2 KORÌTÙT 10 - Ala Ane Wene Ket Mene Warogo Wo'ninapike Wene

Paùlùt en: “An nen Ala eyabu tì'nogo hagatì lagì,” ìlùk yogoisasike wene

^1-2 An Paùlùt Karìsùt oabùt enago hano a'nogo oabùt waganogo, nokawerek en wene aike hinasuk wasik. It aike nen he, “At ebe horok hogo ninom logolìk he, oabùt lìok hogo wene yogonisikerek. Meneat he, ebe walegat logolìk he, oabùt ayù'lek ning hogo yogonisikerek,” ìlùk egarek mene a'nogo hobuk hinoba wìrìk noabùt nayù'lek logolìk nane ning hogo yogohisanogo ìlùk, hùthoageip ìlùk nane lìok hogo yogohisìgì. It atì nen he: “Paùlùt lak atì re, apùnì inoabùt inesogat logolìk inoabùt waganogo hagarì'lùgì,” ìlùk ninabok weak palì'lùgì mene atì, noabùt nayù'lek nane ning hogo wenagisa wesigin ìlùk wenesùgì ebetì lagì.

³ Nit ninebe kweangma logolìk apùnì sike sìge ba weim yaparek hak yapì lago lek o.

^4-5 Nit weim yapì lago atì ebe re, apùnì inasike inarìge ba yapì lago hùk. We, Ala omame apik welagarek mene a'nogo asike arìge ba, o weim kat oba ning hogo wùrìk mene atì, elok mesalusak atì ba yapì lago. It apùnì aike ina'la nen he, “Ala atì ebe ninabìt. It apùnì aike at ebe inelu asusak legat o,” ìlùk inokawerek en hogorakagarek mene atì, nit en sike sìge atì ba re, elok mabenetsasagat o. Nen, apùnì inetaùken we mene oba eberì'lùgì mene atì, nit en sike sìge atì ba Karìsùt ane hologo hagasuagalùk awe a'ma elok hisa wesusagat o.

⁶ Nit en he, hit Ala ane katok hogo hologo motok hagatì lagep halok he, tegelogo hikìkì logolìk it aike at ane inasuk holùhùk mene hùgì ùkùm inoba houogolùk welago.

⁷ An nen wene weinam mene igin yì re, hùthano. At aike a'la nen he: “An nebe re, Karìsùt mene welagì,” ìlùk hùthike halok he, okawerek en oabùt palìki logolìk, “An nebe Karìsùt mene hake re, it Paùlùt lak atì'nogoat,” ìlùk hùthoak o.

⁸ Ninoe Etagepogot en he, an nen weagathinabuagalùk esewerek hanhomo hùk. We, hinetaùken wurigethinabuagalùk, esewerek hanhomo welagì atì hesik apik hogorakìkì lagì halok he, nekalì asigin lek o.

^9-10 Apùnì hit mene aike nen he: “Pafmlt atì ebe walegat logolìk halal waganogo lakhei waganem he, ane masusak mea. Ning hogo yogonisìlì'logo. Meneat he, ebe wìrìk ninom logolìk ebe kepù bake. Nen, ane ikenem he, inasuk holusak inabìt negen,” ìlùk ìlì'lùgì atì nen he, wene helal waganogo hinoba lakhei waga lagì atì re, hit hina'la nen, “Ninayùk motok asuagalùk lakhei wìrì'logo,” ìlùk akanogo ìlùk yogohisìgì atì.

¹¹ Nit hobuk wìrìk he, it atì'nogo ìlì'lùgì mene atì, ninebe walegat logolìk wene helal waganogo lakhei wago mene higit hogoat hagasi wesugun atì nen he, hùthìlìk logouak o.

¹² Nit en he, it aike inokawerek en, “An hano,” ìlùk inetaùken hesagathakìlì'lùgì mene atì, ninom wena'ninabusak he, nayùk. An nokawerek noabùt palogo nen nebe it ninom higit u nayùgat o. Atì re, it en he, “Inoabùt hano wanusak he, nirat,” ìlùk ìgìk, apùnì esi it mene motok it-it inoabùt palìgìk, ìlì'lùgì atì re, inebe kepù nen ìlì'lùgì o.

¹³ Nit ninoabùt he, atì hake re, lek o. Nit ninoabùt nineyabu Ala nen hùlì warogo wo'nisasike atì ba hagatì logolìk, etakwe mene hesik hogorakìgì'lek, hùlì warogo wo'nisasike mene hesigat hogorakìkì lago. Hit hinebe hogo re, nineyabu hùlì warogo wo'nisasike atì meneat welagep o.

¹⁴ Hit hinebe Ala nen yabu hùlì warogo wo'nisasike ba welagep atì nen he, hano wene Karìsùt en hagasike wene a'nogo wolok he, yogoisìlìk-sìlìk hùlì hit hinoba wagagu atì, hùlì warek mene sebelogo wagagu lek o.

¹⁵ Ala nen atì'nogo nineyabu hùlì warogo wo'nisasike mene sebelogo hùlùk aphane lìlìk, it aike hagata mene, an hagatì salek hogorakìkì lago lek o. Hit hinetaùken Ala oba hìpìrethìkì lagep mene atì aike inom hogo wùrìk aganem he, o hit werekwe Ala nen hùlì warogo nit wo'nisasike ba, yabu hùkorogo hagatì logogun akìkì lago.

¹⁶ Atì'nogo hagatì logopik, Ala nen it aike ineyabu hùlì warogo wogisasikomo hagata meneat he, nit hagato salek hogorakanogo ìlùk, hit hinaua abel ìlìkwe, atoma wene hano wene yogoisìlìk nìkì logogun akìkì lago.

¹⁷ Ala ane helal mel ìlùk waganek werek: “Apùnì nen yì hesik tì hesik hogorakùogolùk halok he, ninoe Etagepogot hagasike atì hesik hogorasusak o,” ìlùk isike.

¹⁸ Apùnì inokawerek en hogorakagarek mene atì Ala nen hano ìlùk woginaperek hùk. We, at ninoe Etagepogot en hogorinaperek mene halok hano ìlùk woginaperek o.