1 YOHANET 2 - Ala Ane Wene Ket Mene Warogo Wo'ninapike Wene

“Karìsùt ebe nit hesik hùlìsanem welagarek,” ìlùk yogoisasike wene

¹ Nen, nagainapùrì e. Hit weak hagatì logoinogo ìlùk, wene yì helal waganogo hinoba lakhei wagì o. Atì'nogo meneat he, sa nen weak hagate halok, ninopase Ala were'ma nit lebe'nisikerek mene ap aike hùlìsanem werek. At atì ebe Yesùt Karìsùt oabùt higit hogo hagaterek mene a'nogoat o.

² At ebe atì'nogo logolìk, nit yì weak tì weak hagatorek mene sagalogo legetsìlìk, ho'ninaperek. Atì'nogo hagaterek atì re, nit weak hagatorek mene hesik enek hùk. At he, yì apùnì tì apùnì kweangma mene obogat weak hagatarek mene hesik ninomat ho'ninaperek o.

³ Wene Ala nen ninasuk waterek wene atì, hologo higit hogo hagatì lago halok he, at e be ninelu o, ìlùk atì ba nen ninetawì wekelogo hùthìkì lago.

⁴ Mene re, sa nen, “An he, Ala ebe nelu,” ìlùk ìkì logolìgat he, at en wene ninasuk waterek wene atì hologo higit hogo hagatì'lek halok he, at apeliak ikerek atì. Halok, ebe wene atì a'la motok lek o.

⁵ Atì'nogo meneat he, sa nen Ala ane hologo higit hogo hagaterek halok he, yì mene tì mene katok hogo hagatarek atì hak, at atì Ala motok etawìrogo welagarek o. Nen, nit atì'nogoat welago halok, nit Ala ninom hutik welago, ìlùk atì baat ninetawì wekelogo hùthìkì lago.

⁶ Nen, sa nen, “An Ala neperak hutik welagì,” ìlùk ikerek halok he, oabùt at Karìsùt hagatì lagaike atì hagat hagatì logousak o.

Wene ket wene yogoisasike wene

⁷ Nerùgì nagaiya'lak. Hinebe netawì e. Wene ket wene hinasuk warogo helal waganogo hinoba lakhei wagì hùk. We, holoat Ala nen hinasuk warogo yogohisasikomo ero ba nenat hesogo welagasep mene o. Wene atì re, at Ala nen hinasuk holoat wasikomo holhigip mene a'nogoat o.

⁸ Atì'nogo meneat he, o mùm were'ma lìa arìk lagarek atì hak, lìa ebe mene ya'nisa wagaikomo yarì'logo atì nen he, wene ket wene hinasuk warogo hinoba lakhei wagì atì. At Yesùt en wene atì higit hogo hagatenem ebe agaike atì hak, hit en hogo re, atì'nogoat, wene atì higit hogo hagatenem ebe arì'logo atì.

⁹ Nen, sa nen, “An nebe lìa ba welagì,” ìlùk ìkì logolìgat he, erùgì agaiya'lak apsìrì halok he, o hageat en pìkìt yogotak ya, at ebe mùm oba werek o.

¹⁰ Atì'nogo meneat he, sa nen erùgì agaiya'lak etawìrogo welagarek halok he, at ebe lìa ba motok logolìk, apùnì nen it aike waroagalùk ineram en kwe palharek atì hak, it agaike weak hagasuagalùk lalinaperek lek o.

¹¹ Atì'nogo meneat he, sa nen erùgì agaiya'lak apsìrì welagarek halok he, at ebe o mùm oba werek o. Atì'nogo were'ma, mùm nen eileken mùmethikomo ebe o mùm oba nìkì logolìk, “Koma laga lagì heat,” okot oake palek werek o.

¹² Nagainapùrì e. Weak hagatì lagagip mene Ala nen aput Yesùt hagasike atì ba sagalogo heraksasike atì nen, an nen helal waganogo hinoba lakhei wagì o.

¹³ Nopaselak e. At emakum ero ba nen welagarek mene a'nogo ebe hinelu agagisip welagep atì nen he, helal waganogo hinoba lakhei wagì. Nen, ap elege nagoromì e. Hit en at oabùt weak mene a'nogo arat mabenetsasigisip welagep atì nen, helal waganogo hinoba lakhei wagì o.

¹⁴ Yekerùgì nagainapùrì e. Ninopase Ala hinelu agagisip welagep atì nen, helal waganogo hinoba lakhei wagìk, hit nopaselak, at emakum ero ba nen welagarek mene a'nogo ebe hinelu agagisip welagep atì nen helal waganogo hinoba lakhei wagìk, hit ap elege nagoromì, hit hinomame were'ma Ala ane hina'la were'ma re, at oabùt weak mene arat mabenethesigip atì nen, helal waganogo hinoba lakhei wagìk, ìgì atì o.

¹⁵ Mene re, apùnì kweangma mene inoabùt hagatarek mene atì mel, yì mene tì mene kweangma welagarek mene atì mel, hinetaùken tùlem logousak motok lek o. Sa nen it apùnì kweangma mene inoabùt hagatarek mene atì, etaùken tùlem welagarek halok he, ninopase Ala etaùken tùlem welagarek motok lek o.

¹⁶ Nen, apùnì kweangma mene inoabùt hagatarek he, inoba aiyage lagagìk, yì mene tì mene ineileken nen hìlìk walok akìgìk, kweangma mene hesik hogorakìgìk, egarek atì obogat he, ero re, ninopase Ala hùk. Ero re, kweangmaat o.

¹⁷ Apùnì kweangma mene inoabùt hagatarek atì mel, yì mene tì mene walok ìlùk hagatarek atì mel, lek arìk wìrì'logo meneat he, apùnì Ala a'la walok akikerek mene hagatarek mene atì nek he, ineluk motok logogun o.

“It aike Karìsùt inom motok weak mene weinam agaikasik werek,” ìlùk yogoisasike wene

¹⁸ Nagainapùrì e. O yogotak he, elùgùn oba welago o. Apùnì aike nen he, “Hobuk ap agaike Karìsùt eperak motok weak mene wesigin,” ìlùk yogohisasukwama, hinasuk holhigip atì hak, o yogotak he, Karìsùt inom weak mene inebe apik arat weinam agaikasik werek atì nen he, nit en, “O yogotak eberogoat elùgùn oba welago,” ìlùk ninetawì wekelarìk hùthìkì lago.

¹⁹ It apùnì atì inebe re, nit mene palek meneat he, it inebe eberogoat nit werekwe mene lek o. It inebe eberogoat nit werekwe mene logoilepma re, inebe nit ninom motogat logoilo o. Mene re, Ala a'la nen, “It atì, inebe obogat hit mene lek, hunigat mene werek, ìlùk, enagat asuak,” ìlùk akasike ba it atì'nogo wùlùpukwa atì.

²⁰ Atì'nogo meneat he, hit enek he, Yesùt Karìsùt Ala nen okawerek hakasike mene a'nogo nen, Ala Areagùn wokhisasikomo ebe wene hinebe obogat hinelu agagisip welagep o.

²¹ An nen wene helal waganogo hinoba lakhei wagì atì re, ebe wene hinokot en hùk. Hinelu welagep atì nenat lakhei wagì o. Nen, inapeliak egarek atì ero re, Ala ebe mene nen hùk. Ero hunigat, ìlùk hineluat o.

²² At apeliak ikerek mene atì ebe sa akegep. At atì nen, “Yesùt ebe re, Karìsùt lek o,” ìlùk kogologo laksikerek mene atì lek nogo? Atìat o. At Karìsùt eperak motok weak mene ebe re, ninopase Ala aput Yesùt eperak inebe kogologo laksikerek mene atìat o.

²³ Sa nen, “Ala aput atì, ebe nabìt,” ìlùk kogologo laksike halok, opase Ala ebe wanhì'legat o. Nen, sa nen, “Ala aput ebe atìat o,” ìlùk ane pak hogo ike halok, opase Ala ebe wanheat o.

²⁴ Nen, hit he, wene alebat hinasuk holhigip mene atì, hina'la Wìlìk he, eberek motogat logoino. Atì'nogo logogun halok he, hinebe ninopase Ala aput Yesùt eperak hinom hutik logogun o.

²⁵ Nen, at okawerek en, “Wokhisegein,” ìlùk abok yogonisasike a'nogo re, ninebe nabùlal-habùlal haga'ninabigìluk isike o.

²⁶ Wene yì obogat he, it apùnì hit lalhinabuogolùk walhìlì'lùgì mene hesik helal waganogo hinoba lakhei wagì o.

²⁷ At Karìsùt en Ala Areagùn wokhisasikomo hina'la logolìk, yì mene tì mene hesik, apeliak yakùlhisìgì'lek, eberogoat enek yakùlhisìlì'logo atì nen he, apùnì aike nen wene hit yakùlhisasak mea o. Wene at Ala nen yakùlhisìlì'logo mene atì higit hogoat hagatì logolìk, Karìsùt hinom hutik motogat logoino o.

²⁸ Nagainapùrì e. Karìsùt wesigin atì like ebe waganem he, nit ninekalì agì'lek, ninayù'legat, at elokoma awe a'ma kuok en, hit at hinom hutik motok logoino o.

²⁹ At Karìsùt Ala aput oabùt hano higit hogo nek hagaterek a'nogo hinelu halok he, hit hina'la nen he, “It apùnì aike inoabùt hano higit hogo hagatarek mene inebe lopok Ala againapùrì hobuk taginapomo werek,” ìlùk hinelu asusagat o.