÙT 6 - Ala Ane Wene Ket Mene Warogo Wo'ninapike Wene

^1-2 At Ala nen he, mel isikomo helal waganogo hesukwama werek: “An nen he, hit hinane nasuk holusak akìgì baat holhì o. Hinebe telhinabusak higit obaat lebethisa wagì o,” ìlùk isike atì re, Ala nen ninane asuk holusak he, o yogotak yaat o. Nen, ninebe telninabusak he, o yogotak yaat o, ìlùk hina'la ebe'ni o. Halok he, nit Ala ninom at hesik hagatì logolìk he, at oabùt hano nen etawìthinapikomo, at ebe wanhigip a'nogo, we tùlemat alematùp o, ìlùk hinasuk watì lago atì.

³ Apùnì aike nen he, “Hit Ala hesik hagatì lagep atì kolo hagatì lagep,” ìlùk ninabok weak palinogo ìlùk he, apùnì aike weak hagasuagalùk ina'la kagalogo yì hake tì hake kolo mene hagatì lago lek.

⁴ Apùnì nen he, “It Ala nen inayoko hesikomo, at hesik hagatì logousak meneat hagarì'lùgì,” ìlùk hùthinoagalùk he, yì aik tì aik haga'ninapìk, wiik-weak hogo haga'ninapìk, hobo'nisìgìk, iko kolek, ninepe morogoat logolìk yì mene tì mene enagat hagatì lago.

⁵ Tùgì ninoatìk, nineki hele warogo o hele warek hisagarek oba hinìgìk, apùnì logolek en ninoba lìmamìt palìk palìk ninoasusak haga'lagìk, iko kolek welago. Yabu set apik hagatìk, nogo usak lek agìk, sùpùrùk nele agìk, ìkì logolìk hagatì lago.

⁶ Atì'nogo hìkì logolìgat he, ninoabùt weak hagatì'lek tegelek logolìk, hano wene ninelu welagìk, ninepe morogo welagìk, ninoabùt enago welagìk, ìkì lago. At Ala Areagùn nina'la logolìk apùnì inebe eberogoat ninetawìrogo welago.

⁷ Atì'nogo logolìk, Ala omame ba ebe wene yogoisìlìk nìkì lago. Atì'nogo yogoisìlìk nìkì logolìk, apùnì nen he, “Sige sike nineki pìre wùrat welago,” ilùk egarek hak, nit Ala a'la walok mene hagatì lago atì, nineki pìre wùrat welago.

⁸ It aike nen hogo'ninapìk, ninabok hano ìgìk, iko kolek, it aike nen wena'nisìgìk, ninabok weak palhìk, ìlì'lùgì. Wene eberogoat yogoisiko kolek meneat he, “Inapeliak lalninabì'lùgì,” ìlùk wena'nisìlì'lùgìat.

⁹ Apùnì nen ninebe inokot mene salek, obogat en inelu meneat welagìk, ninebe wa'lasuagalùk haga'ninabì'lùgì meneat he, nineluk welagìk, yì aik tì aik haga'ninapo kolegat he, ninebe motok wa'lagì'lek welagìk, ìkì lago atì hani!

¹⁰ Nina'la weak logolìgat he, hai hakiko motok welago. Yì mene tì mene ninekim lek meneat he, apùnì logolegat ebe mene ineilmo wùlalhak asuagalùk hagatsìkì lago. Ninagarok motok lek meneat he, ebe mene obogat ese agosik welago.

¹¹ Atì'nogo logolìk he, hit apùnì Korìtùt mene, nerùgì nagaiya'lak. An na'la wene aike sebelhìgì'lek motok pak hogo yogohisìgì atì. Ma re, hit hesik an na'la healek welagì.

¹² Nit en hit hesik he, nina'la atì'nogo healek welago meneat he, hit enek he, nit hesik hina'la ekin welagep o.

¹³ Halok he, hit en lagak hogo nit hesik hina'la healini o, ìlùk an nokawerek nagainapùrì yogoisa hak yogohisìgì atì.

“Apùnì inetaùken Ala oba hìpìrethìgì'lek mene hinom hùnesusak lek,” ìlùk inasuk wasike wene

¹⁴ Hit apùnì inetaùken Ala oba hìpìrethìgì'lek mene atì, hinom agale hùnetùp o. Apùnì higit hogo hagarì'lùgì mene mel, inasuk ware'lek hagarì'lùgì mene mel, inom hutik logousak nogo? O lìa atì mel, o mùm atì mel, inom apìma logousak nogo? Motok mea o.

¹⁵ At Karìsùt Ibilit eperak, inetaùken omakeat logousak nogo? Nen, apùnì inetatùken Ala oba hìpìrethìlì'lùgi mene, it aike inetaùken Ala oba hìpìrethìlì'lùgì lek mene inom hutik logousak nogo? Motok meat o.

¹⁶ At Ala awì wùrìrik atì mel, tùgì atì mel, inom omakìma lapuguthousak? At Ala eluk motok welagarek mene awì wùrìk he, nit ninebe yìat o. At an he, mel isike. “It ina'la an nawì wùrogo logogin o. Ina'lakwe ama nìkì loungin o. It inopase Ala anat logogin o. Nen, an nagainapùrì irat logogun o,” ìlùk isike atì nen he.

¹⁷ Ninopase Etagepogot a'nogo nenat, aike mel isike: “Hit hinebe it apùnì aike ina'lakwe, ina'lakwe, welagep atì heraksalùk he, nomok hogo wùlìi we'ni o. Wùlìbi waganem he, an nen wokhinabik en, weak mene atì hobuk hineki haka kùgùp o.

¹⁸ An hit hinopaseat logogin o. Nen, hit an nagainapùrìat logogun o, ìlùk ninopase Etagepogot yì mene tì mene hagasusak enek a'nogo nen isikomo,” ìlùk helal waganogo hesukwa.