2 KORÌTÙT 3 - Ala Ane Wene Ket Mene Warogo Wo'ninapike Wene

“At Ala nen wene ket wene ninoba wasikomo, at hesik hagatì lago,” ìlùk yogoisasike wene

¹ Atì'nogo ìgì atì, nit ninokawerek en hobuk agaugerakìkì lago nogo? Motok lek o. Ì a, at he, it apùnì aike nen hagatarek atì hak, nit wo'ninabuagalùk surat hit wokhisìgìk, it aike nen wo'ninabuagalùksurat hit en wogisìgìk, ìkì lago a? Lek o.

² Nit wo'ninabuagalùk he, hit hinebeat helal hake waganek nit nina'la were'ma re, apùnì obogat en etage salhìk, hùthinìlìk, usak werek o.

³ Hit hinebe re, wene Karìsùt en helal waganogo hesikomo nit en lakhesugu mene hake welagep o. Helal atì re, lisu amusu ba wanhì'lek meneat he, Ala eluk motok welagarek a'nogo Areagùn oba wanhike o. Nen, helep sabìa mene ba wanhì'legat. We, apùnì inetaùken obaat wanhike.

⁴ At Karìsùt en nit ninetaùken wenesùgì uan horo ebetì'legat he, Ala ba hìpìrethìlìk logouagalùk haga'ninapike atì nen, wene atì'nogo ìgì o.

⁵ Nit ninokawerek ninomame ba yì mene tì mene hagasusak elok, ìlùk, nina'la akìkì lago lek o. We, at Ala nenat ninomame'ninapikomo hagasusak elok welago.

⁶ Ala nen wene ket wene ninoba wasike atì, nit en wolok loagalùk, at enat ninomame'ninapikomo elok wolok lasak welago. Wene alep inasuk wasikomo helal waganogo hesukwa mene higit hogo hagatì'lek halok, atì ba inebe inoaterek Meneat he, Ala Areagùn nen inelugurinaperek atì nen, nit wene alep helal waganek mene wolok lagì'lek, we, at Areagùn nen yogonisìlì'logo mene wolok laga lago atì.

^7-8 Ala nen wene helep oba helal wanhike atì heraksogorek atì ba ùkùm ninoba hakìlìk ninebe wa'lagorek o. Mene re, emakum wene atì wogisikenem he, hogorasukwa. Helep atì at Musa nen wolok pi waganem he, at elokoken amùlìt apik mene lek aga kolegat he, it apùnì Isirael mene ineileken lakha sìlùk-pabuk isike. Wene helal waganek atì wogisikenem he, hogorasukwa atì hak, at Ala Areagùn wo'nisikenem he, apigat hogorasusak o.

⁹ Wene helal waganek atì higit hogo hagatì'lek oba ùkùm ninoba hakasugu atì. Meneat he, wene atì wogisikenem hogorasukwa meneat he, atì hamùlùgat o. At Yesùt en ùkùm ninoba mene korogo wokhìlìk Ala ba ninapotkwe hùnogo hinasike atì wene wo'nisasike atì hesik enek he, apigat hogorasusak o.

¹⁰ Wene hobuk mene apigat hogorasusak atì nen he, alep mene hogorasukwa atì hak, hobuk hogorasusak lek aga o.

¹¹ Wene alep mene atì lek asigin werek kolegat he, hogorasukwa halok he, motok logogin mene atì apigat hogorasusak o.

¹² Hobuk atì'nogo hano asigin ìlùk, nina'la hai hakìkì logolìk he, wene ninayùk motok legat yogoisìkì lago o.

¹³ Nit he, at Musa elokoken amùlìt apik a'nogo motok lek asigìlùk lek aga kolegat he, it apùnì Isirael mene ineileken neanogo ìlùk he, elokoken su ba labesike atì hak nit atì'nogo hagasusak lek o.

¹⁴ Mene re, it atì inetaùken abirethesikomo welagaukwa. Yogotak hogo re, Ala nen, “Tì'nogo hagathinabigin,” ìlùk wene inom wasukwa mene helal waganek mene atì, it en etage salhenem he, inetaùken kagalasusak lek abit agaikesik apumeke laberek werek. Atì'nogo laberek mene atì, at Karìsùt inom hùnetenem enek he, inetaùken apumeke laberek mene atì elok hukalagarek atì.

¹⁵ Yogotak hogo re, wene at Musa nen helal wanhike wene atì, it en etage salhenem he, inetaùken kagalasusak lek apumeke laberegat werek.

¹⁶ Atì'nogo meneat he, apùnì it mene aike inepe hebelogo inelokwe ninoe Etagepogot wogotenem he, inetaùken apumeke laberek mene atì wokhikerek.

¹⁷ “Ninoe Etagepogot,” ìlùk ìgì atì re, Ala Areagùn hesigat o. Apùnì ninoe Etagepogot Areagùn ina'la were'ma re, hele hikalek inalepma welagaikarek atì.

¹⁸ Ineileken inapùnak oba it apùnì aike inebe pìkìrat lagisagarek atì hak, nit obogat ninelokoken apumeke laberek le'ma re, apùnì nen ninoe Etagepogot hogoratarek mene atì apùnak negen ineileken la'nisìlì'lùgì. Nit ninebe at ninoe hake asuagalùk he, hobugalep haga'ninapo motok were'ma re, hogo'ninabusak negen aga lago. At Ala Areagùn atì ebe Etagepogot atma at enat haga'ninabì'logo.