1 YOHANET 4 - Ala Ane Wene Ket Mene Warogo Wo'ninapike Wene

“Ala Areagùn ho, mokareke lalinaperek mene ho, enagat hùrisasak,” ìlùk yogoisasike wene

¹ Nerùgì nagaiya'lak. Netawìlak e. Apùnì inebe apigat en he, “Nit en Ala ane yogohisìkì lago,” ìlùk inapeliak ìlì'lùgì mene inebe arat weinam agaikasik, o yì awì tì awì nùgì atì nen he, aike hinoba wìrìk, wene yogohisikenem, hit en he, “Ala Areagùn a'la logolìk yogonisìlì'logo,” ìlùk hinetaùken inoba hìpìrethùgùp o. At he, “Eberogoat Ala Areagùn a'la logolìk ìlì'logo a? Hùnogo mene a'la logolìk yogonisìlì'logo a,” ìlùk inoabùt tak palìk en, inebe hùrisìkì logoino o.

² Hit en he, “At atì Ala Areagùn mene a'la werek a? Hùnogoat mene a,” ìlùk inoabut tak palhì logousak atì re, yì'nogo. It aike wìrìk he, “At Yesùt Karìsùt atì, Ala nen lakhei wagaikomo eberogoat abat ta'lasi wagaike,” ìlùk pak hogo egarek mene nen iko halok he, hit en he, “It atì Ala Areagùn ina'la logolìk ìlì'lùgì,” ìlùk, hùrisìkì logousak o.

³ Atì'nogo meneat he, it aike nen Yesùt hesik wene atì'nogo pak hogo egarek lek mene nen iko halok he, hit en he, “It atì ina'la Ala Areagùn hùk. Hùnogoat mene werek o,” ìlùk hùrisìkì logousagat o. It atì hesik wene Ala nen hageat yogonisìkì logolìk, “At aike Karìsùt eperak motok weak mene wesigin a'naga o,” ìlùk yogonisasike mene, hinasuk holhigip a'naga, yogotak kweang'ma yoma inebe arat weinam agaikasik werek atìat o.

⁴ Mene re, nagainapùrì e. It apùnì kweangma mene ina'la welagarek mene atì omame lek meneat he, hit enek he, hinebe Ala againapùrì ma re, at Areagùn omame motok apik mene hina'la werek atì nen he, it ap atì mabenetsìlìk welagep atì o.

⁵ It atì inebe apùnì kweangma mene inagainapùrì nogo nen he, it en wene kweangma wene ikenem, inane it apùnì kweangma mene aike nen inasuk holharek atì.

⁶ Mene re, nit he, ninebe Ala againapùrì mene logolìk ninane ikenem, it aike Ala ebe inelu mene halok, inasuk holhìk, nen, it aike inebe Ala againapùrì mene hùk, hùnogoat halok he, inasuk holhì'lek heraksìgìk, egarek o. Atì'nogo ikenem nit en he, “Ala ebe mene Areagùn it atì ina'la werek, nen it agaike atì mokareke lalinaperek mene ina'la werek,” ìlùk enagat hùrisogorek atì.

“Ala nen etawì'ninaperek atì hak, nit-nit netawì-hetawìrogo logousak,” ìlùk yogoisasike wene

⁷ Nerùgì nagaiya'lak. Netawìlak e. Apùnì aike inetawìrinaparek atì ero, at Ala at atì nenat he, nit-nit netawì-hetawìrogo logouok o. Apùnì netawì-hetawìrogo logogun mene hùgì, inebe lopok Ala nen taginapikomo, at againapùrì logolìk, at ebe ineluat werek o.

⁸ Nen, at Ala oabùt he, nit etawì'ninapo welagarek atì nen, sa nen netawì-hetawìrogo logogin lek halok, at atì nen Ala ebe okot werek o.

⁹ Mene re, Ala nen, “Hit hinebe netawì welagì,” ìlùk hukalogo sele'matheigìlùk, aput omakeat tago a'nogo nen, ninelugu'ninabuagalùk kweang'ma pelabi wagaike atì.

¹⁰ It aike inetawìrinaparek atì ebe re, nit en Ala ninetawìrasugu hùk, lek o. We, at Ala nen nit etawì'ninapikesik, at en nit weak hagatorek mene sagalogo legetsìlìk ho'ninabuagalùk, aput ninoba pelakhei wagaike atì.

¹¹ Nerùgì nagaiya'lak. Netawìlak e. At Ala nen nit atì'nogo etawì'ninapike atì nen, nit hogo re, nit-nit netawì-hetawìrogo logouok o.

¹² Nen, Ala ebe atì re, apùnì agaike nen ineileken motok hìgì'lek. Meneat he, nit-nit netawì-hetawìrogo logogun halok he, Ala ninom hutik motok logogun o. Atì'nogo were'ma, emakum Ala nen etawì'ninapì logolìk, a'la akasike atì hagat, yì mene tì mene hano katok hogo hagatarek atì hak, nit-nit netawì-hetawìrogo logouagalùk katok hogo haga'ninabì'logo atì.

¹³ Ala nen Areagùn wo'nisasike atì ba, nit en akìkì logolìk, “At nit ninom hutik werek. Nen, nit at ninom hutik welago,” ìlùk hùthìkì lago o.

¹⁴ Nit en he, “Ala nen aput nineileken hìkì lagagu mene atì nen, nit apùnì kweangma mene telninabuagalùk lakhei wagaikomo,” ìlùk abok pak hogo yogohisìkì lago.

¹⁵ Sa nen, “Yesùt atì Ala aput,” ìlùk pak hogo yogoisikerek halok, at Ala nen at eperak hutik motok, nen, at en Ala eperak hutik motok, welagaikarek o.

¹⁶ Nit en, “Ala nen etawì'ninaperek atì hùthogosik eberogoat,” ìlùk akìkì lago. At oabùt he, etawì'ninapo motok welagarek atì nen, sa nen oabùt he, apùnì etawìrinapo motogat welagarek halok he, Ala nen at eperak hutik motok, nen, at en Ala eperak hutik motok, welagaikarek.

¹⁷ At Karìsùt welagarek atì hak, nit kweangma atì'nogoat welago atì nen, hobuk Ala nen nit ninanema waganogo ùkùm ninoba hìgìk, kotìk, igin atì like ninekalì lek logogun. Ninekalì lek hogo logouagalùk he, emakum Ala nen etawì'ninapì logolìk, a'la akasike atì hagat, yì mene tì mene hano katok hogo hagatarek atì hak, nit-nit netawì-hetawìrogo logouagalùk katok hogo haga'ninabì'logo atì.

¹⁸ Apùnì aike nen it aike inom netawì-hetawìrogo logolìk, inayùlek welagaikarek atì nen, yì mene tì mene katok hogo hagatarek atì hak, nit-nit netawì-hetawìrogo hagatì lago mene atì katok hogo motok haga'laga logolìk he, ninoabùt ninayùk mene atì lek agarek. Mene re, it apùnì agaike inoabùt inayùk mene atì, ina'la nen he, “Eige! Ala nen hobuk ùkùm ninoba hegein he a,” ìlùk inoabùt youksek welagaikarek atì. Atì'nogo welagaikarek atì nen, netawì-hetawìrogo hagatarek mene atì ina'la hano katok hogo haga'lagarek motok lek o.

¹⁹ Emakum Ala nen tak etawì'ninapikesi'mo re, nit hogo re, nit-nit netawì-hetawìrogo logouok o.

²⁰ Atì'nogo meneat he, apùnì nen inerùgì inagaiya'lak ineileken isagarek mene inetawì lek logolìgat he, Ala ineileken hagarek lek mene inetawì logousak akegep? Mea o. Halok he, at aike erùgì agaiya'lak apsìrì welagarek mene nen, “An Ala netawì,” ìlùk ìlì'logo halok he, apeliagat ìlì'logo o.

²¹ Ati nen, at Karìsùt en ninasuk watì logolìk: “Ala hinetawìrogo logolìk, hinerùgì hinagaiya'lak hinetawìrogoat logoino o,” ìlùk yogonisasike atì.