1 YOHANET 1 - Ala Ane Wene Ket Mene Warogo Wo'ninapike Wene

Ebe wene nen ninelugu'ninaperek wene

¹ Wene helal waganogo hinoba lakhei wago atì ebe re, ebe wene ninelugu'ninaperek mene emakum ero ba nen welagarek a'nogo mene. Wene atì, nit arat ninasuk holhìk, nineileken tomok hìgìk, yerogo welagìk, nineki hakìgìk, isugu mene a'nogoat o.

² Nen, at eluk motok welagarek mene atì, ebe opase eperak eluk motok welagaikesik en, opase nen nit nineileken hoagalùk weinamethesikomo nineileken hasugusik enat abok yogohisìkì lago o.

³ Ebe nit nineileken hìgìk, ninasuk holhìk, isugu mene atì, ninopase Ala aput Yesùt Karìsùt eperak ninom hutik welagorek atì hak, hit nit ninom hano hutik logouogolùk yogohisìkì lago o.

⁴ Nen, wene yì hesik nina'la hai hakìkì lago mene atì, hobuk nina'la hùkorogo eberogoat hai hakùogolùk helal waganogo hinoba lakhei wago atì.

“Ala aput en he, Ala ebe, lìa atìat o, yogonisasike,” ìlùk yogoisasike wene

⁵ Ala aput en yogonisìkì logolìk he: “Ala ebe re, lìa atìat ma re, o mùm at oba welagarek motok lek,” ìlùk yogonisasike mene, nit ninasuk arat holhugu mene yogohisìkì lago atì.

⁶ Nen, nit he, ninane ba nen, “At ninom hutik welago,” ìlùk ìkì logolìgat he, o mùmmo logolìk inoabùt hagatarek mene atì hagatì lago halok he, ebe mene hagatì'lek ninapeliak ìkì lago o.

⁷ Atì'nogo meneat he, Ala ebe lìa ba welagarek atì hak, nit hogo re, lìa ba logolìk, hano hagatì lago halok, nit-nit nagaiyak-hagaiyak ninom hutik were'ma, nit weak hagatenem at aput Yesùt amep oba ho'ninapo motok welagarek o.

⁸ Atì'nogo meneat he, nit en ìkì logolìk he, “Nit weak agaike hagatì'lek,” ìlùk ìkì lago halok he, ninapeliak ninokawerek lalìkì lago atì nen, ebe wene nina'la motok lek o.

⁹ Mene re, nit weak hagato mene hukalogo hogoin halok, at oabùt higit motok logolìk, wene wa'nisikerek hagat hagateresi'mo re, nit weak hagatorek mene sagalogo heraksìlìk, weak hagasuogolùk nina'la kagalhorek mene sobalninaperek.

¹⁰ Atì'nogo meneat he, nit en he, “Weak agaike hagatì'lek welago,” ìlùk ogorek halok he, nit en he, “Ala apeliak ikerek,” ìlùk u hagat ogorek atì nen, Ala ane nit nina'la motok lek o.