1 TESALONIKA 5 - Ala Ane Wene Ket Mene Warogo Wo'ninapike Wene

“Ninoe Etagepogot waganem elokoma tegelogo hìlìk logousak,” ìlùk yogoisasike wene

^1-2 Nerùgì nagaiya'lak. Apùnì aike yogot wanuogolùk hùako wonogat were'ma wagaikarek hak, ninoe Etagepogot wesigin atì like atì'nogoat were'ma wesigin ìlùk, hit sekek hogo hineluat welagep atì. Halok, an nen, “Ti sat haga'lasigin, tì like haga'lasigin,” ìlùk, helal waganogo hinoba lakhei wesusak lek o.

³ Apùnì nen he, “Nit hano lìoksek welago,” ìlùk, iko kolegat, hìmì ineagwì ina'ma mene wonogat were'ma inebe taginabuogolùk higitmo inapot heinet weak watarek hak, atì'nogoat it wonogat were'ma weagarinapenem hese wùlùbusak legat asigin o.

⁴ Mene re, nerùgì nagaiya'lak. Hit o mùmmo logoilepma re, apùnì wonogat were'ma yogot wanuogolùk waganem ina'maken lagarek hak, atì like hit wonogat were'ma hina'maken lelep atì. Mene re, hit o mùmmo welagep lek atì nen, hina'maken lasak lek.

⁵ Apùnì o likene lìa ba welagaikarek hak, hit obogat lìa atì esewerek meneat welagep o. Nit he, o hùako mùmmo welagaikarek hak, atì mene esewerek welago hùk. Lek o.

⁶ Halok he, it aike nogo negen ìlì'lùgì atì, nit atì'nogo ìkì logousak mea o. We, ninoabùt hebelogo logolìk, ninetaùken wekelogoat logouok o.

⁷ Apùnì nogo egarek atì re, hùakoat nogo egarek o. Nen, anggur eken amusu nìlìk lùgùlùgì hake palharek atì, hùakoat nìlìk palharek o.

⁸ Mene re, nit lìa ba welagorek mene yì, ninoabùt hebelogo logolìk he, apùnì aike nen inoasinogo ìlùk sìng inoake ba itarek hak, ninetaùken Ala oba hìpìrìk logolìk, apùnì inebe ninetawìrogo welagorek atì meneat ìkìgik, inùkùloa'ma inoasinogo ìlùk inùkùlasu haro mene salharek hak, Ala nen telogo hano'ninabigin ìlùk, nina'la hano welago atì meneat salhìgìk, ìkì logouok o.

⁹ Ala a'mage nit ninoba hìlìk weaga'ninabigìlùk wena'ninapike lek. We, ninoe Etagepogot Yesùt Karìsùt en telogo hano'ninabuagalùk wena'ninapike o.

¹⁰ At Yesùt ebe nit hesik ninom nineluk motok logouogolùk wa'lagaikesik he, hobuk wesigin atì, ninebe wa'larì'mo wesìgìn he a? Nineluk were'ma wesigin he a. Hano nek. At ebe wìrìk, ninom nineluk motok logogun atì.

¹¹ Ati nen, hit yogotak ya hagatì lagep hagat, hit-hit hinasuk wat-wat ìgìk, hinetaùken ago wat-wat ìgìk, ìkì logoino o.

Wene elùgùn warogo, inasuk watìk, hai warinapìk, isike wene

¹² Nerùgì nagaiya'lak. Hinogogì hakhisek werek atì, ninoe Etagepogot en menhisasikomo logolìk, hit hesik inomamerogo hagatìk, hinasuk watìk, ìlì'lùgì atì nen he, irat inawe a'ma logolìk, hinane agauk hogo yogoisìkì logoino o.

¹³ It atì'nogo hagatarek atì nen, hina'la nen he, “Irat ninogogì inetagewerek logouak o,” ìlùk akìkì logolìk, inebe hinetawìrogo logoino. Atì'nogo logolìk he, hit-hit hinoabùt lìok hogo hagatì logoino.

¹⁴ Nerùgì nagaiya'lak. Hit en he, it aike yabu wanùhùk inaberalì weak mene atì inasuk watìk, inayùk hoporek mene atì ina'la kagalhìk, inomame lek mene atì leberisìgìk, ìkì logolìk he, apùnì obogat hesik hinetaùken uan hogo hagatì logoino.

¹⁵ Apùnì nen hit aike weagathinapenem en, oko-oko weagarinapì'lek logolìk, hit-hit hesik mel, apùnì obogat hesik mel, inoabùt hanorogo hagatarek atì meneat esinethìkì logoino.

¹⁶ Hina'la hai hakiko motok logoino.

¹⁷ Sapan hutik motok iko logoino.

¹⁸ Ala a'la nen he, “Hit Karìsùt Yesùt hinom hutik logolìk, yì mene tì mene obogat hesik an hai wa'napi logousak o,” ìlùk akikerek atì nen he, atì'nogoat hagatì logoino.

¹⁹ Ala Areagùn ane sebelogo hìgìk,

²⁰ Ala ane at Areagùn nen ina'la kagalogo yogoisikerek mene atì, hina'la meathìgìk, ìkì logogùp o.

²¹ Yì mene tì mene wanuogolùk, “Yì hano, yì weak,” ìlùk hina'la nen walhìlìk, hano mene halogat, hineki ning hogo hesogo logolìk,

²² weak mene yì weak tì weak halok, obogat hagatì'lek logoino.

²³ Atì'nogo were'ma, at Ala ninetaùken hapuguthiaikerek mene a'nogo nen, hinebe abireke okawerek hesik hakìlìk logouak o. Were'ma, ninoe Etagepogot ebe waganem, hinetaùken mel, hinebe mel, hinoabùt mel, ùkùm hinoba housak motok lek tegelek were'ma wesuak en, at enat hakhisek logouak o.

²⁴ At ninopase Etagepogot Ala ninayoko hesike mene a'nogo nen, “Tì'nogo hagathinabigin,” ìlùk abok yogonisikerek higit hogo hagaterek a'nogo nen hakhisek logopik, eberogoat hagathinabiginat o.

²⁵ Nerùgì nagaiya'lak. Nit hesik sapan ìkì logoino o.

²⁶ Hit en he, “Paùlùt lak en hai atì'nogo wathinapa o,” ìlùk, Ala againapùrì logolìk inoabùt hagatarek hagat, hinerùgì hinagaiya'lak Ala againapùrì mene aike obogat hai lorogo warinabìk lano o.

²⁷ Wene helal waganogo lakhei wago mene atì, hinerùgì hinagaiya'lak Ala againapùrì mene aike obogat ineilhanem etage saluageip ìlùk ninoe Etagepogot etage hopuk palogo yogohisìgì atì.

²⁸ Ninoe Etagepogot Yesùt Karìsùt oabùt hano a'nogo nen hanorogo hakhisek logouak o.