2 KORÌTÙT 12 - Ala Ane Wene Ket Mene Warogo Wo'ninapike Wene

Ala nen yì wene tì wene Paùlùt eileken hoagalùk abìkakan oba yogosike wene

¹ An hogorakìlìk waga lagì mene atì re, usak lek meneat he, hogorakegeinat o. Ninoe Etagepogot en an neileken hoagalùk yogonetomo nabìkakan oba hìgìk, nabìrùgì ba hìgìk, hasigi mene igin o.

² An 14 tahun alebat neileken hasigi mene it aike inoba lìrogo igin o. Ap aike Karìsùt eperak hutik welagaike mene Ala nen pogot hùlì pìre sekelek hebìlùk hùlì aike po atoma ba lìakhesike atì nelu. At atì ebeat lìakhesike he a? Areagùn lìakhesike he a. An nokot. Nopase Ala at elu o.

^3-4 Ap atì Ala nen pogot oba hanoma atoma lìakhesikomo wene apùnì nen egarek legat, nen usak meaat, mene asuk holhike nelu o. Atì'nogo meneat he, ebeat lìakhesike he a? Areagùn he a. An nokot mene re, Ala at elu ìgì atì.

⁵ Ap atì hesik enek hogoratì logolìk, an nokawerek hesik hogorakìgì'lek, we, nebe maben atì hesik enek hogorakegeinat o.

⁶ An nokawerek en nabìkakan oba hasigi meneat he, ap aike oba lìrogo ìgì atì mene hesik aike inom hogorakìgi halok he, nane eberogoat igin atì nen he, apùnì kepù mene nen egarek hak igin lek o. Atì'nogo meneat he, apùnì aike nen an hìgìrek atì mene hesik hogo'nabinogo ìlùk, nebe ineileken nììgik, nane inasuk holhìk, egarek atì ba hùthanuagalùk he, aike atì mene ìgì'lek kamo igin atì.

^7-8 An nen, “Nabìkakan oba elalin neileken hìgì atì nayùk e,” ìlùk nokawerek en hogorakanogo ìlùk he, apùnì inebe bakwe alok kikenem heinet watarek hak, ou noba aganem heinet watì logouagalùk, noba hanhikomo, Ibilit en ayoko hesike mene hake noba were'ma, ninoe Etagepogot en henogo wulaksoagalùk neki hìnagan oba ayoko hìgì meneat he,

⁹ at en he: “Hat maben halok he, an nomame apigatma hebe netawìthapìrek a'nogo nen, elok hano logogin o,” ìlùk yogonesike. Atì'nogo yogonesike atì nen, at Karìsùt omame an na'la hanhike mene atiat logouagalùk he, an yì hesik, tì hesik mabenat logolìk, na'la hairogo hogorakìkì logogin o.

¹⁰ Atì nen he, an Karìsùt hesik, nebe maben agì halok, apùnì nen nabok weak palho halok, wiik-weak hogo haga'napo halok, yì aik tì aik haga'napo halok, weim yapì logolìk inoasuogolùk hoborisagarek hak haga'napo halok, an mabenat were'ma, atì ba nen nomame agarek atì nen he, na'la hai hakìgìrek o.

Paùlùt en Ala againapùrì o Korìtùt mene hesik alabut hìrìk welagaike wene

¹¹ It ap Karìsùt en inayoko hìlìk laksa wagarek mene negen hagarogo wìrìk, “At Paùlùt etage lek,” ìlùk egarek atì, an eberogoat netage lek. It esin inetagewerek hìgì! Atì'nogo lek o. Hit en hùthanìlìk agauk hogo yogonesusak meneat he, atì'nogo egesep lek atì nen he, eberogoat ap kepù nen egarek hak, yogohisìgì atì.

¹² Hit en he, “Paùlùt he, Karìsùt en ayoko hìlìk lakhei wagaikomo,” ìlùk enagat hùthanuagalùk, an ninom logolìk yì hesik tì hesik nepe morogo hagato were'ma, apùnì nen hùthoagalùk, Ala nen omamerogo yì mene tì mene elalinat hagatì lagaike.

¹³ Hit hesik hagatìrek atì, it Ala againapùrì yì awì tì awì atogotarek mene hesik hagatìrek mene atì eperak walhamo re, kì mene hesik yagaugethinapì nogo. We, an yabu hagatì lagì hesik, “Neki oko aike wo'ne'ni,” ìlùk hinoba sabelhì'lek welagagi atì yagaugethinapì he a. Halok he, weagathinapì atì hesik sagalogo legetsìlìk hina'la hano a'ni o!

¹⁴ An alep neki pìre ba hinoba wagagisik, hobuk aike wesigìlùk tegelogo hìgìrìk welagì o. An hinoba wesigin atì re, yì mene tì mene inagainapùrì nen inagosa inopaselak heragasogo wogisagarek hùk. Lek o. We, inagosa inopaselak en he, inagainapùrì hesik heragasogo wogisagarek atì nen he, hit mene yì mene tì mene kino hinoba sabelogo yogohisa wesigin hùk. Lek o. We, hinebeat herakhinabìk wesigin o.

¹⁵ Atì hagat he, hit hinetaùken hesik an nagarok yì mene tì mene hikìgìk, nebe mel hikìgìk, netaùken oba nen na'la hai hakìkì logolìk usagat welagì o. An hit hinebe netaùken tùlem werek kolegat he, hit enek he, an nebe hinetawì lek negen logousak nogo?

¹⁶ An nen he, hit hinoba ekinetheigìlùk hit mene kìno yogohisìgì'lek atì enagat werek atì. Mene re, hit aike nen ìkì logolìk he: “At Paùlùt etaùken kagalek nogo nen he, yì mene tì mene sabùragalùk, ane lalogo yogonisikerek,” ìlùk ìkì lagep atì,

¹⁷ an nagoromì hit hinoba laksa wagagi amanogo nen, hit mene aike sabùrogo an wo'nesi wagaukwa nogo? Motok lek o.

¹⁸ At Titut hinoba wesuagalùk a'la kagalhigisik he, ninagaiyak Ala aput aike at eperak laksa wagagimo wagaukwa a'nogo, wagaukwasik he, at Titut en hit en hesigip mene aike munenogo helasike nogo? Motok legat o. An Titut neperak he, ninoabùt omakeat hagatì lagagu lek nogo? It aike alep inesok hìlìk lagaikare'ma re, it aike hobuk oba louk hogo hìlìk lagaikarek hak, at Titut an neperak yabu higit hagatì lagagu lek nogo?

¹⁹ Hit hina'la nen he, “At Paùlùt ùkùm okawerek oba nen nokologo ìlì'logo,” ìlùk hageat en ìkì lagep meneat he, an atì'nogo akìkì lagì lek o. Nerùgì nagaiya'lak. Hinebe netawì. At Ala eilhanem, an Karìsùt neperak hutik logolìgat ìkì lagì atì. Yì mene tì mene hagatì lagì atì re, hit hinetaùken wurik asuagalùgat hagatì lagì o.

²⁰ An hobuk hinoba wesigin atì wìrìk he, an nen, “It inoabùt hano were'ma legein,” ìlùk akìkì lagì hak, lek. We, weak were'ma hisa wagìk, nen, hit en he, “At Paùlùt oabùt hano,” ìlùk egesep hak, lek. We, weak logolìk hisa wagìk, inogo ìlùk, nalabut hìrì'logo. Hit-hit hinom weak welagìk, ua palhìk, hina'mage lagagìk, hinokawerek hesik enek hagatìk, inabok weak weinam palhìk, hinagasogo palhìk, hinokawerek en hogorakìgìk, yùgùneke-yaganeke hagatìk, ikenem an wesusak atì, nayùk.

²¹ Atì'nogo hagatenem, an waganem he, nopase Ala nen hit hinoabùt hagatì lagep atì hesik hit hineilhanem nekalì warogo nebe horothanusak atì nayùk. It apùnì hit mene aike logolegat en hìmì inagonì werek mene, ap inagagwì werek mene nen pailak haksìgìk, he salisik, ap salisik en pailak haksìgìk, inekalì lek weak motok hagatìk, o hageat en hagatarek mene heraksìlìk inoabùt hebelagì'lek motok welagaikarek atì hesik, le asi wesi nogo ìlùk nalabut hìrìk welagì o.