1 TESALONIKA 4 - Ala Ane Wene Ket Mene Warogo Wo'ninapike Wene

Ala a'la hanorogo hagatì logousak wene

^1-2 Nerùgì nagaiya'lak. Wene elùgùn oba aike yì yogohisak. Nit ninoe Etagepogot Yesùt en, “Hinoabùt Ala a'la hanorogo, yì'nogo hagatì logoino, tì'nogo hagatì logoino,” ìlùk, isikomo yakùlhisa wagagu a'nogo hinelu. Atì'nogo yakùlhisasugumo, hit en atì'nogo hagatì lagep meneat he, hobuk aike inom hogo hùkorogo hagatì logouageip ìlùk, ninoe Etagepogot Yesùt ninom hutik logolìk hinasuk warogo yogohisìgì atì.

³ Ala a'la nen he, mel akikerek atì: “Hit hinebe an hesik hanìlìk tegelek motok logolìk, pailak haksagarek atì mene haksìgì'lek motogat logoino.

⁴ Atì'nogo logolìk, hinagagwì hinagonì lopok woginabìk he, hinom hano logolìk, hinebe an hesik hanìlìk tegelek logolìk, hinoabùt higit hogo hagatarek mene hagatì logoino.

⁵ It apùnì etakwe mene, an nebe inokot logolìk inoba aiyage lagaikenem yùgùnat haksìlì'lùgì atìtì'nogo hagatì logousak lek.

⁶ Ati mene hesik higit hogo hagatì logolìk he, hinerùgì hinagaiya'lak ineil salogo inagagwì inagonì mene pailak haksasak lek o,” ìlùk, Ala a'la nen atì'nogo akìlìk yogonisikerek atì. Atì'nogo ikerek atì nen, alebat nit en ìkì logolìk he: “It apùnì pailak atì'nogo haksagarek mene hùgì, ninoe Etagepogot en ùkùm inoba hegein werek o,” ìlùk, hinasuk ning hogo warogo yogohisasugu atì.

⁷ Ala nen, nit weak hagatì logouagalùk ninayoko hesike lek o. We, ninebe at okawerek hesik hisìlìk, tegelek logolìk, higit hogo hagatì logouagalùk ninayoko hesike atì.

⁸ Wene atì hit aike nen heraksìkì lagep halok he, nit apùnì ninane mene heraksìkì lagep hùk. Lek o. We, Ala nen Areagùn hit wokhisikerek mene a'nogo ane meneat heraksìkì lagep o.

⁹ Nen, hit-hit hinerùgì hinagaiya'lak hinom hinetawìrogo logouageip ìlùk, Ala nen elogat yakùlhisìlì'logo atì nen he, hobuk an nen nìkì'nogo halok, “Hit hinerùgì hinagaiya'lak hinom hinetawìrogo hagatì logoino,” ìlùk, helal waganogo hinoba lakhei wesusak. Legat o.

¹⁰ Hit hinerùgì hinagaiya'lak o Maketonia tokwe mene obogat atì'nogo hinetawìrinapì lagep meneat he, nerùgì nagaiya'lak e. Hobuk hùkorogoat hinetawìrinapì logouageip ìlùk, hinasuk warogo yogohisìgì atì.

¹¹ Nit en alep yogohisasugu hagat, hinepe morogo logolìk hineki nen hinokawerek hinobaga mene lopok wanhì lagep mene atìat esinethìkì logoino.

¹² Atiat esinethìlìk he, it aike nen waganekkwe nìlìk negarek atì hak hagatì'lek logolìk, apùnì etakwe mene nen, “It hano,” ìlùk uagalùk ineilhanem hinoabùt higit hogo hagatì logoino.

Ninoe Etagepogot wesigin wene

¹³ Nerùgì nagaiya'lak. It apùnì aike nen, “Hano haga'lasigin,” ìlùk ina'la hùthìgì'lek logolìk he, apùnì wa'laganem ina'la weak arì'logo atì hak, hit atì'nogo hina'la weak aga logoinogo ìlùk, wene apùnì wa'larì'lùgì mene atì hesik hinokot logousak atì nabìt. Hinelu asuageip ìlùk tùkùm hogo yogohisak o.

¹⁴ At Yesùt ebe wa'lagaikesik en eluk agaike atì eberogoat ìlùk hùthìkì lago. Ati nen, apùnì at inom hutik logolìk wa'larì'lùgì mene hobuk Ala nen inelugurinabìk, Yesùt inom motok logouagalùk eberogoat woginabigin ìlùk hùthìkì logouogat o.

¹⁵ Wene ninoe Etagepogot en isike mene yì yogohisak. At ebe waganem, it wa'larì'lùgì mene herakhisalùk nit nineluk welago mene tak alebagìk oba lagagun lek o.

¹⁶ Ninoe Etagepogot pogot oba nen pi waganem he, it malaikat mene inoe kain mene ane hùkorogo ìgìk, Ala apìkon ane huthikenem ane pak ìgìk, ikenem, apùnì Karìsùt inom hutik logolìk wa'larì'lùgì mene tak inelugurinabigin.

¹⁷ Hobuk nit nineluk logogun mene ninomat ohena a'la hapok hogo wo'nisek lagalìk he, ninoe Etagepogot ninom tùlem po atoma apì arìk lagalìk he, at ninom motogat logogun o.

¹⁸ Ati nenat, wene atì ba hit-hit hina'la hanorogo, hinetaùken ago wat-wat ìkì logoino o.