1 PETERÙT 5 - Ala Ane Wene Ket Mene Warogo Wo'ninapike Wene

“Ala againapùrì yì'nogo serisek logoino,” ìlùk yogoisasike wene

¹ Hit Ala againapùrì serisek welagasep atì hak, an atì'nogoat serisek welagìrek mene nen hinasuk aike wasik. At Karìsùt oba yì aik tì aik hìlìk hìlìk wa'lagaike atì, an neileken hasigi. Nen, hobuk Ala nen ebe weinam hogo lakhei wesigin atì waganem, apùnì nen hogorasugun atì, an ninom hogo'ninabugunat o. An nane lìok hogo hinasuk wasik.

² Ala nen he, “An nagainapùrì wam topa wam hake tì'nogo serisek logoino,” ìlùk hinayoko hesike hagat serisek logoino. Serisek logolìk, hinokawerek hinabìt werek kolegat, apùnì aike nen, inane keirogo yogohisikenem serisek welagìk, nen, hina'la nen, “Oko aike wo'nisoak,” ìlùk akìkì logolìk serisek welagìk, ìkì logogùp o. At he, we, hina'la hairogo serisek logoino o.

³ Ala againapùrì serisek logouagalùk sùpùrogo wokhisasike atì serisek logolìk, hinebe kain negen logolìk, mep lagai'lagak hogo hagarinapì logogùp. We, hit hano hagatenem ineileken hisìlìk hinoabùt waganogo hagatì logouagalùk, hano hagatì logoino.

⁴ Atì'nogo hagato were'ma re, ninoe ako esewerek a'nogo wesipik he, “Hano motok hagatì lagepma,” ìlùk oko hogorato motok logogun mene wokhisegein o.

⁵ Nen, atì hagat he, hit ap elege nagoromì. It aike nen Ala ane ba mel isukwa: “Apùnì inokawerek en hogorakikenem, Ala nen inoasigìlùk abìt isikerek o. Meneat he, inokawerek inetaùken seberogo logogun halok, etawìrinaperek o,” ìlùk helal waganogo hesukwama werek atì nen, hit en inalùgetek inawe a'ma kìlìk inane hologo hagatì logoino o. Atì'nogo hagatì logolìk he, hit obogat he, hinokawerek en hogorakìgì'lek inawe a'ma logolìk, hit aike nen it aike inatitigeke welagìk, it en hit hinatitigeke welagìk, ìkì logolìk lebet-lebet ìkì logoino o.

⁶ Atì'nogoat, Ala nen hobuk hinetagewerek menhikoagalùk, yogotak ya hinokawerek en hogorakìgì'lek, at eki omame werek mene awe a'ma kìlìk hinetaùken seberogo hagatì logoino o.

⁷ Ala hinebe etawì atì nen, hit yì mene tì mene hesik hina'la wenesùgì uan horo ebetì lagep atì heraksìlìk he, hinetaùken at oba hìpìrethìlìk logoino o.

⁸ At Ibilit, hinaselei mene a'nogo nen, singa lo yeke anini weak mene yì mene tì mene haum hogo nagalùk ane kwe agan herarìk nikerek atì hak, “Sa hak weagathegein,” ìlùk herakhinabìk niko atì, hinepe hebelogo hineileken hanorogo logoino o.

⁹ Atì'nogo logolìk, hina'la nen, “Ninerùgì ninagaiya'lak o yì awì tì awì atoma yì aik tì aik hìlì'lùgì hagat hìkì lago,” ìlùk, at Ibilit waganem, ane holhì'lek heraksìlìk hinetaùken Ala oba hìpìrethìlìk ning hogo metek logoino o.

¹⁰ Were'ma, at Ala ebe hogorato motok logogun atì hak, hit Karìsùt hinom hutik were'ma hinomat hogothinapo logouagalùk hinayoko hesikomo, yogotak ya hamùlùgat enek hinoba yì aik tì aik hìkì logopik, hobuk, at oabùt hano motok a'nogo nen, katok hogo hagathinapìk, hinetaùken wurigethìgìk, hinomamethinapìk, hapuguthinapìk, igin o.

¹¹ Yì mene tì mene obogat at aligat ese logolìk hesogo motok logouak, ìlùk, “Amin,” ìgì atì.

Wene elùgùn warogo hai warinapike wene

¹² An nen wene horoat atì hinasuk warogo hinoba lakhei wesigìlùk he, helal wanuagalùk an nagot Ala aput Silat oabùt hùpùnsek hìgìrìk he, ayoko hìgìma wanhomo hinoba lakhei wagì atì. Ala oabùt hano nen haga'ninabì'logo mene ebe yìat ìlùk, an nelu logolìk eberogoat yogohisìgì o. Halok, hinetaùken atì baat hìpìrìk logolìk, ning hogo metek logoino, ìlùk wene helal waganogo hinoba lakhei wagì atì.

¹³ Hinerùgì hinagaiya'lak Ala againapùrì at en wenaginapike mene o Pabilon yoma welagaikarek mene nen hai wathinapìk, naput Marekùt en hai wathinapìk, aga o.

¹⁴ Nen, hit-hit, netawì-hetawìrogo hai hinape saluk wat-wat ilik lano o. Ala nen hit Karìsùt hinom hutik mene hùgì hinebe obogat hinetaùken hapuk hogo hakhisek logouak o.