1 TIMOTÌÙT 5 - Ala Ane Wene Ket Mene Warogo Wo'ninapike Wene

Timotìùt en Ala againapùrì mene aike, oe agot negen yogoisìkì logouagalùk yogosike wene

¹ Hat en, ap inalùgetek halok he, hane uare'ma yogoisìgì'lek, we, hopaselak negen hane lìok hogoat inasuk watì logoino. Nen, ap elege atì re, hagaiya'lak negen hinom welagìk,

² hìmì inalùgetek atì re, hagosalak negen hinom welagìk, hìmì tùgùm mene salisik mene atì re, herùgì negenat, ha'la weak mene ebetì'lek heil lopok hogo hinom welagìk, ìkì logolìk, inasuk hanorogo watì logoino.

Hìmì soge mene leberisìkì logouagalùk isike wene

³ Nen, hìmì soge apùnì it mene nen leberisasak mene le'ma inaligat werek mene halogat, agaugerinapì logoino.

⁴ Atì'nogo meneat he, it soge mene atì ineagwì, inagonabì tagomakwe mene aike werek halok he, it atì nenat, “Nit ninebe ero omakeat en tago mene,” ìlùk, it en hagasusak mene yakùluak. Ati re, at Ala a'la nen he, “An nawe a'ma logolìk, inopaselak en kùlinapì lagaukwa hak, oko it tak hanorogo leberisìkì logousak o,” ìlùk a'la walok akikerek atì nen he, atì'nogoat leberisìkì logouak.

⁵ Mene re, hìmì soge eberogoat apùnì ero it mene le'ma inaligat logolìk he, “Ala nenat lebe'nisegein,” ìlùk, inetaùken at oba hìpìrethìlìk, likene hùako ayoko hìgìk, kìno yogotìk, iko motok welagaikarek.

⁶ Mene re, it hìmì soge mene aike it walok mene, yùgùnat hagarì'lùgì mene atì, inebe ineluk werek meneat he, warek hake werek o.

⁷ Hìmì soge atì hesik, it aike nen ùkùm inoba hìgì'lek hano logouagalùk, wene atìat inasuk hanorogo watì logoino.

⁸ It ap aike nen Ala ane eberogoat ìlùk wanhukwasik logolìgat he, inokawerek inagainapùrì atìat esinethìlìk leberisìgìk, apùnì ero it mene halok ato inomat leberisìgìk, ìgì'lek halok he, Ala ane heraksalùk wùlùpasik hakeat werek o. It apùnì etakwe mene nen wene wanhì'lek logolìk, weak hamùlùgat negen hagarì'lùgì meneat he, it atì wene wanhukwasik en apùnì it mene leberisìgì'lek atì nen, weak hùko negen hagarì'lùgì o.

⁹ It hìmì soge mene Ala againapùrì nen leberisìkì logouagalùk inetage helal palugun halok he, inebe ta'lagaukwasik oba nen umur 60 tahun oan haga'lagì'lek mene inetage palusak lek o. We, umur 60 tahun haga'laga mene halok inetage palusak. Mene re, inagonì omakeat motok waganek were'ma soge hisaga mene halok inetage palusak.

¹⁰ It apùnì aike nen it hìmì soge mene atì inabok ìkì logolìk, “It inoabùt hano hagarì'lùgì,” ìlùk egarek mene halok, inetage palusak. Hano hagatarek atì re, inokawerek ineagwì hanorogo kùlinapìk, ap pok waganem inebe hanorogo woginapìk, Ala againapùrì aike inesok obakwe sobalisìgìk, it aike weak were'ma leberisìgìk, ineki aike kamo ìgì'lek yì hesik tì hesik leberisiko motok welagìk, egarek mene halok, inetage palusak o.

¹¹ It hìmì soge tùgùm oan mene atì, Karìsùt inom hutik werek meneat he, heraksìlìk, agasabu nen inetaùken sebelusak lek asumo, ap aike wanusak atì nen inetage palhùn o.

¹² It atì soge hisikenem, it en he, “Nit ninoabùt Karìsùt hesik enek nineil lopok hogo hagatì logogun o,” ìlùk ìlìk en, hobuk atì'nogo hagatì'lek heraksaga halok, inokawerek en ùkùm inoba hakogoin atì.

¹³ Atì'nogo hagatì logolìk, inoabùt he, ineki wanùhùk o kùlùk ya ha'lagìk negarek. Atì'nogo nìkì logolìk he, aike weak motok mel hagarì'lùgì. Inane hùsipi weak ìkì logolìk it aike inawene meneat talepogoke ìgìk, wene aike usak lek mene hanogoat mene ìgìk, ilik nùgì atì.

^14-15 Halok he, it hìmì soge aike Ibilit opolik kwanìrogo wo'laka lagaika atì nen, it aike nit Ala againapùrì ninom weim palek hake mene nen ninabok weak palinogo ìlùk, it hìmì soge tùgùm mene atì, inagonì lopok woginabìk he, ineagwi tagasogo hanorogo tegelogo hagisek logouagalùk ìgì atì.

¹⁶ Mene re, he aike etaùken Ala oba hìpìrìk welagarek mene agosa aike soge mene werek halok, Ala againapùrì obogat inoba seget asi nogo ìlùk, at enat lebethìkì logousak o. Atì'nogo lebethiko kolek, it Ala againapùrì obogat en he, hìmì soge mene aike apùnì it mene nen leberisasak lek mene halok, leberisìkì logousak o.

Yì mene tì mene hesik asuk wasike wene

^17-18 Ala nen mel isikomo helal waganogo hìkì logolìk he: “Apùnì nen sapi wam esok en gandum ogat lìlìbùkk warogo eken ìbìluagalùk hilik he, eken aike nanogo ìlùk ape hele homasusak lek o. Aike noagalùk herakhìkì logoino,” ìlùk isikomo, helal waganogo hesukwa atì. Nen, aike re: “Apùnì yabu yì hesik tì hesik hagatenem, ineki oko wogisìkì logousak o,” ìlùk isikomo helal waganogo hesukwaat. Ati nen he, ap Ala againapùrì hanorogo serisek welagaikarek mene atì, it Ala againapùrì obogat en, “Eki oko arat lebethogo,” ìlùk akìgì'lek, aike inomat oba louk hogo lebethìkì logousak o. Atì'nogo hagatì logolìk, esin hake re, it aike Ala ane inomamerogo yogoisìgìk, yakùlisìgìk, hagarì'lùgì mene atì, agauk hogo leberisìkì logousak o.

¹⁹ Apùnì aike nen he: “At Ala againapùrì serisek werek mene a'nogo weak hagatomo,” ìlùk ùkùm oba houogolùk ikenem, inebe pìre a, hìnagan a, ineileken tùkùm hogo haga mene nen, “Eberogoat,” ìlùk ega halogat, ùkùm oba housak. Nen, atì'nogo ìgì'lek halok, ùkùm oba housak lek o.

²⁰ It aike inayùk asuagalùk, it eberogoat weak hagata mene hùgì, apùnì ineilhanemat inekalì warogo inasuk hanorogo watì logoino.

²¹ Wene yogohetì mene atì, hat en he, apùnì aike helokoma hisìgìk, aike hapotma hisìgìk, ìgì'lek higit hogo yogoisìkì logoino, ìlùk Ala mel, Karìsùt Yesùt mel, ineilhanemat, malaikat Ala nen wenaginapikesik yoko pelaksa wagarek mene mel, ineilhanemat yogohetì atì.

²² Apùnì aike Ala hesik hagatì logouagalùk, inùkùloak hepok-hepok sebelinapì logogùn o. Nen, it aike weak hagatenem hinom hagatì'lek heil lopok hogo logoino.

²³ Ou en ninhùp-nanhùbat homame lek agarek a'nogo nen halabut hesik i nek nìkì logogùn. We, anggur eken amusu aike hamùlùgat inom nìkì logoino.

²⁴ It aike weak hagatarek mene atì ùkùm inoba hìgìk, kotìk, egare'ma oan lagì'le'ma, weinam agarek atì. Nen, it aike weak hagatarek mene sebelek logopik en hobuk weinam asigin mene werek o.

²⁵ Atì hagat, it aike hano hagatarek mene hepogat weinam agarek atì. It aike atì'nogo hano hagatenem hinago motok logogin lek. We, weinam asiginat o.