2 KORÌTÙT 5 - Ala Ane Wene Ket Mene Warogo Wo'ninapike Wene

¹ Apùnì inawì wùrìk mesalaganem hobuk ket wùtarek hak, nit ninogat kweangma elama hesik welago yì, wa'lago halok he, pogot oba ninebe ninesok motok logogin mene apùnì nen agauak hagatì'lek mene Ala nen hagarogo hinegein mene werek o, ìlùk hùthìkì lago.

^2-3 Su nokolhenem inalulukwa agaikarek hak, ninebe hobuk logogun mene atì oan werek kolek, ninogat yì lek aganem he, welegat logoinogo ìlùk, su eilemkwe laberek werek kolek, etakwe labetarek hak, ninogat yì werek kolek he, ninebe pogot oba logogun mene atì labethinasak mene ìlùk, oba ebet-ebet welago atì nen he, weak logolìk, “Eige,” ìlùk akìkì lago.

⁴ Ninebe elama hesik yì logolìk he: “Eige,” ìlùk ninoba ekin-pekin weak welago. Atì re, ninogat yì mene nokologo heraksìlìk, welegat logou walok en ìkì lago hùk. We, yì werek kolek he, hobuk ninebe nineluk motok logogun mene atì labethinamo re, ninogat wa'lagorek mene yì nabùlal-habùlal haga'ninabuagalùk ìkì lago.

⁵ At Ala nenat hobuk atì'nogo haga'ninabigìlùk tegelogo hinasikesik, “Eberogoat hagathinabigin,” ìlùk, yì mene tì mene lilu tak nekarek hak, Areagùn wo'nisasikomo nina'la werek.

⁶ Atì'nogo logolìk, hobuk hano asigin, ìlùk nina'la se welago. Apùnì o hobuk wùrì'mo logouogolùk alep wùrì'mo welagaikarek hak, ninogat yì mene ba logolìk he, ninoe Etagepogot aua ninom logogun oba atì walegat welago, ìlùk ninelu.

⁷ Nit he, nineileken hìkì lago mene yoma oba hakothìlìk welago hùk. We, ninetaùken at Yesùt oba hìpìrethìlìk welago.

⁸ Atì nenat nina'la se welago. Ninogat yì kopologo heraksalùk, ninoe Etagepogot were'ma kìlìk ninom logou walok e, akìkì lago.

^9-10 At Karìsùt en nit obogat ninogat yì ba logolìk hagatì logogun mene lopok ninanema waganogo ùkùm ninoba hìgìk, kotìk, ìkì logolìk, hano hagato mene halok, “Hano,” ìgìk, nen, weak hagato mene halok, “Weak,” ìgìk, higit hogoat yogonisegein o. Atì'nogo yogonisegein atì nen he, nit o yoma okùlùk logolìk mel, hobuk at aua kìlìk mel, ninetaùken tùlem, at a'la hanorogo nek hagatì logou walok en hagatì lago atì.

“At Karìsùt en Ala ninom ninapotkwe lapuk hogo hinasikomo welago,” ìlùk yogoisasike wene

¹¹ Atì nen he, ninoe Etagepogorat ninayùk hogo logousak ìlùk hùthìkì logolìk he, apùnì nen wene atì hùthoagalùk ina'la kagalogo yogoisìlìk nìkì lago. Nit ninoabùt hagatì lago atì re, at Ala eilhanem weinam atì hak, hit hina'la nen nit hùthinìkì logousak akìkì lagì o.

¹² Atì re, hit en nit hogo'ninabuageip ìlùk ninokawerek en agaugerakìkì lago lek o. We, it apùnì aike inetaùken hesik he, hogorakìgì'lek, inogat etakwe hesik hogorakikenem he, hit en oko nit ninabok hano ìkì logolìk agauge'ninabuageip en ìlùk yogohisìgì o.

¹³ It apùnì ineileken nisikenem, sìnì'nùk hake welago halok he, atì Ala hesigat o. Mene re, ninepe hebelek hake welago halok he, hit hesigat o.

¹⁴ At Karìsùt nit ninebe etawì'ninaperek atì nen ha'nisek welagarek. At aligat nit obogat hesik wa'lagaike atì. Halok he, nit obogat wa'lagaguat o, ìlùk hùthìkì lago.

¹⁵ Nit obogat hesik wa'lagaike atì re, nit ninebe ninokawerek hesik nineluk logouagalùk wa'lagaike hùk. We, nit ninebe at hesik logouagalùk, at ebe nit hesik wa'lagaikesik en apotkwe eluk agaike atì.

¹⁶ Atì nen he, nit en hùlì yogotak ya hùlì nen he, apùnì nen inoabùt palharek hak, it apùnì aike inoabùt atì'nogo palhì lago lek o. Nen, alep he, Karìsùt oabùt atì'nogo palhugu hak, hobuk atì'nogo palhì lago legat o.

¹⁷ Apùnì inebe Karìsùt inom hutik werek halok he, inoabùt ket mene elalinapomo werek o. Alep mene legat aga. Hobuk ket mene haga'laga.

¹⁸ Mene re, yì mene tì mene atì obogat at Ala nenat hagaterek o. At enat Karìsùt hagasike atì ba, Ala okawerek ninom lapuk hogo hinasike. Atì'nogo hinasikesik he, apùnì aike at inom inapotkwe lapuk hogo hisagalùk wene atì nit en yakùlisoagalùk nit ninoba hesike.

¹⁹ Wene ninoba hesike atì ebe re, mel. At Karìsùt ebe hùlìsanem logolìk hagasike atì ba, Ala nen yì apùnì tì apùnì obogat at okawerek inom lapuk hogo hinasike. At en atì'nogo hinìkì logolìk, nit apùnì nen weak hagatorek mene ùkùm ninoba hìgì'lek sagalogo heraksasike atì. At en atì'nogo hagasike wene atì nit en yogoisìlìk nìkì logouagalùk ninoba hesike.

²⁰ Nit he, Karìsùt enat, ninayoko hìlìk lakhina wagaikomo wagagusik he, Ala nen wene yogohisa hak, hinasuk watì lago atì. Atì'nogo watì logolìk, “At Ala nen hobuk hinapotkwo lapuk hogo hikoak en he, at hinom lapulini o,” ìlùk Karìsùt etage palogo ninane lìok hogo yogohisìkì lago.

²¹ Nit Karìsùt ninom hùneto halok, at Ala nen okawerek ninom ninapotkwe lapuk hogo hinagalùk, nit hesigat nit ninoabùt weak hagatorek mane atì, at Karìsùt weak hagatì'lek mene oba hesike atì.