2 KORÌTÙT 1 - Ala Ane Wene Ket Mene Warogo Wo'ninapike Wene

Hai warinapike wene

¹ Nerùgì nagaiya'lak. An Paùlùt Ala a'la akasike ba, Yesùt Karìsùt en nayoko hìlìk he, lakhani wagaike mene a'nogo, ninagaiyak Timotìùt a'nogo neperak en hit Ala againapùrì o Korìtùt atogotesep mene mel, o propinsi Akaya ya ta atoma welagasep mene obogat mel, wene yì helal waganogo hinoba lakhei wago atì.

² Ninopase Ala ninoe Etagepogot Yesùt Karìsùt eperak inoabùt hano a'nogo nen, hano mene wokhisìgìk, hinetaùken hapuguthinapìk, ìkì logouak o.

“An nen Ala hai watì lagì,” ìlùk yogoisasike wene

³ Ninoe Etagepogot Yesùt Karìsùt opase Ala atì hogoratì logouok o. At ninopase Ala oabùt hanoma re, apùnì yì hesik tì hesik ina'la kolo were'ma, etawìrinabìk ina'la hanoraterek.

⁴ Apùnì aike yì aik tì aik hìkì logolik ina'la kolo were'ma, nit en it ina'la hano asuagalùk inetaùken sebeluagalùk he, at Ala nen nit atì'nogo yì aik tì aik hìkì logolik nina'la kolo aganem, ninetaùken sebelì'logo.

⁵ At Karìsùt yì aik tì aik hìlìk hìlìk hobuk ebenageik hùkoat hasike atì hak, nit atì'nogoat hìkì lagoat o. Atì'nogo hikenem at Karìsùt en nit nina'la hano arìk hobuk ebenageik hano asuagalùk ninetaùken sebelho motok welagarek.

⁶ Nit yì aik tì aik hìkì lago atì ba, Ala nen hit hina'la hano asuagalùk hinetaùken sebelhìk, hinebe telhinapìk, iginat o. Nen, nit yì aik tì aik hikenem Ala nen ninetaùken sebelherek atì ba, hit atì'nogoat yì aik tì aik hìkì logolìk hinepe morogo logogun halok, Ala nen hina'la hano asuagalùk hinetaùken sebeliginat o.

⁷ Yì aik tì aik ninom higirat hogorek atì hak, nina'la hano asuagalùk Ala nen ninom higirat ninetaùken sebeligin o, ìlùk nelu ati nen, hit hano asugun, ìlùk ninetaùken sikip hogo welago.

⁸ Nerùgì nagaiya'lak. Nit o propinsi Asia a'loma nen yì aik tì aik haga'ninapì lagaukwa atì hinokot logousak nabìt. Yogohisak. Atì'nogo haga'ninapì logolìk, ekin motok apik nit en hagasusak mea mene ninoba hesukwama, “Nit nineluk logogtm lek hìgì,” ìlùk ninetaùken huni agaike.

⁹ Inebe motok inoasuogolùk inabok palhenem, “Nit arat wa'lasugun hìgì,” ìlùk akagarek hak haga'lagaike atì. Atì'nogo haga'laganem, ninetaùken ninokawerek ninoba hakothìlìk welagì'lek, we, at Ala apùnì wa'larì'mo nen inelugurinaperek mene a'nogo oba hìpìrethìlìk logouagalùk atì'nogo haga'lagaike atì.

^10-11 Nit ninebe motogat ninoasugun, ìlùk akasugusi'mo nen, at Ala nenat telninapikesik he, hobuk telninabiginat o. Nit hesik hit ninomat sapan ìkì lago a'nogo ba, hobuk telninapo logoginat o, ìlùk he, ninetaùken at oba hakothìlìk welago. Hit en, nit hesik sapan iko motok logogun atì ba, at Ala oabùt hano nen nit telninapenem he, it apùnì aike apigat en ineileken nisìlìk Ala hai wasugunat o.

Paùlùt en, “Hageat hinoba wesigìlùk isigi mene, kamo isigi,” ìlùk yogoisasike wene

¹² Nit hogorakìkì lago atì, ebe yì'nogo nen. Nit it apùnì kweangma mene aike ina'lakwe ina'lakwe logolìk, it hesik hagatì lago re, hamùlùgat negen. Mene re, hit hesik enek he, esin hogo hagatì lago. Atì re, apùnì kweangma mene ina'la kagalek mene hagatarek hak hagatì'lek. We, at Ala oabùt hano a'nogo nen, ninetaùken hano omakeat logolìk hagatì logouagalùk ninoabùt wo'nisasikomo hagatorek mene atì nina'la ebetì logolìk, “Nit hano hagatì lagoma,” ìlùk hogorakìkì lago atì.

^13-14 An nen he, wene hit en etage elok salhìk, hùthìgìk, usak mene nek helal palogo hinoba lakhei wagìrek o. Alep he, an nen lakhei wagagi mene atì hamùlùgat enek hùthasigip. Mene re, hobuk enek he, obogat hùthogoin akìkì lagì. Atì'nogo hùthìlìk he, ninoe Etagepogot Yesùt wesigin atì like, nit en he, hit hesik ninalong asigin atì hak, hit en he, nit hesik hinalong asiginat o.

^15-16 Atì'nogo hùthogoinat o, ìlùk akìgì ati nen, hit hina'la hineki pìre ba hai hakoageip en ìlùk, an alebat en o Maketonia yoma waga logolìk hit hinoba ha'larìk wìrìk he, hobuk napotkwe laga logolìk hinoba ha'larìgat, o Yurea lagalùk laganem, hit en lebe'neoageip ìlùk akasigi.

¹⁷ Atì'nogo wesigìlùk akasigi meneat he, hobuk kamo isigi atì re, nane pìre nen akegep? An na'la nen, “Tì'nogo hagasigin,” ìlùk wenesùgì ebetì logolìk, nokawerek na'la walok en, “Ì o,” ìlùk ning hogo ìlìk en, hobuk “Lek o,” ìlùk ìgìrek akegep?

¹⁸ Lek o. At Ala ane eberogoat enek yogonisikerek atì hak, nit en he, “Ì o,” ìlìk en, “Lek,” ìgìk, yogohisogorek lek.

¹⁹ At Ala aput Yesùt Karìsùt, an nebe nen yakùlhisìgìk, Silat en yakùlhisìgìk, Timotìùt en yakùlhisìgìk, isugu mene a'nogo oabùt he, “Ì o,” ìlìk en, “Lek o,” ìlùk ikerek lek. Ala nen, “Ì o. Wokhisegein,” ìlùk abok yogonisa hak, Yesùt ebe wo'nisasikomo werek atì.

²⁰ At Ala nen yì mene tì mene abok yogonisasike atì obogat he, “Ì o, wokhisegein,” ìlùk u hak, Yesùt ebe wo'nisasikomo werek atì nen, nit at ninom hutik logolìk Ala hogoratì logolìk he: “Ebe asuak,” ìlùk u hak, “Amin,” ìlùk ìkì lago atì.

^21-22 At Ala nenat, hit mel, nit mel, Karìsùt oba hìpìrogo hinikomo welago. Ninebe at okawerek hesik hagatì logouagalùk ninayoko hìgìk, silo negen hinìgìk, ìkì logolìk, yì mene tì mene hobuk hùkorogo nùogolùk, emakum lilu nekarek hak, Ala nen nit hesik obogat hinanhike mene hobuk wo'nisagalùk, emakum Areagùn tak ninetaùkenma hinasikomo welago.

²³ An o Korìtùt hinoba wagì'lek kamo isigi atì re, hit hina'la weak asinogo ìlùk kamo isigi mene atì, at Ala na'la eileken niikerek mene nen elu o.

²⁴ Hit hinetaùken Ala oba hìpìrethesigip mene atì, eberogoat ìlùk hinetaùken hapuk hogo welagep atì nen he, nit en, “Hinetaùken tì mene oba hìpìrethousak,” ìlùk ninane ning hogo yogohisogoin lek o. We, hit hina'la hai hakoageip ìlùk lebethisìkì lago atì.