1 YOHANET 3 - Ala Ane Wene Ket Mene Warogo Wo'ninapike Wene

“Ala againapùrì mel, Ibilit againapùrì mel, enagat agaikarek,” ìlùk yogoisasike wene

¹ At Ala nen he, “It yì an nagainapùrì,” ìlùk ta'ninapikomo eberogoat nit ninebe at againapùrì welago. Atì'nogo welagorek atì nen, ninebe at etawì motok welagarek atì hani! Atì'nogo meneat he, it apùnì kweangma mene inoabùt inesok mene amanogo nen Ala ebe inokot atì nen he, nit ninebe inokorat o.

² Nerùgì nagaiya'lak, netawìlak e. Yogotak nit ninebe Ala againapùrì welago meneat he, hobuk ninebe logogun mene weinamethìgì'lek oan hinago werek o. Atì'nogo meneat he, nit ninelu re, Yesùt ebe yogotak werek mene nineileken tùkùm hogo hogoin atì nen, at wesigin atì like ebe waganem, nit ninebe at ebe werek atì hak haga'lasugun o.

³ Nit nina'la nen, “Atì'nogo haga'lasugun,” ìlùk, oba eberek welagorek mene ninebe lopok on, at okawerek ebe tegelek welagarek atì hak, nit atì'nogoat tegelìkì logousak o.

⁴ Nen, apùnì nen weak hagatarek atì Ala aneat sagalharek atì nen he, sa nen weak hagarì'logo halok, Ala aneat sagalogo hagarì'logo o.

⁵ At Karìsùt okawerek weak hagatì'lek logolìk, nit weak hagatorek mene sagalogo legetsagalùk, ebe weinam hogo wagaike atì hinelu o.

⁶ Ati nenat, nit at ninom hutik motok welago mene hùgì, ninebe lopok weak hagato motok welagorek lek. Mene re, it apùnì aike weak enek hagato motok welagaikarek mene inebe lopok he, at ebe ineileken hìgì'lek inokorat werek o.

⁷ Nagainapùrì e. It apùnì agaike nen lalhinabi nogo ìlùk hinoabùt hebelogo logoino o. Sa nen oabùt higit hogo hagaterek halok he, at Karìsùt oabùt higit hogo hagaterek atì hagat, hagato werek o.

⁸ Nen, at aike nen oabùt weak hagato motok welagarek halok he, at Ibilit oabùt ero ba nenat weak hagateresi'mo nogo nen he, at atì ebe re, Ibilit aput werek o. Mene re, at Ala aput weinam hogo wagaike atì re, at Ibilit oabùt hagaterek mene atì, motok legetsagalùk wagaike o.

⁹ Nen, apùnì Ala nen taginaperek mene hùgì inebe lopok, at oabùt wìlìk hagatarek atì nen, weak hagato motok logousak lek. Inebe Ala againapùrì logolìk weak hagato motok welagaikarek lek o.

¹⁰ Ala againapùrì mel, Ibilit againapùrì mel, ninetawì wekelogo inoabùt enagat haga'larì'lùgì re, yì. Sa nen oabùt higit hogo hagatì'legat, erùgì agaiya'lak etawìrinapì'legat, hagarì'logo halok, at atì ebe Ala aput lek o.

“Hit-hit netawì-hetawìrogo logoino,” ìlùk yogoisasike wene

¹¹ Wene Ala nen he, “Hit-hit netawì-hetawìrogo logoino o,” ìlùk yogonisasike mene, apùnì aike nen yogohisasukwama ero ba nen hinasuk holhigip atìat o.

¹² Nit en he, at Kain ebe Ibilit oabùt weak mene atì aput agaikesik okawerek agot mene wasike atì hak hagasusak lek o. At en agot wasike atì, nenahalok wasike nogo. At hagatì lagaike mene kolo motok, nen, agot hagatì lagaike mene higit motok, atì nenat wasike o.

¹³ Halok, nerùgì nagaiya'lak e. Apùnì kweangma mene nen, hit inabìt motok hagathinapo halok he, “Nayùk e,” ìlùk hinalabut hìtùp o.

¹⁴ Ala nen ninebe wa'lagaikare'ma nen wo'ninabik, ineluk welagaikare'ma hinikomo welago ìlùk, nit-nit ninerùgì ninagaiya'lak ninom netawì-hetawìrogo welago atì nen hùthìkì lago o. Halok he, sa nen apùnì aike etawìrogo lek, abìt welagarek mene atì ebe wa'lagaikare'ma atomaat werek o.

¹⁵ Inerùgì inagaiya'lak inapsìrì welagaikarek mene atì, it inebe lopok apùnì inoare meneat o. Nen, it apùnì inoare mene atì, inebe lopok nabùlal-habùlal ese agì'lek motok werek, ìlùk ninelu o.

¹⁶ At Karìsùt en tak nit etawì'ninapikesik, ebe nit hesik wa'lagaike atì nen, nit en it apùnì aike inetawìrinaparek wene atì, hùthìkì lago. Hùthìkì logolìk, at hagasike atì hak, nit ninerùgì ninagaiya'lak inebe ninetawì nen, ninebe it hesik wa'lasusak hanoat o.

¹⁷ Mene re, sa nen at agarok yì mene tì mene kweangma mene hìlìk logolìk, erei agaiyak aike yì mene tì mene elageik were'ma eileken hìlìgat he, aike wogotì'lek etaùken pesethike halok, at atì oabùt he, Ala nen etawì'ninaperek atì hake werek akegep? Motok lek o.

¹⁸ Halok he, nagainapùrì e. Nit en apùnì aike ninetawìrinapì'lek logolìgat he, ninane ba nek he, “Ninetawìrinapì logouok o,” ìlùk ìkì logousak mea o. At he, inebe ninetawìrinabìk, nineki ba nen eberogoat leberisìkì logouok o.

“Nit Ala eilhanem ninayù'lek hogo logousak,” ìlùk yogoisasike wene

^19-20 Nit en ninoabùt atì'nogo hagatì logolìk, nina'la nen he, “Nit ninebe Ala ebe mene againapùrì welago,” ìlùk hùthasak. Atì'nogo hùthìkì logolìk, nit weak hagato, ìlùk nina'la ekin welago halok, nit ninebe mea mene re, at Ala nek he, ebe hùko logolìk, yì wene tì wene obogat elu nek welagarek, ìlùk, at eilhanem nina'la se ninayù'lek hogoat logousak o.

²¹ Halok he, nerùgì nagaiya'lak. Hinebe netawì e. Nit nina'la nen, “An weak agaike hagatì,” ìlùk wenesùgì ebetì'lek, nina'la se welago halok he, at elokoma ninayù'lek hogo logolìk,

²² at en wene ninasuk wasike wene higit hogo hagatìk, at eilhanem a'la hanorogo nek hagatìk, ìkì lago atì nen, nit yì mene tì mene kìno yogotenem, at en wo'nisìlì'logo.

²³ At en wene ninasuk wasike atì, ebe re: “Hit hinetaùken an naput Yesùt Karìsùt oba hìpìrethìlìk, at en yogohisike atì hagat, hit-hit netawì-hetawìrogo logoino o,” ìlùk ninasuk wasike atìat o.

²⁴ Nit Ala nen wene ninasuk wasike wene atì hologo higit hogo hagatì lago halok he, at Areagùn wo'nisasikomo nina'la werek, atì ba, nit at ninom hutik, nen, at nit ninom hutik welago, ìlùk hùthìkì lago.