2 KORÌTÙT 2 - Ala Ane Wene Ket Mene Warogo Wo'ninapike Wene

¹ Atì nen he, an hit hinoba wìrìk, hina'la weagathousak werek halok, kamo igin ìlùk, na'la arat akìgì o.

² An nen hit hina'la weagathinabumo re, hit hina'la weak werek kolek, an na'la hobuk sa nen hano'nabusak. Mea atì.

³ Hit enat an na'la hano'nabusak atì. Hit an na'la hano'nabumo an na'la hai hakìgì halok he, hit obogat hina'la hai hakasagat akìkì lagì. Atì nen he, an hit hinoba waganem hit en an na'la weaga'nabinogo ìlù, hinoba wesu nabìt en, wene arat helal waganogo hinoba lakhei wagagi atì o.

⁴ Wene helal waganogo alep lakhei wagagi atì re, na'la weagat, netaùken ekinatma, le apik aga logolìk lakhei wagagi o. Hina'la weagasuagalùk lakhei wagagi hùk. Lek o. We, an hit netawì motok welagì atì hinelu asuagalùk hinoba lakhei wagagi ati.

“Ap weak hagasike mene atì hinetawìrogo wanino,” ìlùk yogoisasike wene

^5-6 Ap aike atì nen nina'la weagathesike atì re, an enek na'la weagathesike hùk. Atì hit obogat hina'la weagathesike usak meneat he, ap inoabùt atìgìnìk mene halok, hinebe logolegat en ap atì asuk warogo ùkùm oba hesigip atì arat, Halok he, an hobuk nane ning hogo ùkùm oba housak he, nabìt.

⁷ Hobuk he, at weak hagasike mene atì, a'la motok weak arìk, ebe weak asinogo ìlùk he, a'la hano asuagalùk weak hagasike mene hit en sagalogo heraksìlìk, etaùken sebelino.

⁸ At ap atì ebe hinetawìrogo apotkwe wanuageip en ìlùk, hinasuk warogo yogohisìgì atì.

⁹ An nen, “Hit tì'nogo haga'no,” ìlùk, yakùlhisasigi a'nogo, nane hologo hagarì'lùgì a? Lek a, ìlùk hinoabùt paligìlùk wene atì helal waganogo hinoba lakhei wagagi atì.

^10-11 At en hit weagathinape mene ati, hit en sagalogo heraksegep halok he, an nen sagalogo heraksegeinat o. An nen sagalogo heraksasak mene werek halok he, at Ibilit, oabùt lagak hogo hagaterek ninelu ati nen, mabene'ninabinogo ìlùk, hit hesik, at Karìsùt eilhanemat sagalogo heraksegein o.

Paùlùt o Teroat logolìk alabut hìrìk welagaikesik, o Maketonia wagaike wene

¹² An o Teroat atoma wagagi hak he, hano wene Karìsùt hagasike a'nogo wene, apùnì atoma mene hanoasuak yogoisoagalùk ninoe Etagepogot en yogonesikomo yogoisiko welagagi.

¹³ Meneat he, nagaiyak Titut a'nogo neperak apì agì'lek en he, nalabut hìrìk welagagisik he, apùnì atoma mene hai warinaplùk he, o Maketonia wagagi.

“Karìsùt ninom hutik logolìk ninomame agorek,” ìlùk yogoisasike wene

¹⁴ Atì'nogo meneat he, at Karìsùt omame agaikesik elokwe wanho kolek nikenem, nit at ninom hutik mene Ala nen Karìsùt opolik wo'nisek nikerek, ìlùk hogorasuok o. Atì'nogo wo'nisek nìkì logolìk, obasi hano mene sang-pang hogo lagarek hak, at Karìsùt hagasike wene a'nogo nit en wìalogo o yì awì tì awì wolok loagalùk wo'nisek nikerek.

^15-16 Atì re, at Karìsùt en he, obasi hano mene Ala hesik etu lolosu hak, nit ninebe Ala wogoterek atì. Wogotenem, it apùnì alema'larì'lùgì mene nen he, “Obasi weak. Apùnì inebe inoaterek mene obasi hake,” palharek. Meneat he, it apùnì telinabì'logo mene nen, “Obasi hano, inebe inelugurinaperek mene hake,” palharek. Atì'nogo palharek atì nen he, wene atì sa hak en elok wolok lasak akegep.

¹⁷ It apùnì aike inebe logolegat en he, yì mene tì mene oko ha abarìk lagaikarek hak, Ala ane atì'nogo at wolok lagaikarek. Meneat he, nit enek he, atì'nogo lek. We, Ala nen, at ane wolok loagalùk ninayoko hesike atì nen, at eilhanemat ninetaùken omakeat Karìsùt ninom hutigat logolìk, yogoisìlìk laga lago o.