2 KORÌTÙT 4 - Ala Ane Wene Ket Mene Warogo Wo'ninapike Wene

“Ebe meneat he, isoak ekalasusak mene a'la hinago werek,” ìlùk yogoisasike wene

¹ At Ala ninebe etawì nen he, at hesik yì'nogo hagatì logouagalùk ninayoko hesike atì nen he, nina'la pùk arìk heraksìgì'lek hagatoat welago.

² Nit he, apùnì nen yì mene tì mene hinagasogo weak hagataresik inekalì agarek atì mene heraksasugu. Atì'nogo heraksìlìk, apùnì lalinapìk, Ala ane wene aike mene oba labelogo yogoisìgìk, ogorek lek. Apùnì yoma ina'la lopok en hùthinoagalùk he, wene ebe wene Ala eilhanemat sele'maat yogoisìlìk nìkì lago.

³ Hano wene yogoisìlìk nìkì lago atì, apùnì aike nen hùthìlì'lùgì meneat he, it apùnì alema'larì'lùgì mene enek he, wene atì hesik inetaùken apumeke laberek werek o.

⁴ Atì'nogo werek atì re, it apùnì kweangma mene inopase Ibilit a'nogo nen inetaùken Ala oba hìpìrethìgì'lek mene atì, inetaùken mùmerinapikomo werek o. At Karìsùt Ala hakeatma re, ebe hogoratarek wene, hano wene atì nen lìarinabusak meneat he, lìarinabinogo ìlùk, inetaùken mùmerinapikomo werek atì.

⁵ Wene yogoisìlìk nìkì lago atì re, ninokawerek hagatorek wene hùk. Lek o. We, at Yesùt Karìsùt hagasike weneat o. At Yesùt ebe ninoe Etagepogot ìlùk he, nit at hesik hit hinatitigeke welago, ìlùk yogoisogorek atì.

⁶ At Ala nen ìkì logolìk he: “O mum atì a'la nen lìa a'nìk,” ìlùk isike atì hak, at enat nit nina'la mùm mene atì lìa'ninapikomo welago. Atì'nogo logolìk, at Karìsùt elokoken apipin yatenem nineileken lakhìlìk he, at Ala hogoratarek mene a'nogo ebe atìgìnìk ìlùk hùthìkì logouagalùk atì'nogo lìa'ninapike atì.

⁷ Nit wene yì'nogo yogoisìlìk nikenem, apùnì ineileken nisìkì logolìk, ina'la nen he, “It inomame lek. We, at Ala omame apik hìgì,” ìlùk enagat hùthìkì logouagalùk, isoak kweang mene hagarogo hinatarek hak, hano mene atì nit maben mene nina'la hinikomo werek o.

⁸ Apùnì nen nit yì aik tì aik haga'ninabì'lùgì mene, ninebe motok weaga'ninapì'lek welago. Atì'nogo haga'ninapenem, nìkì'nogo hagasu he, ninoake palarì'logo meneat he, ninetaùken huni arì'logo lek.

⁹ It apùnì aike nen, weaga'ninabuogolùk ìlì'lùgì meneat he, at Ala nen ninaligat herakhinìgì'lek o. Tùgì ninoatenem tukwak hogo laga lago meneat he, ninebe motok wa'laga lago lek o.

¹⁰ Atì'nogo wa'lagì'lek welago atì ba, at Yesùt ebe wa'lagaikesik eluk agaikesik he, nit nina'la eluk welagarek atì, enagat asuagalùk, at wasukwa hak, nit ninhùp-nanhùp ninoasuogolùk ikenem telninaperek atì.

¹¹ At Yesùt wa'lagaikesik eluk agaikesik nit ninebe wa'lagorek mene yì nina'la eluk welagarek atì enagat asuagalùk, nit yogotak nineluk werek kolek, at Yesùt hesik ninhùp-nanhùp ninoasuogolùk ikenem telninaperek atì.

¹² Apùnì nen nit ninagasabeke wa'lasuagalùk haga'ninabì'lùgì atì ba, Ala nen hit hinebe hineluguthinabì'logo atì.

¹³ At Ala ane ba helal waganogo hìkì logolìk he, mel isukwa: “Netaùken at oba hìpìrìk logolìk nane ìgì o,” ìlùk isikomo helal waganogo hesukwa higit hogoat, nit he, ninetaùken at oba hìpìrethìlìk wene yogoisìkì lago atì.

¹⁴ Atì'nogo yogoisìkì logolìk, nina'la mel akìkì lago. At Ala nen he, ninoe Etagepogot Yesùt apotkwe eluguthesike atì hak, nit at ninom higit hogoat ninelugu'ninabìk he, hit ninomat Yesùt oba hina legein ìlùk ninelu.

¹⁵ Nit yì aik tì aik obogat hìkì lago atì re, hit hesigat o. Atì'nogo hìkì lago ba, at Ala oabùt hano motok en apùnì aike etawìratìk, aike etawìratìk, inebe logolegat etawìrinabìk telinapenem he, inebe logolegat en, Ala hai warì'lùgì atì ba, it aike nen Ala hogorarì'lùgì o.

“Ninetaùken Ala ba hìpìrethìlìk hagatì logousak,” ìlùk yogoisasike wene

¹⁶ Atì nenat, nina'la pùk arìk heraksìgì'lek ning hogo hagati lago. Ninogat etakwe yì re, weak aga kolegat he, nina'la a'makwe re, ninhùp-nanhùp ket haga'ninapo motok werek.

¹⁷ Nit yogotak, yì aik tì aik haga'ninabì'lùgì atì re, elama hesik hamùlùgat negen o. Meneat he, atì'nogo haga'ninabì'lùgì atì ba, hobuk hogoratarek mene esok motok logogin mene motok hùkoat ese asugun o.

¹⁸ Nit he, yì mene tì mene nineileken hogorek mene atì lek asigin meneat he, nineileken hogorek lek mene atì esok motok logogin atì nen he, nineileken hogorek mene atì hesik ninot somarogo hagatì'lek, we, nineileken hogorek lek mene atì hesik ninot somarogo hagatì lago o.