2 KORÌTÙT 11 - Ala Ane Wene Ket Mene Warogo Wo'ninapike Wene

“It aike Karìsùt en inayoko hìlìk laksikerek mene negen hagarogo wìrì'lùgì,” ìlùk yogoisasike wene

¹ An nen wene hamùlùgat apùnì kepù mene nen egarek hak igin yì re, wena'netì'lek, hinasuk hologo logouageip ìlùk yogohisìgì. Hinasuk hologo logoni e.

² Hìlìmìkìrùgì inoabùt ap inom nogo ìgì'lek mene, inagonì inoba lopologo hisagarek hak, an nen he, hit Karìsùt oba lopologo hikìgì meneat he, hit en ap hunik mene aike lopolhep halok he, Ala a'mage lagou hak, an na'mage lagousagat o.

³ Atì'nogo meneat he, alebat at Walo a'nogo oabùt lagakse'ma re, he Hawa lalhike hak, hit hinetaùken omakeat Karìsùt oba hìpìethìlìk at hesik tegelek welagep mene it aike nen lalhinabusak atì, nayùk arì'logo.

⁴ It aike hinoba wìrìk he, nit en hano wene Yesùt hagasike wene yogohisasugumo wanhigip hak, yogohisìgì'lek. We, hùnogo mene yogohisikenem he, Ala Areagùn wanhigisibat he, hobuk aike mene areagùn wanhìk, hano wene wanhigisibat he, hobuk wene hùnogoat mene wanhìk, hina'la hairogo wanhì lagep hisìkì lagì o.

⁵ It aike atì, Yesùt en inayoko hìlìk laksa wagaike mene negen hagarogo waganem, hit en he, “It atì esin negen,” ìlùk woginapo kolegat he, an na'la nen he, “It esin, nen, an mea,” ìlùk akìkì lagì motok lek o.

⁶ An wene ikenem inoba wùsùhùk meneat he, wene ebe nokot hùk o. Nelu. An nen ninhùp-nanhùp yì hesik tì hesik ikenem he, hit en, “At wene elu o,” ìlùk enagat hùthanhì lagebat o.

⁷ An nen Ala ane hano wene atì yogohisìkì logolìk he, “Oko aike wo'ne'ni,” ìlùk ìgì'lek. Hit esinethinabigìlùk an nokawerek nebe kepù negen arìk, atì'nogo hagatì lagì atì, hit kolo hagathinapì lagì ìlùk usak nogo? Motok lek o.

⁸ An nen hit lebethnsìkì lagì atì hesik, neki oko negen he, it Ala againapùrì o aikema nen wo'netenem wanhì lagì o. Atì'nogo wanhì lagì atì ba it apùnì aike nen he, “At Paùlùt en it apùnì o Korìtùt mene leberisagalùk he, oko it aike mene eki abusak negen wanì'logo,” ìlùk yogonesusagat o.

⁹ An hit ninom logolìk uang lek en, hit en aike wo'nesuagalùk kino hinoba sabelhì lagì'lek o. We, atì'nogo were'ma, it ap nagaiya'lak o Maketonia mene wagaikasik elogat wo'nesi wagaika atì nen, yì hesik tì hesik hit hinoba ekinetheinogo ìlùk, akasigisi'mo re, kino yognhisìgì'lek welagagisik hobuk atì'nogoat motok hagatì logogin o.

¹⁰ Atì'nogo hagatì logogin ìlùk, na'la hai hakìkì logolìk hogorakìkì lagì mene atì, apùnì o Akaya atoma mene aike nen nane masusak mea, ìlùk Karìsùt ane ebe wene na'la logolìk eberogoat ìgì o.

¹¹ Nenahalok an atì'nogo ìgì akegep. Hit hinebe netawì lek en ìgì akegep? Lek o. An hit hinebe netawì welagì atì, Ala elu o.

¹² It aike Karìsùt en inayoko hìlìk laksa wagaike mene salek wagaikasik hagarì'lùgì mene atì nen he: “Nit Paùlùt m'nom higit o,” ìlùk ìkì logolìk hogorakìlì'lùgì mene atì, inane tokok uagalùk an yogotak hagatì lagì mene yì re, hagato motok logogin o.

¹³ It atì re, Karìsùt en inayoko hìlìk laksa wagaike mene hùk. We, at en laksa wagarek mene negen hagarogo wìrìk apùnì lalinabì'lùgì meneat o.

¹⁴ It hagarì'lùgì atì elalinat hagarì'lùgì hùk. Inopase Ibilit okawerek apeliak en he, malaikat lìa wene wolok wagaikarek hak hagarogo wagarek hak hagarì'lùgì o.

¹⁵ At Ibilit atitigeke logolìk, at hesik hagatarek meneat he, at Ala atitigeke logolìk higit hogo hagatarek mene negen hagarogo wìrì'lùgì atì inoabùt ineso'maat o. Atì'nogo hagatarek atì nen, o elugun oba, Ala nen oko it yì hesik tì hesik hagatarek higit hogoat hagarinabigin o.

At Paùlùt Ala ane yogoisìlìk nikenem yì aik tì aik oba aga lagaike wene

¹⁶ Apùnì hit mene aike nen he, “At Paùlùt ebe kepu negen,” ìlùk akanogo ìlùk, hobuk nane etenogo yogohisìgì atì. Atì'nogo meneat he, hit en atì'nogoat akìkì lagep halok he, an nebe kepù negen logolìk hamùlùgat aike hogorakegein yì re, hinasuk holini o.

¹⁷ An nen hogorakegein yì re, ninoe Etagepogot en, “Hat atì'nogo in,” ìlùk yogonetomo hogorakegein hùk. We, apùnì kepù mene nen hogorakìkì logolìk egarek hak igin o.

¹⁸ It apùnì inebe logolegat en yì mene tì mene kweangma mene hesik hogorakìlì'lùgì atì, an hamùlùgat aike hogorakegeinat o.

¹⁹ Hit hina'la kagauksek mene hake yoma rì! It aike kepù mene inane ikenem, hit hina'la hairogo holhesep atì.

²⁰ Atì'nogo hagatesep atì ba, hit hinebe it en inawe a'ma hikìlìk, hinapùrùk motok heleleng hogo nìkìk, hinagarok ineki abusak helìgìk, “Hit mea mene re, nit enek he, esin ìlùk,” inokawerek en sebirakìgì, hinelokoken lapuk hogo hinoatìk, iko kolek hinepe morogo welagep yoma rì!

²¹ Nit hogo re, atì'nogo hagasusak he, ninoabùt ninayùksek en kamo isugu ìlùk usak he, nekalì apik hasak nogo? Lek o. It apùnì kepù mene nen egarek hak aike yogohisak. At aike ekalì lek hogorakike halok he, an hogo re, nekalì lek hogorakasagat o.

²² It atì inebe Yahuri mene hak, an hogo re, nebe Yahuri meneat o. It inebe Isirael mene hak, an hogo re, nebe Isirael meneat o. It inebe inopase Aberaham en tago mene hak, an hogo re, nebe nopase Aberaham en tago meneat o.

²³ It atì Karìsùt atitigeke logolìk, at hesik hamùlùgat hagatarek meneat he, an enek he, hùkoat hagatìrek o, ìlùk, apùnì sìnì'nùk mene nen egarek hak aike yogohisìgì atì. It be, seget hamùlùgat negen hagarek meneat he, an he, seget apik hìgìrek o. It he, omake like hake ineki hele watìk, tùgì inoatìk, inebe wa'lasusak negen motok inoatìk egarek meneat he, an enek he, ninhùp-nanhùp neki hele watìk, tùgì noatìk, nebe wa'lasusak negen motok noatìk, egarek o.

²⁴ It apùnì Yahuri mene nen tùgì labìsake tùgì omake hesik ineki 39 nen noatì lagaukwa mene neki wenagasogo re, neki 5 ba noasukwasik.

²⁵ Nen, apùnì o Ùrùm mene nen tùgì payùk oba ineki hìnagan oba noasukwasigat. Nen, helep oba huk-hak hogo noasukwasigat. Nen, i laut yekele'ma atoma so warogo wùlùpenem, neki hìnagan oba so weak arìk lobak hogo pisikeat. Nen neki omake hesik i laut yekele'ma atoma agùm oba sarogo nogo isigisigat.

²⁶ Ninhùp-nanhùbat youkkwe laga lagagisik, atì re, i hu nen sebelnapenem noasusak agìk, apùnì inoabùt weak ineki abusak wanharek mene nen noasuogolùk ikenem youk hìgìk, apùnì an nùkùl mene nen noasuogolùk ikenem youk hìgìk, it etakwe mene nen noasuogolùk ikenem, youk hìgìk, o sili hùko wùrì'mo nen noasuogolùk ikenem youk hìgìk, legeta'ma nen noasuogolùk ikenem youk hìgìk, i laut yekele'ma nen noasuogolùk ikenem youk hìgìk, apùnì hunigat meneat he, Ala againapùrì nagaiya'lak mene salek logolìk noasuogolùk ikenem youk hìgìk, ìkì lagagisigat.

²⁷ Yì hesik tì hesik seget kwìl-kwal hogo hagatìk, ninhùp-nanhùbat nogo neluk nogo ìgìk, sùpùrùk mel, i mel, lek en nele welagìk, ninhùp-nanhùbat sùpùrùk nìkì'lek kamo ìgìk, nasu lek en sogoi noatìk, o koma nogo u heat agìk, ìkì lagagisigat.

²⁸ Atì'nogo haga'napo kolegat, Ala againapùrì yì awì tì awì atogotarek mene obogat hesik he, ninhùp-nanhùp hutik motogat noba ekin logolìk wenesùgì ebetìrek o.

²⁹ At aike maben aga halok he, an maben asu hak, na'la weak agaregat. Nen, at aike weak mene nen a'la kagalhenem weak aga halok he, an na'mage lagaikeregat.

³⁰ Mene re, hogorakasak halok he, an nebe maben ìlùk hogorakasak o.

³¹ An wene ìgì atì re, napeliak ìgì lek o. At ninoe Etagepogot Yesùt opase Ala apnù waganogo hogorato motok logogun mane a'nogo elu.

³² An o Tamìsìk were'ma re, inoe etagepogot Aretat awe a'ma mene gubernur atì nen agoromì kwe ba palek were'ma an hakhanuagalùk inayoko hesike.

³³ Atì'nogo meneat he, ineki habaregeke it aike nen an nebe mùl ugu a'la kalhanìlìk he, leget pa'leget akwe holelekkwe wulakhanìlìk hele kelogo pelakhanukwama re, wo'lakasigi.