Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 TIMOTÌÙT 3 - Ala Ane Wene Ket Mene Warogo Wo'ninapike Wene


“Ala againapùrì serisek logouagalùk, ap aike inoabùt palogo nen menhisasak,” ìlùk yogosike wene

1 Wene yì, eberogoat mene igin o. It aike ina'la nen akìkì logolìk he, “An Ala againapùrì serisek logoile,” ìlùk, ina'la akaga halok he, atì hano motok meneat walok en akaga atì.

2 Ati nen, ap Ala againapùrì serisek logouagalùk, inoabùt he, yì hake mene menhisasak. Apùnì aike nen, “At weak,” ìlùk ùkùm oba hìgì'lek mene halok, agwe omakeat mene halok, weak hagasuagalùk a'la kagalhenem tok wokhagarek hak wokhikerek mene halok, etaùken uan mene halok, hagasusak mene higit hogo hagaterek mene halok, ap pok inokot mene waganem woginaperek mene halok, wene sekek hogo yakùlisikerek mene halok,

3 i anggur amusu oba lagolek nikerek lek mene halok, oabùt asialok hogo hagatì'lek, enago, lìok hogo welagarek mene halok, a'la nen uang walok apik akikerek lek mene halok,

4 okawerek en againapùrì mene hano tegelogo hagisek were'ma re, at againapùrì nen inopase awe a'ma logolìk agauk hogo yogotìk, ane ikenem hologo hagatìk, egarek mene halok, inoabùt atìgìnìk mene halok Ala againapùrì serisek logousak o.

5 At ap aike nen okawerek againapùrì hanorogo tegelogo hagisek logou okot halok he, Ala againapùrì nìkì'nogo serisek logousak akegep. Mea o.

6 Ap aike Ala ane oan kerat wanhe mene menhikenem, Ala againapùrì serisek logolìk, okawerek en hogorakamo re, Ala nen Ibilit ùkùm wogosike hak, atì'nogoat ùkùm oba housak atì nen, Ala againapùrì serisek logouagalùk menhousak lek o.

7 Nen, ap Ala againapùrì serisek logousak mene atì, it apùnì etakwe mene nen abok weak palì'lùgì mene menhogoin halok, at ebe ina'la meathìlìk inabìreileken kelakhìgìk, paik hele hìlì'mo kerelagarek hak, Ibilit en a'la kagalìk ebe hakhìgìk inogo ìlùk, abok hano ìlì'lùgì mene halok menhousak o.


“Ala againapùrì leberisìkì logouagalùk, apùnì aike inoabùt palogo nen menhisasak,” ìlùk yogosiko wene

8 Atì hagat he, Ala againapùrì mene leberisìkì logouagalùk, inoabùt yì hake mene menhisasak. Inoba haro mene halok, inameli pìre agorogo egarek lek mene halok, anggur eken amusu inoba lagolek nekarek lek mene halok, uang, yì mene tì mene, hano mene, “An enek noba logoilep,” akagarek lek mene halok, menhisasak o.

9 Aike re, wene, Ala a'la hinagoat welagaikesik en weinamethesike wene a'nogo, inetaùkenma hìlìk, “An wene noba lek na'la selek welagì,” ìlùk wene atì ning hogo hesogo welagaikarek mene halok menhisasak o.

10 It ap atì oan menhisìgì'lek logolìk inoabùt tak palhì logoumo re, apùnì aike nen he, “At weak,” ìlùk, ùkùm inoba hìgì'le'ma tegelek welagaikarek mene halok, enagat hùrisìlìk he, Ala againapùrì mene aike leberisìkì logouagalùk, menhisìkì logousak o.

11 Atì hagat he, it atì inagagwì inoba haro logolìk inahùsipi weak ìlìk negarek lek mene halok, weak hagasuagalùk ina'la kagalhenem tok wokhagarek hak wokhagarek mene halok, inoabùt lenurek mene halok, inoabùt atì hake halok, inagonì leberisùgùkwe mene logouagalùk menhisasak o.

12 It ap Ala againapùrì aike leberisùgùkwe logousak atì re, inagagwi omakeat waganek logolìk, inagainapùrì mel, inagoromì mel, hanorogo tegelogo hagisek welagaikarek mene halok menhisasak o.

13 It en Ala againapùrì aike hanorogo leberisikenem he, Ala againapùrì nen inabok hano ìkì logolìk inane agauk hogo yogoisìkì logogun. Atì'nogo ikonem, it en he, wene ninetaùken Karìsùt Yesùt oba hìpìrethogorek wene atì hesik, inayù'lek pak hogoat yogoisìkì logogun o.


Ebe wene Ala a'la hinago mene hukalogo sele'mathesike wene

14-15 An hepok hea wesigìlùk na'la akìkì logolìgat he, oan wagì'lek logogin halok, nit Ala againapùrì ninom logolìk ninoabùt hagatì logousak mene helu asuagalùk wene yì obogat helal palogo hoba lakhei wagì atì. O re, tik Oba nen wùroak oba ning hogo welagarek atì hak, nit Ala eluk motok welagarek mene againapùrì atogotorek atì ba nen, Ala ane ebe wene ning hogo hesogo welagorek atì.

16 Wene atì, nit Ala awe a'ma logolìk eberogoat ìlùk akogorek wene hinago welagaike mene Ala nenat hukalogo weinamethesikomo, “Wene atì esin,” ìlùk pak hogo ìkì lago. Ati re: At Karìsùt ebe apùnìat weinam agaike o. At Ala Areagùn nen, “At Karìsùt atì eberogoat,” ìlùk sele'mathesike o. It malaikat Ala nen yoko pelaksa wagarek mene ineileken hasukwa o. Agoromì nen at hagatì lagaike wene a'nogo yì apùnì tì apùnì etakwe mene yogoisìlìk lagaukwa o. Apùnì o yì awì tì awì mene aike apigat en, “At ebe eberogoat,” ìlùk, inetaùken at oba hìpìrethesukwa o. Ala nen pogot oba hogorato motok welagaikare'ma lìakhesikomo welagarek o. Wene atì re, at Ala nenat weinamethesikomo pak hogo ìkì lago o.

ကြှနျုပျတို့နောကျလိုကျပါ:



ကြော်ငြာတွေ