1 TIMOTÌÙT 6 - Ala Ane Wene Ket Mene Warogo Wo'ninapike Wene

¹ Apùnì aike nen Ala etage weak ìgìk, at ane nit en yakùlisìkì lago mene hesik, “Wene atì weak,” ìgìk, inogo ìlùk, Ala againapùrì mene it aike inatitigeke arìk hagarì'lùgì mene atì, inokawerek inogogi mene atì inawe a'ma logolìk, ina'la nen, “Noe atì agaugeratì logousak,” ìlùk, agaugerinapì logouak o.

² Atì'nogo agaugerinapì logolìk, it inatitigeke mene atì ina'la nen he, “An noe atì etaùken Ala oba hìpìrethìlìk welagarek atì nen neperak Ala againapùrì omakeat mene nagaiyak neperak,” ìlùk inogogì inebe ina'la nen meatsìgì'legat, “An noe lebethìkì lagì yì, etaùken Ala oba hìpìrìk werek meneatma netawì o,” ìlùk, hobuk aike inom hùkorogoat leberisìkì logousak o. Wene igin yì obogat hat en yakùlisìgìk, inasuk watìk, ìkì logoino.

“Wene hunigat meneat he, ebe wene negen, yakùlisikenem tùlem housak lek,” ìlùk yogosike wene

³ It apùnì aike nen hano wene ninoe Etagepogot Yesùt Karìsùt en hagasike wene a'nogo mel, “Ala awe a'ma kìlìk, tì'nogo hagatì logousak,” ìlùk, wene yakùlisìkì lago mene atì mel, heraksìlìk, hùnogo wene yakùlisìlì'lùgì mene aike werek.

^4-5 It atì nen he, wene ebe inokot meneat he, inokawerek hogorakìkì logolìk apùnì aike inom inane mene hesik wene palhìk, serep agìk, ìkì logouogolùk, inabìt logousak mene esinethìlì'lùgì atì nen, elùgùn oba re, apùnì aike inetaùken lek arìk, ebe wene inokot arìk, it-it inom ua palhik, wene palhìk, inapeliagat inabok weak palhìk, ina'la nen hohogomat ùkùm weak mene it aike inoba hìgìk, tùgì-tùgì wene-wene palìgì'lek iko motok welagaikarek atì. Atì'nogo hagatì logolìk ina'la nen he: “Nit Ala awe a'ma kìlìk hagatì lago atì ba, nineilmo wùlalhak asugun,” ìlùk, eberogoat salek akìlì'lùgì atì.

^6-7 Meneat he, ninagosalak ina'la nen ta'laga logolìk he, yì mene tì mene aike ninekim wolok wagorek lek atì hak, ninebe wa'laga logolìk he, yì mene tì mene aike wolok logoin legat atì nen, nineilmo Wùlalhak logou hak, nit Ala awe a'ma kìlìk logolìk nina'la nen he, “Elogat welago,” ìlùk, ninepe morogo logoumo, ebe mene sabùrogoin atì.

⁸ Ma re, nìkì logousak mene mel, ninogat labetì logousak mene mel, werek halok he, “Atì elogat werek,” ìlùk akasak o.

^9-10 Ati'nogo meneat he, apùnì nen he, “Esin uang atìat,” ìlùk inetaùken tùlemethìlìk he, erepùl oba yì weak tì weak hagarì'lùgì atì. It aike nen uang atì mene herasuogolùk, inetaùken Ala oba hìpìrìk welagaikasik enat he, heraksalùk hobuk e ba saluk hogo waragarek hak, it inokawerek ina'la wiik-weak hogo hagarìlì'lùgì atì. Ati nen he, apùnì aike nen, “Yì mene tì mene hùkorogo helìlìk ninebe kain logoilo e,” ìlùk akìlì'lùgì atì re, paik hele hìlì'mo kerelarìk wa'lagarek hak, Ibilit en ina'la kagalhenem, yì mene tì mene walok akasak lek meneat he, weagarinabigin mene walok ìlùk akìlì'lùgì atì nen he, inebe weak akìgìk, nong akìgìk, egarek atì.

At Timotìùt okawerek hesik tegelìkì logouagalùk yogosike wene

¹¹ It atì'nogo hagatarek meneat he, hat he, hebe Ala aput welagen atì nen, atì mene hagatì'lek heraksìlìk logoino. Atì'nogo logolìk, Ala a'la akikerek higit hogo hagatìk, awe a'ma kìlìk, at hesik hagatìk, hetaùken at oba hìpìrìk welagìk, apùnì hetawìrinapìk, hepe morogo welagìk, hoabùt enago welagìk, ìkì logoìgìlùk, atì meneat esinethìkì logoino.

¹² Apùnì inawe walhùogolùk sa awewerek sa awewerek walhagarek hak, nineluk motok logogun atì mene hela lagalùk, hetaùken Ala oba hìpìrìk logolìk, at hesik homamerogo hagatì logoino. Atì'nogo hagatì logopik, atì mene hela lanogolùk, Ala nen hayoko hesikomo, hat en he, “Netaùken Karìsùt oba hìpìrethìlìk tì'nogo hagatì logogin,” ìlùk apùnì logolegat ineilhanem pak hogo isigin atì higit hogoat homamerogo hagatì logoino.

¹³ Ala apùnì ninebe mel, yì mene tì mene mel, obogat ninelugu'ninaperek mene a'nogo eilhanemat, Karìsùt Yesùt apùnì nen ap Potìùt Pilatùt oba wolok lagaukwama, ane eberogoat pak hogo yogosike a'nogo eilhanemat, wene yì hasuk warogo yogohesigin.

¹⁴ Hat en wene at en yogonisasike wene atì obogat higit hogo hagatì logolìk, weak mene hagatì'lek tegelek were'ma, apùnì aike nen ùkùm hoba housak legat logopik, hùlì ninoe Etagepogot Yesùt Karìsùt ebe weinam hogo wesigin atì hùlì haga'lasuagalùk yogohetì atì.

¹⁵ At Ala nen, “Ti hùlì weinamethegein,” ìlùk akasike baat weinamethikenem wesigin o. At Ala hogorato motok welagaikarek mene, aligat omame werek o. Ati nen, inetagepogot welagaikarek atì obogat hesik he, inoe Etagepogot at aligat. Nen, yì apùnì tì apùnì inogogì kaintek welagaikarek mene atì, obogat inoe kain he, aligarat o.

¹⁶ Nen, at ebe wa'lagì'lek esok motok welagarek he, at aligat o. At ebe o lìa ba motok were'ma, ineileken siluk pabuk ìlìk, oba horok hogo lasak mea. At ebe apùnì aike nen ineileken hìgì'legat. Atì'nogo hasak mea. Omame motok logogin mene atì, hogorato motok logouok o, ìlùk “Amin,” ìgì atì.

¹⁷ Yì mene tì mene obogat lek asigin meneat he, it ap kaintek inetagewerek mene atì ina'la nen hogorakìkì logolìk, “Nagarok kweangma mene yoma motok apik yì nen nebe hano logogin,” ìlùk, akìkì logoinogo. At he, at Ala yì mene tì mene obogat nina'la hairogo helìkì logouagalùk hùkorogo wo'nisikerek a'nogo nenat hano'ninabigin ìlùk hùthìkì logouak en inasuk watì logoino.

¹⁸ It atì hanorogo hagatì logolìk, inagarok apik logou hak he, apùnì aike hanorogo leberisìkì logolìk, inagarok lek mene wogisìgìk, sùpùrisìgìk, ìkì logouagalùk inasuk watì logoino.

¹⁹ Atì'nogo hagatì logogun halok he, yì mene tì mene hobuk mene hesik atogorogo hagarek hak, hano hagatì logolìk, hobuk motok logogin mene hesigat hakìkì logopik he, ninebe eberogoat ninelugu'ninabumo logogun atì meneat heloagalùk inasuk Watì logoino o.

^20-21 Timotìùt naput e. Ala nen hayoko hìkì logolìk, “Yi mene hagatì logoino,” ìlùk, hoba hesike mene atìat hanorogo hesogo logolìk, homamerogo hagatì logoino. It aike nen Ala ane usak mene atì ìgì'lek logolìk, we tùlemat, lek asigin mene hesigat wene serep aga logolìk, “Wene ninelu,” ìlùk, ìlì'lùgì atì inokot logolìk ìlì'lùgì o. It atì nen he, “Wene ebe mene arat hùthogo,” ìlùk ìkì logolìk, Ala ane eberogoat mene heraksalùk nong asi wùlùpa atì nen, wene atì mene wanhì'lek heraksìlìk logoino o. Ala oabùt hano a'nogo nenat hakharek logouak o.