1 TIMOTÌÙT 1 - Ala Ane Wene Ket Mene Warogo Wo'ninapike Wene

Hai wasike wene

^1-2 Timotìùt naput e. Hetaùken Karìsùt oba hìpìrethesigin atì nen, an naput eberogoat agaginmo re, wene yì an Paùlùt en helal palogo hoba lakhei wagì atì. At Ala telninapùkwe ho, Karìsùt Yesùt en hano'ninabigin ìlùk nina'la akìkì lago mene a'nogo ho, eperak enat nayoko hìlìk, at Karìsùt Yesùt hesik hagatì logouagalùk lakhani wagaukwama wagagi atì. Ninopase Ala ho, ninoe Etagepogot Karìsùt Yesùt ho, eperak inoabùt hano a'nogo nen, hano mene wokhetik, inetawìthapìk, hetaùken hapuguthapìk, ìkì logouak o.

Timotìùt en it apùnì aike inasuk higit hogo watì logouagalùk yogosike wene

³ An o Epesùt en o Maketonia yoma wesigìlùk he, hat ha'la kagalogo wene mel ìlùk yogohesigi akìgì: “Hat hebe o yoma logoino. Logolìk he, it aike nen wene ebe mene lek. We, hùnogo mene yakùlisìlì'lùgì mene atì ìgì'lek kamo uagalùk inasuk watì logoino.

⁴ It atì nen he, wenesuayo inera nen lìbìlogo pìlìngìtìk, Ninebe atì'nogo ta'larik wagagu, ìlùk wenekomane ero ba nen palhìgì'legat pìlìngìrìk motok lagìk, ìlì'lùgì atì mene ba inetaùken eberek motok logoinogo nen, ìgì'lek heraksoagalùk inasuk wa'noat,” ìlùk yogohesigi akìgì. Wane atì mene ikenem, ebe wene ninetaùken Ala oba hìpìrethìlìk were'ma, at en hano'ninabigin atì mene hùko agarek lek o. We, elùgùn oba inane hùkoat sagalharek atì.

⁵ Inetaùken Ala nen horinapenem he, inokawerek ina'la nen he, “An wene noba lek, na'la selek welagì,” ìlùk akìkì logolìk, inetaùken eberogoat Ala oba hìpìrethìlìk welagaikarek atì nen, apùnì inetawìrogo welagaikarek o. Halok he, it atì'nogoat logouagalùk inasuk watì logoino, ìlùk yogohesigi atì.

⁶ Mene re, it aike nen inoabùt hano hagatarek atì mene hagatì lagaikaresik en heraksalùk kwanìrogo tùlemat lek asigin mene atìat ìkì logolìk, inokawerek enat nong akìlì'lùgì atì.

⁷ It atì nen he, “Wene Ala nen ninasuk wasike wene a'nogo, nit en yakùlisìkì logogun,” ìlùk walok en yakùlisìkì logolìgat he, wene ebe hùthìgì'lek inokot logolìgat he, “Wene ebe yì'nogo o. Eberogoat tùkùm hogo yakùlisogo,” ìlùk ìlì'lùgì meneat he, hùthìgì'legat ìlì'lùgì atì.

⁸ Wene Ala nen ninasuk wasike wene atì, nit en hùthìlìk, hagasusak higit hogo hagatì logogun halok, hano o, ìlùk, ninelu.

⁹ Eberogoat he, wene Ala nen ninasuk wasike wene atì, apùnì higit hogo hagatarek mene hesik isike hùk. We, apùnì inasuk ware'lek holùhùk hagatarek mene mel, Ala inabìt logolìk weak hagatarek mene mel, inebe Ala hesik hisìgì'lek Ala ane sagalogo hagatarek mene mel, inopase inagosalak inebe motok inoatarek mene mel, apùnì aike yùgùnat inebe motok inoatarek mene mel,

¹⁰ ap en hìmì pailak haksìgìk, ap-ap haksìgìk, egarek mene mel, apùnì aike inagainapùrì mene ineki abusak hinaginaparek mene mel, inapeliak egarek mene mel, “Wene eberogoat igin,” ìlùk Ala etage hopuk paligat he, lalinaparek mene mel, it obogat atì'nogo hagatarek mene hesik isike. Nen, it aike inoabùt ebe wene hano'ninaperek wene atì sagalogo heraksìlìk kolo hagatarek mene an ìgì'lek mene obogat aike hesik inomat isike.

¹¹ Nen, wene atì higit hogo, hano wene a'nogo an nen yogoisìlìk nìkì logouagalùk noba hesike. Hano wene atì re, Ala hogoratìk, hai watìk, ogorek mene a'nogo aneat o.

Ala hai wasike wene

^12-13 An alep he, Yesùt abok weak palhìk, ebe na'la meathìlìk Ala againapùrì mene yì aik tì aik hagarinapìk, ìkì lagagi meneat he, ninoe Etagepogot Karìsùt Yesùt etawì'napikesik, “Hat en hobuk an hesik hetaùken lenurogo hagatì logogin,” ìlùk, wene yì an noba hìlìk nayoko hìgìk, omame wo'netìk, isike atì. Atì'nogo weak hagatì lagagi atem sat he, an netaùken ninoe Etagepogot Karìsùt Yesùt oba hìpìrethìgì'lek logolìk, atì'nogo hagasusak lek meneat he, nokot en hagatì lagagi atì nen, at en nebe etawi'napike atì nen, hai watì lagi o.

¹⁴ Ati re, at ninoe Etagepogot Karìsùt Yesùt oabùt hano nen hùkorogo etawì'napike atì, noabùt he, at inom hutik logolìk hagatarek hagat, netaùken at oba hìpìrethìgìk, apùnì aike netawìrinapìk, hùkorogoat ìkì logouagalùk, nebe wo'napike atì.

¹⁵ Apùnì weak hagato were'ma Karìsùt Yesùt en ninebe telninabigìlùk kweangma yoma pi wagaike ìlùk ìgì atì, apùnì nen he, “Wene atì eberogoat,” ìlùk tùkùm hogo wanusak mene. Apùnì aike weak hamùlùgat negen hagatarek meneat he, an enek he, weak hùko motok hagatì lagagi atì.

¹⁶ Mene re, it apùnì aike hobuk inetaùken Yesùt oba hìpìrethikenem ineluk motok logouagalùk, hagarinabigin mene ina'la nen akìkì logolìk he, “Paùlùt weak hagato kolegat he, Karìsùt Yesùt a'la pùk agì'lek epe morogo motok welagaikesik en, etawìrarìk ebe wanhìke atì re, at en apùnì weak hagatarek mene atì'nogo woginapere'ma hìgì,” ìlùk, Ala oabùt enagat hùthoagalùk, an tak atì'nogo wo'napike atì.

¹⁷ Ninopase kain Etagepogot Ala atì aligat o. At ebe nineileken hogorek lek. Walhobak esok motok welagarek mene atìat o, ìlùk, hogoratìk, hai watìk, iko motok logouok o, ìlùk, “Amin,” ìgì atì.

¹⁸ Timotìùt naput e. An wene yì hasuk warogo yogohesik. It aike nen wene alebat hat hokawerek hesik ìkì logolìk he, “At tì'nogo hagatì logogin,” ìlùk, isukwa hak, hano wene yì hesik, weim inomamerogo yaparek hak, homamerogo yogoisìkì logoino o.

¹⁹ It aike nen, “Wene atì eberogoat,” ìlùk wanharesik, ina'la selek logousak meneat he, hobuk weak hagarì'lùgì atì nen, so ima wula'lak hogo pikerek hak, heia paga atì. Hat atì hake hagatì'lek, ha'la nen, “An weak aike hagatì'lek, na'la selek welagì,” ìlùk hetaùken Ala oba hìpìrethìlìk homamerogo hagatì logoino,

²⁰ It weak atì'nogo hagatarek atì, inebe aike re, Himeneùt Aleksatat eperak en Ala abok weak palhì lagaikama, hobuk inoabùt hebelarìk weak hagatì'lek kamo uagalùk inebe Ibilit wogotima werek atì.