1 TIMOTÌÙT 4 - Ala Ane Wene Ket Mene Warogo Wo'ninapike Wene

“Apùnì aike nen wene kolo wene inapeliagat hina'la kagali wesugun a'naga,” ìlùk yogosike wene

¹ Ala Areagùn nen wene pak hogoat yogonisìkì logolìk he, “O wùrep oba, apùnì aike Ala ane eberogoat ìlùk akìlì'lùgì mene nen, wene atì, Ninabìt, ìlùk heraksalùk he, Ibilit agoromì nongorinaparek mene inawe a'ma kìlìk, wene it en yakùlisagarek wene atì hakhìlìk hagatì logogun.

² Hagatì logolìk he, apùnì ineki aum arì'mo, kì mene hakogo heat ìlùk egarek atì hak, it atì ina'la min arìk he, Yì weak hagatoma hìgì. Yì hano hagatoma hìgì, ìlùk akìgì'lek yùgùnat hagatì logogun. Atì'nogo hagatì logolìk, inapeliak lal-pal hogo hagarinapì logogun atì.

³ It en wene ìkì logolìk he, Hìmì woginabusak motok lek, ìgìk, Yì mene tì mene nekarek mene atì, aike yì mene wasa. Nìkì logousak lek, ìgìk, ìkì logogun,” ìlùk, Ala Areagùn nen yogonisasike higit hogo ìlì'lùgì atì. Meneat he, nekarek mene atì, Ala nen nit ninetaùken at oba hìpìrìk logolìk, ebe wene atì hùthogo halok he, hai warogo nìkì logouagalùk elalhike mene hesik ìlì'lùgì atì.

^4-5 Yì mene tì mene Ala nen elalhike mene atì hano nek o. Sapan ikenem Ala ane atì ba hanothikerek ìlùk, “Yì weak mene,” ìlùk heraksìgì'legat, Ala hai warogo nìkì logousak enek.

“Hat Karìsùt Yesùt atitigeke logolìk higit hogo hagatì logoino,” ìlùk yogoisike wene

⁶ Wene hano wene ninetaùken Ala oba hìpìrethogorek mene a'nogo yakùlhetì lagagumo, hat en wanhìgitik higit hogo hagatì lagenl atì ba hebe kùlaga logolìk he, wene Yogotak yogohetì atì ninerùgì ninagaiya'lak Ala againapùrì mene aike yakùlisìkì logoino. Atì'nogo yakùlisìkì logogin halok he, hat Karìsùt Yesùt atitigeke logolìk, at hesik hanorogo hagatì logogin atì.

⁷ Apùnì nen wenesuayo ebe wene lek meneat he, tùlemat inapeliak pìlìngìtarek mene atì heraksìkì logoino. Heraksìlìk, Ala awe a'ma logolìk hagatarek mene atìat homamerogo yakùlìkì logoino.

⁸ Apùnì inebe hesik mop eluk hogo ineki aike wanharek atì, yogotak ya elama hesik hamùlùgat hano negen hagatarek. Meneat he, ninetaùken hesik Ala awe a'ma logolìk, at eyabu wanhì logoumo, at Ala nen he, “Yogotak hineluk welagep mene hesik mel, hobuk hineluk motok logogun mene hesik mel, hano motok asìgìn o,” ìlùk, abok yogonisasike atì eberogoat.

⁹ Halok, wene atì ninetaùkenma tùkùm hogo wanusak o.

¹⁰ Ala ebe re, yì apùnì tì apùnì obogat telinapùkwe welagarek meneat he, esin hake re, nit ninetaùken at oba hìpìrethìkì lago mene hùgì telninaperek atì nen, ninetaùken at eluk motok welagarek mene oba hìpìrethìlìk, at hesik ninaberalì lek hogoat, ninomamerogo hagatì lago.

¹¹ Wene atì obogat apùnì aike nen higit hogo hagatì logouagalùk yogoisìgìk, inasuk watìk, ìkì logoino.

¹² Hat hebe elege oan welagen atì nen, it apùnì aike nen ina'la meathagousak lek o. Hebe elegeat logolìk, apùnì aike inetaùken Ala oba hìpìrìk werek mene hùgì nen hat hoabùt wanuagalùk, hane higit hogo yogoisìgìk, hoabùt higit hogo hagatìk, apùnì hetawìrinapìk, hetaùken Karìsùt oba hìpìrìk welagìk, weak hagatì'lek heil lopok hogo welagìk, ìkì logoino.

¹³ An nebe oan wagì'lek werek kolek he, Ala ane helal palek atìat it aike inasuk holuak en, etage salhìlìk, inasuk watìk, yakùlisìgìk, ìkì logoino.

¹⁴ Hat hesik hageat it ap Ala againapùrì serisek welagaikarek mene nen ineki hùkùloak sebelho kolek, it ap Ala ane yogoisagarek mene nen mel isukwa atì: “Hat hobuk tì'nogo hagatì logoino,” ìlùk, yogohesukwa higit hogo, Ala oabùt hano nen ninoabùt lopok wo'nisikerek a'nogo hat wokhesike mene atì ba hagatì'lek hobaken nen hìgìk heraksagun o.

¹⁵ It apùnì obogat en hat hoabùt palhì logolìk he, “At Timotìùt alep hano hagatì lagasik yogotak hano motogat hagarì'logo,” ìlùk enagat hùthagauagalùk, wene yogohetì mene atì obogat hetaùkenma hìlìk hagato motok gogoino.

¹⁶ Atì'nogo hagatì logolìk, hokawerek hesik inom, it apùnì aike yakùlisìkì lagen mene hesik inom, hoabùt hebelogo logoino. Hebelogo logolìk, ha'la pùk agì'lek, atì meneat hagato motok logoino. Atì'nogo hagatì logogin halok he, hokawerek en hebe telìgìk, apùnì aike hane holì'lùgì mene inebe telinapìk, igin o.