1 TESALONIKA 2 - Ala Ane Wene Ket Mene Warogo Wo'ninapike Wene

Paùlùt en apùnì o Tesalonika mene inom logolìk hagatì lagaike mene hobuk ina'la eberogo yogoisasike wene

¹ Nerùgì nagaiya'lak. Hit hina'la nen he: “It Paùlùt lak ninoba wagaukwa atì re, we tùlemat wagì'lek,” ìlùk, hinokawerek hineluat o.

² Hit hinoba oan wagì'lek, o Pilipi atoma were'ma, apùnì atoma mene nen ina'la mea'nisìlìk yì aik tì aik haga'ninapì lagaukwa. Ati'nogo meneat he, ninopase Ala nen ane hano wane a'nogo ninayù'lek hogo yogohisa wesuagalùk haga'ninapikomo wagagusik yogohisiko were'ma apùnì apigat en, “Wene atì ninabìt,” ìlùk, iko kolegat, ninomamerogo yogohisìkì lagagu a'nogo, hineluat o.

³ Wene yogohisìkì logolìk hinasuk watì lagagu atì re, hit nong asuagalùk kolo wene yogohisìgìk, ninetaùken pìre logolìk yogohisìgìk, ninane lalogo yogohisìgìk, ìkì lagagu lek o.

⁴ At he, we, at Ala nenat ninoabùt palogo nen he: “Hano wene atì, hirat wolok nìkì logouageip,” ìlùk, ninayoko hesike higit hogo yogoisìkì logolìk, apùnì ina'la hanorogo yogoisogorek hùk. Lek o. We, Ala ninoabùt palì'logo mene a'nogo a'la hanorogo yogoisogorek o.

⁵ Nit he, nina'la nen, yì mene tì mene ninaligat ninoba logoilep, ìlùk akìkì logolìk, ninane ba nen agauk hogo yogoisìkì lago lek atì, hit hineluat o. Nen, Ala eluat, ma re, at enat, “Atì eberogoat,” ìlùk usak atì.

⁶ Hit en nit hogo'ninapìk, it aike nen hogo'ninapìk, apùnì mene nen atì'nogo hogo'ninabuagalùk ìkì lago lek o. We, at Karìsùt en ninayoko hìlìk lakhina wagaikomo wenewule logolìk ninane ning hogo yogohisasak higit welago.

⁷ Atì'nogo meneat he, inagosalak en ineagwì alelogo woginabìk hagisek welagaikarek hak, nit hit ninom logolìk alelogo hakhisek logolìk hagatì lagagu atì.

⁸ Nit en hit hinebe ninetawìrogo welago atì nen, Ala ane atì nek sùpùthisasugu hùk. Lek o. We, hinebe ninetawì motok en, nina'la hai hakìkì logolìk, ninebe inomat wokhisasugu atì.

⁹ Nerùgì nagaiya'lak. Nit Ala ane hano wene atì yogohisikenem, yì mene tì mene hesik, hit aike hinoba seget asinogo ìlùk, nit ninokawerek en likene hùako ninomamerogo hagatìk, mep lagai'-lagak hogo hagatìk, ìkì lagagu a'nogo, hineluat o.

¹⁰ Nit hit wene eberogoat ìlùk wanhìgip mene hùgì ninom logolìk he, apùnì nen, “It weak hagata,” ìlùk, ùkùm ninoba housak legat tegelek logolìk, higit hogo nek hagatì lagagu a'nogo, hit Ala hinomat hinelumo re, “Ati eberogoat,” ìlùk usak atì.

^11-12 Hit Ala awe a'ma kìlìk hogoratare'ma atoma kìlìk logouageip ìlùk hinayoko hesike mene a'nogo a'la walok akikerek mene higit hogoat hagatì logouageip en ìlùk he, nit en inopaselak en inagainapùrì inasuk watarek hak, hinebe lopok hinasuk watìk, hinetaùken sebelhik, hina'la kagalhìk, ìkì lagagu a'nogo, hit hineluat o.

¹³ Nit en wene Ala ane a'nogo yogohisasugumo, hit en he, “Wene atì apùnì inane mene lek o. We, Ala aneat o,” ìlùk wanhìgip atì re, eberogoat Ala aneat wanhìgip o. Ati nen nit kamo ìgì'lek Ala hai wato motok welago. At Ala nen hit hinetaùken Karìsùt oba hìpìrethesigip mene hùgì hina'la kagalho motok welagarek o.

¹⁴ Nerùgì nagaiya'lak. It Ala againapùrì aike Karìsùt Yesùt inom hutik logolìk, o Yurea atoma atogorì'lùgì mene, inokawerek inagaiya'lak Yahuri mene nenat yì aik tì aik hagarinapì lagaukwa hagat, hit hinagaiya'lak mene nenat yì aik tì aik hagathinabì'lùgì o.

¹⁵ It ap Yahuri mene nenat, it ap hageat Ala ane yogoisìkì lagaukwa mene inebe inoatìk, ninoe Etagepogot Yesùt ebe watìk, isukwa hagat, nit yì aik tì aik haga'ninabì'lùgì atì, Ala nen hano ìlùk akikerek lek. Apùnì inom weak enek hagatì logolìk,

¹⁶ Ala nen it apùnì eta'ma mene telinabuagalùk nit en hano wene yogoisìlìk laganem, apùnì inakwe palharek hak, it apùnì Yahuri mene nen he, “Wene hano wene atì yogoisasak lek,” ìlùk wene palì'lùgì atì. Atì'nogo hagatì logolìk, ninhùp-nanhùp weak hagatarek meneat oba louk hogo hagarì'lugì atì nen, Ala a'mage lagalìk, ùkùm huko mene inoba hike atì.

Paùlùt apùnì o Tesalonika mene hobuk isa lagalùk isike wene

¹⁷ Nerùgì nagaiya'lak. Nit en he, hit hinalepma hikalùk wagagusik, yogotak ya elama hesik ninebe walegat welago meneat he, ninetaùken hit ninom omakìma welago hake atì. Atì'nogo logolìk he, “Inelokoken nineileken hisa lelo e,” ìlùk, hageat en nina'la walok apik akìkì logolìk hinoba wesuogolùk walhìkì lagosik.

¹⁸ Walhìkì logolìk he, an Paùlùt nokawerek neki alep aike wesigìlùk walhìgìk, hobuk aike wesigìlùk walhìgìk, isigi meneat he, Ibilit en nakwe palhikomo nen kamo isigi atì.

¹⁹ Nit en he, “Hano asigin,” ìlùk nina'la hai hakìkì lago atì re, sanìlak hesik nogo. Ninoe Etagepogot Yesùt ebe wìrìk, “Hano hagatep,” ìlùk, at eilhanem enagat hinamo ninalong asigin atì, ero kì ba nen nogo. Ero hùnogo mene hesik hùk. Hit hinebe hesigat ninalong asigin o.

²⁰ Nina'la hai hakìgìk, ninalong agìk, ìkì lago atì hit hinebe hesigat o.