1 TESALONIKA 3 - Ala Ane Wene Ket Mene Warogo Wo'ninapike Wene

¹ Nit hit hesigat ninetaùken sebelusak mea agama re, mel ogo. Nit o Atena yoma ninaligat logogun o.

^2-3 Werek kolek he, at ninagot Timotìùt, hano wene Karìsùt hagasike wene a'nogo ninomat, Ala hesik yogoisìlìk nìkì lago mene a'nogo, apùnì nen yì aik tì aik hagathinabì'lùgì atì nen, hit hinetaùken Karìsùt oba hìpìrethesigip mene abolok inogo ìlùk, hinetaùken ago wathinapìk, hinasuk watìk, ìkì logouagalùk hinoba lakhei wago atì o. Yì aik tì aik hagathinabì'lùgì atì, Ala nen wena'ninapì logolìgat, “Atì'nogo hagathinapì logogun,” ìlùk isike hagat haga'ninabì'lùgì atì, hineluat o.

⁴ Nit emakum hit ninom logolìk, “Hobuk yì aik tì aik haga'ninapì logogunat o,” ìlùk, yogohisasugu a'nogo higit hogo haga'ninabì'lùgì atì hinelu o.

⁵ Atì nenat, at Ibilit nina'la kagalherek mene a'nogo nen hina'la kagak wesumo, nit en hit hesik set kalogo hagatì logagu a'nogo tùlemat alema'lasusak atì nabìt e, ìlùk nalabut hìrogo logolìk, netaùken sebelusak mea agama re, “Inetaùken Karìsùt oba hìpìrìgat werek a? Lek a,” ìlùk at Timotìùt en hinoabùt palìk he, yogonesi wesuagalùk, hinoba lakhei wagì atì.

⁶ Nen, at Timotìùt hinoba lakhei wagìma wagasik a'naga, yogotak apotkwe ninoba wagasik he, hit hinetaùken Karìsùt oba hìpìrìk logolìk, apùnì aike hinetawìrogo hagatì lagep mene atì yogonisìgìk, nit en: “It ninom apì a'lo e,” ìlùk walok akìkì lago hak, hit en atì'nogoat ninoba eberek motok logolìk, “It inoabùt hano a'nogo ninom api a'lo e,” ìlùk, akìkì lagep mene atì, yogonisa wagama re, nina'la hai hakìkì lago.

⁷ Nerùgì nagaiya'lak. Nit yì aik tì aik wiik-weak hogo haga'ninapo kolegat he, hit hinetaùken Karìsùt oba hìpìrìgat welagep atì nen, hit hesik nina'la hano agama welago.

⁸ Atì'nogo logolìk, hit ninoe Etagepogot hinom hutik logolìk, ning hogo metek welagep atì nen, nit hogo yogotak ninetaùken yamuk ikomo welago.

⁹ Nit ninopase Ala eilhanemat logolìk, hit hesik hai hakiko motok welago atì hesik, Ala hai motok apik watì logolì'mo re, hobuk hai nìkì'nogo wasu heat haga'larì'logo.

¹⁰ Hit hinetaùken Karìsùt oba hìpìrethesigip meneat he, oan hake atì nen, nit ninebe hinoba wìrìk en hinetaùken hobuk ago wathika wesuogolùk, sapan hit hesik likene hùako iko motok welago.

¹¹ Nit hobuk hinoba wagùkwe re, ninopase Ala okawerek mel, ninoe Etagepogot Yesùt mel, eperak enat kwe higit hogo ya'nisoak.

¹² Nit en hit hinebe ninetawìrogo welago hak, hit en atì'nogoat hit-hit hinetawìrogo hagatìk, apùnì obogat hinetawìrinapìk, hùkorogoat hinetawìrinapì logouageip en, ninoe Etagepogot en hinoabùt inetawìrinaparek atì mene oba louk hogo aike inomat wokhisìkì logouak.

¹³ Atì'nogo hagathinapì logopik he, ninoe Etagepogot Yesùt okawerek agoromì inom at waganem he, hinebe ninopase Ala okawerek hesik hisìlìk, at eilhanem ùkùm hinoba lek hano tegelek were'ma hisa wesuak en, hinetaùken wurigethinapì logouak o.