1 YOHANET 5 - Ala Ane Wene Ket Mene Warogo Wo'ninapike Wene

“It apùnì kweangma mene inoabùt weak hagatarek mene atì mabenetsìlìk, inomame agaikarek,” ìlùk yogoisasike wene

¹ Apùnì nen he, “Yesùt atì Ala nen ayoko hìlìk lakhei wagaike mene eberogoat Karìsùt a'nogoat o,” ìlùk inetaùken at oba hìpìrethagarek mene hùgì inebe lopok he, Ala nen taginapomo, at againapùrì werek o. Nen, nit ninopase Ala ninetawìrogo logolìk halok he, at againapùrì tago mene atì ninetawìrogoat logousak o.

² Atì'nogo logousak ìlùk, hùthìlìk he, Ala ebe ninetawìrogo logolìk, wene at en ninasuk wasike wene atì hologo higit hogo hagatì logolìk, at againapùrì taginape mene atì ninetawìrogo logousagat o.

^3-4 Nit Ala nen ta'ninape mene hùgì ninebe lopok en he, “Ala ane atì eberogoat,” ìlùk ninetaùken at oba hìpìrethogorek atì ba, it apùnì kweangma mene inoabùt inesogat logolìk weak hagatarek mene atì mabenetsìlìk ninomame agorek atì. Atì'nogo mabenetsìlìk ninomame agorek atì nen, wene Ala nen ninasuk wasike wene atì ekin lek, seweak o. Atì nen he, nit en, “Ala ebe ninetawì welago,” ìlùk u hak he, at en wene ninasuk wasike wene atì hologo higit hogo hagatì logouok o.

⁵ Apùnì inoabùt inesogat logolìk weak hagatarek mene mabenetsìlìk inomame agaikarek atì sanì nen nogo? Atì re, nit en, “Yesùt atì Ala aput,” ìlùk ninetaùken at oba hìpìrethogorek mene hùgì nenat o.

Ala nen aput abok pak hogo yogonisikerek wene

⁶ At Yesùt Karìsùt kweangma pi wagaikesik were'ma ima nek pelapukwa hùk. Ima pelapìk, amep wulagasogo watìk, isukwa. Atì'nogo hagasukwa ìlùk, at Ala Areagùn wene eberogoat enek yogonisikerek mene a'nogo nen pak hogo yogonisiko welagarek o.

^7-8 Yesùt atì Karìsùt at o, ìlùk, apunì inebe 3 nen inane omakeat mene hukalogo u hak he, Ala Areagùn nen hukalhìk, Yesùt ebe ima pelapukwa atì ba hukalagìk, amep wulagasogo wasukwa atì ba hukalagìk, hukalogo weinam agaike atì.

⁹ Wene apùnì nen hukalogo yogonisikenem, “Eberogoat,” ìlùk huthogorek atì mea. Atì'nogo meneat he, at Ala ebe aput abok pak hogo yogonisasike atì nek he “Motok eberogoat,” ìlùk hùthasagat o.

¹⁰ Apùnì inetaùken Ala aput oba hìpìrethìlì'lùgì mene hùgì nen he, “Wene atì eberogoat o,” ìlùk ina'la nen hùthìlì'lùgì. Atì'nogo meneat he, apùnì aike inetaùken Ala ba hìpìrethìgì'lek mene hùgì nen he, “Wene Ala okawerek en aput hesik abok isike wene atì eberogoat,” ìlùk akìgì'lek logolìk, Ala apeliak ikerek mene negen hagarogo hìlì'lùgì o.

¹¹ At Ala nen aput hesik wene pak hogo yogonisìkì logolìk, “Inebe ineluk motok welagaikarek atì, ero re, an napurat ma re, an nen Yesùt ebe wokhisìkì logolìk, nabùlal-habùlal ebe mene wokhisasigi atì,” ìlùk yogonisasike.

¹² Apùnì nen Ala aput ebe wanha halok he, nabùlal-habùlalat wanhasik ese agaikasik werek o. Mene re, it aike nen Ala aput ebe wanhì'lek halok he, nabùlal-habùlal wanìk ese agì'legat werek o.

“Nabùlal-habùlal ebe mene ese agosik welago ìlùk, hùthìkì lago,” ìlùk yogoisasike wene

¹³ Hit hinetaùken Ala aput oba hìpìrìk welagep mene hùgì hina'la nen he, “Nabùlal-habùlal ese agosik welago,” ìlùk, hinelu asuageip ìlùk, wene obogat yì helal waganogo hinoba lakhei wagì o.

¹⁴ Nen, nit yì mene tì mene Ala a'la walok akikerek mene higit hogo, at en wo'nisoagalùk kìno yogotenem ninane asuk holheregat atì, ìlùk hùthìlìk, at eilhanem ninayù'lek hogoat kìno yogotì logousak o.

¹⁵ Ati nen he, nit en, “We, nena mene Ala kìno yogotenem, at an ninane asuk holherek atì,” ninelu halok he, “Nit yì mene tì mene kìno yogoto a'nogo arat wo'nisikomo esewerek agosik welago,” ìlùk ninelu o.

^16-17 It apùnì aike weak motok hagataresik he, inoabùt oba inebe moto'-motok wa'lasugun mene werek atì hesik, hit en Ala ayoko housak, ìlùk yogohisìgì lek o. At he, inoabùt higit hogo hagasusak mene werek kolegat he, kolo palogo weak hagatarek atì obogat etage weak meneat he, it aike nen weak hagatenem inoabùt oba inebe moto'-motok wa'lasusak lek mene hagatarek mene weregat o. Mene re, hit Ala againapùrì mene hinerùgì hinagaiya'lak aike weak hagatenem oabùt oba ebe moto'-motok wa'lasusak lek mene hagate halok, at hesik Ala ayoko houmo, at en nabùlal-habùlal ebe mene wogosigin werek o.

¹⁸ Nit Ala againapùrì ta'ninape mene at aput emakum tasike mene a'nogo nen se'nisek were'ma, at oabùt weak mene a'nogo nen eki ha'nisegein lek o. Halok he, nit weak hutik motok hagatì logousak lek, ìlùk ninelu o.

¹⁹ It apùnì kweangma mene inoabùt inesok mene atì obogat he, at oabùt weak mene a'nogo eki ba welagaikarek. Atì'nogo meneat he, nit enek he, Ala ebe againapùrì mene welago, ìlùk ninelu o.

²⁰ At Ala aput ninoba pi wagaikesik, Ala ebe mene ninelu asuagalùk ninetaùken kagalogo yogonisasike. Atì'nogo yogonisasikomo, nit he, Ala ebe mene aput Yesùt Karìsùt eperak ninom hutik motok welago. Nen, at Yesùt he, ebe Ala ebe mene logolìk nabùlal-habùlal ero arat welagarek o.

²¹ Halok nagainapùrì e. At ebe mene welagarek atì heraksalùk, tùgì hareken oba hìpìrìk logolìk weak hagatarek atì hak, hagasinogo ìlùk he, agaseratì logolìk, hinoabùt hebelogo logoino o.