1 PETERÙT 4 - Ala Ane Wene Ket Mene Warogo Wo'ninapike Wene

“Hinoabùt ket mene haga'larik, yì'nogo hagatì logoino,” ìlùk yogoisasike wene

¹ Apùnì yì aik tì aik hìlìk, inebe wa'larìk, hobuk weak hagato logousak lek atì nen, at Karìsùt yì aik tì aik hìlìk hìlìk ebe wa'lagaike atì hak, hit hogo re, apùnì sing ìkìlik inepe hebelogo welagaikarek atì hak, at Karìsùt oabùt waganogo, yì aik tì aik hìkì logolìk hinomamerogo logoino o.

² Ati nen, hit en he, apùnì yì mene tì mene walok en inetaùken nen nikerek atì mene heraksìlìk, hùlì yogotak hùlì nen he, hineluk logolìk Ala a'la walok akikerek mene atì nek hagatì logoino o.

³ Hit alep he, hinoabùt it apùnì Ala ane inokot mene nen ina'la akalùk hagatarek atì hak, arat hagatì logolìk he, weak hinekalì legat hagatìk, hinetaùken nen nikenem pailak haksìgìk, pailak hakhinabuagalùk hagatìk, eken amusu weak mene nìlìk hinetaùken palek hagatìk, pesta nìlìk yùgùneke yaganeke hagatìk, amusu weak mene atì hinoba lagolegat nìkìk, tùgì hareken a'la kolo asinogo ìlùk, hogorasusak lek mene hogoratìk, ìkì lagagip atì.

⁴ Meneat he, yogotak hit hinoabùt it weak inamolorogo motok hagarìk lagaikarek atì hak hinom hagatì'lek kamo ìkì lagep atì nen, hit hinabok weak palì'lùgì atì.

⁵ Meneat he, at Ala nen, apùnì ineluk mene mel, wa'lagaukwa mene mel, inanema waganogo ùkùm inoba hìgìk, kotìk, ìgìlùk a'la akikesik werek. Atì'nogo ùkùm inoba hikenem, it en, ùkùm inoba korùogolùk, “Nit yì'nogo hagatì lagagu, tì'nogo hagatì lagagu,” ìlùk yogotenem mea asigin weregat o.

⁶ Ati nenat, it apùnì wa'lagaukwa mene atì, Ala nen nit apùnì obogat ùkùm ninoba hìgìk, kotìk, ikerek atì hak inoba hesikomo, inebe wa'lagaukwa meneat he, at Ala a'la akasike ba inareagùn eluk welagarek atì hak ineluk logouagalùk, at Karìsùt en hano wene yogoisa lagaike atì.

“Hit-hit hinoabùt ket mene yakùlìk laga logoino,” ìlùk yogoisasike wene

⁷ Yì mene tì mene obogat elùgùn oba haga'lasigin mene horogat asi waga ìlùk, sapan ìkì logouogolùk, hinetaùken sebeksek logolìk, hinoabùt hebelogo logoino.

⁸ Wene esin hake re, hit-hit netawì-hetawìrogo hagatì logolìk, aike nen aike weagathegein mene sagalogo motok legethogoin atì nen, hit-hit hinerùgì hinagaiya'lak hinom netawì-hetawìrogo motok hagatì logoino o.

⁹ Hinerùgì hinagaiya'lak hinom, hit aike nen it aike inaua lagìk, it en hit hinaua wagìk, ìkì logolìk, inebe woginabìk he, hina'la nen, “Nabìt e,” ìlùk akìgì'lek woginapì logoino.

¹⁰ At Ala oabùt hano nen, ninebe lopok ninoabùt hùnogo tomok wo'nisasike higit hogoat, hinebe lopok en atì mene hano ese logolìk, hithit lebet-lebet ìkì logoino.

¹¹ Atì'nogo ìkì logolìk, Yesùt Karìsùt hinom hutik logolìk hagatenem, it apùnì aike nen Ala hogoratì logouagalùk, hit aike nen wene yogoisìkì logolìk, Ala aneat yogoisìgìk, hit aike nen it aike leberisìkì logolìk, Ala omame wo'nisikerek atì baat leberisìgìk, ìkì logoino o. Atì'nogo hagatì logolìk, Yesùt omame apik esok motok welagarek a'nogo hogorato motok logouok ìlùk, “Amin,” ìgì atì.

“Hinebe Karìsùt againapùrì atì nen, hinoba yì aik tì aik agarek atì,” ìlùk yogoisasike wene

¹² Nerùgì nagaiya'lak. Hinebe netawì e. Etu aik hagarek atì hak, Ala nen he, hinoabùt paligìlùk yì aik tì aik hinoba aganem, hina'la nen he, “Yì hùnogoat hogorek lek mene ninoba arì'logo,” ìlùk akagùp o.

¹³ At Ala nen Karìsùt ebe weinam hogo lakhei waganem, hogorasugun atì like, waganem hina'la hai apik hakùogolùk, hina'la nen be, “At Karìsùt oba yì aik tì aik hìlìk hìlìk wa'lagaike hak, nit at ninom hutik logolìk atì'nogoat hìkì lago,” ìlùk hina'la hai hakìkì logoino.

¹⁴ Apùnì aike nen at Karìsùt hesik wenakhisiko halok he, hina'la nen he, “Ala Areagùn hogoratarek mene a'nogo ninoba louk ikomo welago,” ìlùk hina'la hai hakìkì logoino o.

¹⁵ Meneat he, it aike nen apùnì inoatìk, yogot wanhìk, weak hagatìk, it aike inawene mene talepogoke hagatìk, ikenem, yì aik tì aik inoba agarek atì hak, hit atì'nogo hagatenem hinoba asinogo.

¹⁶ Meneat he, apùnì aike nen, “Hat Karìsùt agot, hebe Kerisiten mene,” ìlùk yì aik tì aik hagathinapa halok, hinekalì agùp o. “We, an Karìsùt agot halogat at etage mene an netage salogo yogonerì'lùgì atì hanoat o,” ìlùk Ala hogoratì logoino.

¹⁷ Ala nen ninanema waganogo ùkùm ninoba hìgìk, kotik, igin atì arat horogat asi waga. Atì'nogo hagatì logolìk he, nit Ala againapùrì mene tak ninanema waganogo ùkùm ninoba hìgìk, kotìk, ìgìn halok, hobuk it apùnì aike Ala ane hano wene wanhì'lek mene nìkì'nogo hagarinabigin akegep.

¹⁸ Apùnì nen Ala ane ba mel isukwa: “Apùnì higit hogo hagarì'lùgì mene, Ala nen telinabusak lek hake were'ma, telinabigin atì halok, it Ala ebe ina'la meathìlìk weak hagarì'lùgì mene atì nìkì'nogo hagarinabigin akegep,” ìlùk helal waganogo hesukwa.

¹⁹ Hit Ala a'la akasike baat hinoba yì aik tì aik atì'nogo hìkì lagep halok he, hina'la nen he, “At ninebe elalninapike mene atìat oba hìpìrìk logousak he, hano,” ìlùk hinetaùken at oba hìpìrìk logolìk hinoabùt hano hagatì logoino.