1 TESALONIKA 1 - Ala Ane Wene Ket Mene Warogo Wo'ninapike Wene

Hai warinapike wene

¹ Hit Ala againapùrì o Tesalonika atogotì logolìk, ninopase Ala mel, ninoe Etagepogot Yesùt Karìsùt mel, hinom hutik welagep mene, nerùgì nagaiya'lak. An Paùlùt, Silat Timotìùt eperak ninom en, wene yì helal waganogo hinoba lakhei wago atì. Ninopase Ala oabùt hano a'nogo nen hano mene wokhisìgìk, hinetaùken hapuguthinapìk, ìkì logouak o.

Ala againapùrì o Tesalonika mene inetaùken Ala oba hìpìrethìlìk inoabùt hagatì lagaukwa wene

² Nit en sapan hit obogat hesik hinetage palogo ìkì logolìk he, Ala hai wato motogat welago.

³ Ninopase Ala eilhanem sapan atì'nogo ìkì logolìk he, hit hinetaùken Ala oba hìpìrìk logolìk hinoabùt hagatì lagep mene mel, apùnì aike hinetawìrogo logolìk, hinomamerogo leberisìkì lagep mene mel, hina'la nen, “Ninoe Etagepogot Yesùt Karìsùt en hano haga'ninabigin,” ìlùk, hinepe morogo welagep mene mel, nit en hit hagatì lagep mene atì hesik hinoba lì'mathìgì'lek, eberek motok welago.

⁴ Nerùgì nagaiya'lak. Hit hinebe Ala etawìrogo logolìk wenakhinapikomo welagep atì ninelu o.

⁵ Nit hano wene wolok yogohisa wagagu a'nogo re, ninane ba nek yogohisìkì lagagu hùk. We, Ala Areagùn a'nogo nina'la logolìk, omamerogo lebe'nisiko kolek, nina'la nen, “Wene yì eberogoat,” ìlùk ninetaùkenma hùthasugusik enat yogohisìkì lagagu atì. Nit o atoma ninom logolìk, hit hesigat hagatì lagagu a'nogo hineluat o.

⁶ Hit yì aik tì aik hagathinapo kolegat he, hina'la hai hakìkì logouagalùk Ala Areagùn nen hina'la kagalhìkomo, hai hakìkì logolìk, hano wene wanhìsigip he, nit ninoabùt wanhìk, ninoe Etagepogot oabùt wanhìk, isigip atì.

^7-8 Ninoe Etagepogot en hagasike wene a'nogo hit were'ma nen ukalarìk ukalarìk o Maketonia, Akaya, lagaike atì. Mene re, atì nek hùk. Hit hinetaùken Ala oba hìpìrethesigip mene atì, hinabok hano o yì awi tì awi obogat lagaikomo inelumo re, nit en hobuk hinabok yogoisasak lek aga. Atì nen he, apùnì o Maketonia mene mel, o Akaya mene mel, hano wene eberogoat ìlùk wanhukwa mene hùgì obogat en he, “It hano hagarì'lùgì,” ìlùk, hinoabùt waganogo hagarì'lùgì atì.

^9-10 It en wene mel ìlì'lùgìat: “It apùnì o Tesalonika mene nen, Paùlùt lak inebe woginabìk he, Eberogoat he, Ala eluk motok welagarek mene atìat o, ìlùk awe a'ma logolìk, at hesik hagatìk, at aput pogot oba nen pi wesigin atì ebe serogo welagìk, uogolùk he, tùgì hareken heraksìlìk, inelokwe hebelogo Ala wogosukwasik werek Ala nen aput wa'lagaikesi'mo eluguthesike mene, ebe Yesùt atìat o. Nen, Ala a'mage lagalìk ùkùm apùnì inoba hìkì logolìk, nit Yesùt atì nenat telninabìgìn o,” ìlùk, hinabok hano ìlì'lùgìat o.