1 TIMOTÌÙT 2 - Ala Ane Wene Ket Mene Warogo Wo'ninapike Wene

“Sapan yì'nogo ìkì logousak,” ìlùk yogosike wene

^1-2 An nen wene aike esin mene yì Ala againapùrì inasuk wa'nogolùk yogohesik. Nit apùnì ninom hano lìok hogo logolìk he, Ala hogoratì logolìk, apùnì hesik higit hogo hagatì logousak mene hagatì logouok en he, apùnì obogat hesik mel, kaintek inetage pogot hesik mel, it aike inetagewerek logolìk ha'nisek welagaikarek mene atì, inebe obogat hesik mel, sapan ìkì logolìk he, Ala ayoko hìgìk, kìno yogotìk, hai watìk, ìkì logouagalùk inasuk watì logoino o.

^3-4 At Ala telninapùkwe a'nogo a'la akìkì logolìk he, “Yì apùnì tì apùnì obogat telinapìk, ebe wene tùkùm hogo inelu asuagalùk yakùlisìgìk, usak mene,” ìlùk a'la walok akikerek atì nen he, hit atì'nogo ìkì logogun halok he, hano.

⁵ Ala ebe omakeat o. Nen, Ala ninom nit apùnì ninom hùlisanem logolìk lapulninabì'logo mene ap ebe Yesùt Karìsùt atì omakeat o.

⁶ At Karìsùt apùnì obogat weak hagatorek atì ba hele warogo ha'nisek were'ma hele hikalogo telninabigìlùk okawerek eram en, “Nebe noasuak” ìlùk wagaike atì ba, Ala a'la nen he: “Apùnì obogat telinabuaak,” ìlùk akikerek mene atì, enagat asusak higit hogoat enagat agaike atì.

⁷ Atì'nogo akikerek atì nen, at en he, “Hat en ebe wene atì apùnì etakwe mene nen eberogoat ìlùk ina'la akìlìk wanuagalùk, yakùlisìlìk nìkì logoino,” ìlùk, an nayoko hìlìk lakhani wagaikomo, yogoisìlìk nìgìrek atì. Atì'nogo ìgì atì eberogoat ìgì. Napeliak ìgì lek o.

Sapan ìkì logolìk, “Ap en tì'nogo hagatìk, hìmì nen tì'nogo hagatìk, uagalùk inasuk wa'no,” ìlùk yogosike wene

⁸ Nen, o yì awi tì awi sapan ìkì logolìk, it ap en he, ineki nen aike weak hagatì'lek, ina'mage lagagì'lek, wene serep agì'lek, tegelek logolìk, sapan ìkì logouagalùk, yakùlisasak ìlùk na'la walok akìgìrik en yogohetì atì.

⁹ Ati hak, it hìmì re, inesi lalhìk, melei ìtarek hak emas mene ìtìk, eilepanì ìtarek hak mutiara mene ìtìk, su oko hùko mene labetìk, usak motok lek. We, ineil lopok hogo logolìk, inalìlìke siok hogo wanusak meneat wanhì logouagalùk yakùlisanogolùk yogohetì atì.

¹⁰ Inalìlìke wanu hak he, inoabùt Ala a'logomì logolìk hagasu hagat, it aike hanorogo leberisìkì logouak.

¹¹ It inane lek hogoat logolìk, wene yakùlisikenem, inasuk hologoat logouak.

¹² It hìmì nen he, ap inawe a'ma negen hisìlìk, “Yì'nogo hagasin, tì'nogo hagasin,” ìlùk, yogoisìgìk, wene yakùlisìgìk, ìkì logoinogo ìlùk an nen wene palhìrek atì. It he, we, inane legat logousak.

¹³ Ala nen he, Aram tak elalhikesik en, hobuk he Hawa elalhike atì nen, inane legat logousak ìgì atì.

¹⁴ Ati hagat, Ibilit en he, Aram tak lalhike hùk. We, he atì tak lalhikomo re, Ala ane sagalogo weak hagasike atì.

¹⁵ Atì'nogo meneat he, it hìmì inetaùken Ala oba hìpìrethìlìk he, inebe Ala hesik hisìlìk tegelek logolìk, apùnì aike inetawìrinapìk, ineil lopok hogo hagatìk, ìkì logogun halok he, omalik taginapenem, Ala nen telinabiginat o.